42. यीशु स्वर्ग जो फिरी गन्दा हा

जैस धैङै प्रमात्मै यीशु जो मुडदै थऊँ जीन्दा करू थु, तसेरै दोई चेलै नेङै रै ग्रां जो चलुरै थीयै। चलदै चलदै सो यीशु रै सोगी जेड़ा भूआ थु। तसेरै बारै मंज गल्ला करु करदै थीयै, तिन्या जो आश थी कि सो मसीह थु, पर तमी सो मारी दिता गो थु। अबै सो बलदी हिन् कि सो भिरी जिन्दा भूची गो हा। सो ना जाणदै थीयै कि कसा गल्ला पुर विश्वास करना ।

यीशुयै तिन्या बलै इचिकरी तन्यारै सोगी चलना शुरू करू, पर सो तैसीयो पहचाणी ना पाए। तिनी पूछु कि सो कसेरै बारै मंज गल्ल करु करदै थीयै। तिन्यै तैसियो पिछलै धैङै मंज यीशु रै सोगी भुई पूरी घटना रै बारै मंज दसू। तिन्यै सोचु कि सो कसी परदेशी सितै गल्ला करू करदै थीयै जेङा ना जाणदा थु कि यरूशलेम मंज कै भुआ थु।

तैहणै यीशुयै तिन्या जो समझाऊ कि प्रमात्मै रा वचन मसीह रै बारै मंज कै बलदा हा। बङै पैहलै, भविष्यद्वक्तै बलुरा थू कि बुरै मणु मसीह जो पीड़ित करना अतै मारी दिणा। पर भविष्यद्वक्तै एह भी बलुरा थु कि तैस त्रीयै धैङै जी उठणा।

जैहणै सो तैस नगरा मंज पूजै जैठी सो दोई जणै ठैरना चान्दै थीयै, तैहणै तिकर लगभग शांझ भूची गेई थी। तिन्यै यीशु जो तन्यारै सोगी ठैरनै तांई आमंत्रित करू, अतः सो तन्यारै सोगी अक्की घरा मंज गो। अपणै शन्झा रै भोजन जो खाने रै तांई सो बैही गै। यीशुयै आक्क रोटी जो लेईकरी तसेरै तांई प्रमात्मै रा धन्यवाद करू, अतै भिरी तैतियो त्रोडू।आक्क दम सितै, तिन्यै जाणी लेउ कि सो यीशु थु। पर तैसी टैमै, सो तन्यारी हाख्री थंऊ ओझल भूची गो।

तिन्या धुनी जणै अक्की दूयै सितै बल्लू, "सो यीशु थु! ठेरेतांई जैहणै तिनी असियो प्रमात्मै रै वचन जो समझाऊ थु ता अहै बङै उत्साहित थीयै!" झट ही, सो निकळी करी फिरी यरूशलेम जो गै। जैहणै सो पुजै ता तिन्यै चेलै जो दसू, "यीशु जीन्दा हा! अहै तैसीयो हेरू हा!"

जैहणै चेलै गल करु करदै थीयै, यीशु आक्क दम सितै तैस कमरै मंज तन्यारै सामणै प्रकट भूआ। तिनी बल्लू, "तुसियो शान्ति मुळा!" चेलै सोचु कि सो कोई भूत थु, पर यीशुयै बल्लू, "तुहै कजो डरदै हिन्? तुहै ऐह कजो ना सोचदै हिन् कि ऐह सचमुच मंज अँऊ, यीशु हा? मेरै हथा अतै पैरा जो हेरा। भूता रै बलै ऐसा शरीर ना भुन्दा जेङा मिंजो बलै हा।" ऐह दसणै तांई कि सो कोई भूत ना थु, तिनी खाणै तांई कुछ मँगु। तिन्यै तैसियो मछली रा अक्क टुकड़ा दित्ता, अतै तिनी तैतियो खाई लेऊ।

यीशुयै बल्लू, "मेरै बारै मंज प्रमात्मै रा वचन जो कुछ भी बलदा हा सो घटित भुल्ला। मेई तुसियो दसी दिता थु कि ठेरा भूणा जरूरी थू।" तैहणै यीशुयै तिन्या जो प्रमात्मै रा वचन अच्छै सितै समझाऊ। तिनी बल्लू, "बङी पैहलै भविष्यद्वक्तै लिखुरा थु कि मिंजो, मसीह जो दुःख चुआणा पैणा, मरना पैणा अतै भिरी त्रियै धैङै मुङदै थऊं जी उठणा पैणा ।"

तिन्यै भविष्यद्वक्तै ऐह भी लिखु थु कि मेरै चेलै प्रमात्मै रै वचन री घोषणा करलै। सो हर अक्की जो पश्चाताप करनै तांई द्सलै। जे सो ऐसा करदै हिन् ता प्रमात्मा तन्यारै पापा जो माफ़ करला। मेरै चेलै ऐस सन्देश रा प्रचार करना यरूशलेम थऊँ शुरू करलै। ता सो सब्बी जगह सब जाति मंज गल्लै। तुहै मणु मेरी हर आक्क गाल्ल अतै कम्मा रै गवाह हिन् जेड़ा मेई बल्लू अतै करू थु, अतै तैस सब्बी रा भी जेड़ा मिंजो साेगी भुआ ।

अगलै चाळी धैङै रै दौरान, यीशु अपणै चेलै पुर कई बरी प्रकट भूआ। आक्क बरी ता सो क्की ही टैमा पुर 500 थऊँ जादा मणु पुर प्रकट भूआ! तिनी अपणै चेलै पुर कई तरीकै सितै साबित करू कि सो जीन्दा थु, अतै तिनी तिन्या जो प्रमात्मै रै राज्य रै बारै मंज शिक्षा दीती।

यीशुयै अपणै चेलै सितै बल्लू, "प्रमात्मै मिंजो स्वर्ग अतै पृथ्वी रै हर अक्की जन पुर शासन करनै रा अधिकार दितुरा हा। ठेरैतांई अबै अँऊ तुसु सितै बलदा हा: गिचिकरी सब जाति रै मणु जो चेला बणा। ऐसा करनै तांई, तीजो तिन्या जो पिता, पुत्र, अतै पवित्र आत्मा रै नां सितै बपतिस्मा दिणा हा। जो कुछ भी मेंई तीजो आज्ञा दी हा तिन्या सब्बी गल्ला जो मानणा भी तुसियो तिन्या जो सिखाणा हा। याद रखा, अऊँ हमेशा तुन्दै सोगी रैल्ला।"

यीशु रै मरुरै थऊँ जी उठणै रै चाळी धैङै रै बाद, तिनी अपणै चेलै सितै बल्लू, "जैहणै तिकर कि मेरा पिता तुसियो सामर्थ ना दिन्दा हा तैहणै तिकर यरूशलेम मंज ठैहरी रेया। सो तुसु पुर पवित्र आत्मा भैजणै रै द्वारा ऐसा करला।" तैहणै यीशु स्वर्ग मंज चली गो, अतै अक्की बदळै तैसीयो तन्यारी नजरा थऊँ लुकाई लेउ। स्वर्ग मंज यीशु सबी चीजा पुर शासन करनै प्रमात्मै री दाहिनी तरफ बैही गो।