41. परमात्मा यीशु जो मरूरै थऊँ जियन्दा हा

जैहणै सपाई द्वारा यीशु जो क्रूस पुर चढ़ाई दीणै थऊँ बाद, यहूदी अगुवै पिलातुस सीतै बलु, "तिनी झूठै, यीशुयै बलु थु कि सो त्राई धैङै रै बाद मरुरै थंऊ जी उठला। कस्की जो एह निश्चित करनै रै तांई कब्रा री निगरानी करनी भुल्ली कि तसेरै चेलै तसेरै शरीर जो चोरी करी ना लेई गान। जे सो ऐसा करदै हिन् ता तिन्या एह बलणा कि सो मरुरै मंज थऊँ जी उठु हा।"

पिलातुसै बलु, "कुछ सपाई जो लेई गछा, अतै जेड़ा तुहै करी सकदै तिन्या कब्रा री निगरानी करा।" ठेरेतांई तिन्यै तैसा कब्रा रै प्रवेशद्वार रै नङा पुर आक मोहर लाई दीती। तिन्यै एह निश्चित करनै रै तांई तैठी सपाई जो भी बहाली दिता कि कोई भी तसेरै शरीरा जो चोरी ना सका।

यीशु रै मरनै थंऊ बाद सब्त रा धैङा थु। कोई भी सब्त रै धैङै काम ना करी सकदा थु, ठेरेतांई यीशु रा कोई भी मित्र कबरा पुर ना छुरा थू| अपर सब्त रै अगलै धैड़ै, भ्यागा जो,कुछ जनानी यीशु री कब्रा पुर गाणै ताई तैयार भुई। सो तसेरै शरीरा पुर होर भी मसालै जो लाणा चांदी थीं।

तिन्या जनानी रै पूजणै थंऊ पैहलै, कब्रा पुर अक्क मोट्टा हीलण भूआ। स्वर्गा थंऊ अक्की स्वर्गदूतै इचिकरी तैस नङा जो लुढ़ाई दिता जेड़ा कब्रा रै प्रवेशद्वार जो ढकुरै थु अतै तैस पुर बैही गो। एह स्वर्गदूत प्रगड़ै साईं चमकु करदा थु। कब्रा पुर जैङै सपाई थीयै तिन्यै तेसियो हेरू। सो ऐतणै डरी गै थीयै कि मरूरै साईं जमीना पुर टिरी पै।

जैहणै सो जनानी कब्रा पुर पुजी ता तिनी स्वर्गदूतै तिन्या जो बलु, "मत डरा। यीशु ऐठी नीआ। सो मरूरै थऊँ जी उठु हा, जिंया कि तिनी बलुरा थु कि सो जी उठला! कब्रा मंज तोपा अतै हेरा।" तिन्यै जनानीयै कब्रा रै अन्दर अतै जैठी यीशु रा शरीर रखुरा थु तैठी तोपू अतै हेरु कि तसेरा शरीर तैठी ना थु!

तैहणै तिनी स्वर्गदूतै तिन्या जनानी सितै बल्लू, "गिचिकरी. तसेरै चेलै जो दसा, 'यीशु मरुरै थऊँ जी उठु हा अतै सो तुन्दै अगुं-अगुं गलील जो गल्ला ।'"

सो जनानी हैरान भूईं अतै बङी खुश भूईं। सो चेलै जो एह शुभ संदेश हुणाणै रै तांई दौड़ीं।

जैहणै सो जनानी चेलै जो यह शुभ संदेश दसणै रै तांई अपणी बत्ता पुर थी, ता यीशु तिन्या पुर प्रकट भूआ। सो तसेरै पैरा पुर पेई गेई। तैहणै यीशुयै बलु, "मत डरा। गिचिकरी मेरै चेलै जो गलील गाणै जो बल्ला। तिन्या तैठी मिंजो हेरना ।"