40. यीशु जो क्रूसा पुर चढ़ाया गन्दा हा

यीशु रा मजाक करनै रै बाद, सपाई तैसियो क्रूस पुर चढ़ाणै ताई लेई गै। तिन्यै तैस क्रूसा जो तैस ही पुर चुकऊ जैस पुर तैस मरना थू।

सो सपाई यीशु जो तैसा जगह पुर लेईकरी आये जेडी "खोपड़ी" कहलन्दी हा अतै तसेरै हथा अतै पैरा जो क्रूसा पुर ठोरी दित्ता। अपर यीशुयै बल्लू, "हे पिता, इन्या जो माफ़ कर, क्योकि एह ना जाणदै कि एह कै करू करदैं हिन्।" तिन्यै अक्की तख्ती जो भी तसेरै हैरा रै ऊपर टून्गी दित्ता। तैसा पुर लिखूरा थू, "यहूदी रा राजा।" पिलातुसै तिन्या सितै एही लिखणै ताई बल्लू थू।

तैहणै सपाईयै यीशु रै ओडणा ताई चिट्ठी पाई। जैहणै तिन्यै ऐसा करू ता तिन्यै तैसा भविष्यद्वाणी जो पूरा करू जेड़ी बलदी थी, "तिन्यै मेरै ओडणा जो आपस मंज बणडीं लेऊ, अतै मेरै ओडणा ताई चिट्ठी पाई ।"

तैठी दोई डाकू भी थीयै, जिंया जो सपाईयै तैस ही टैमै क्रूसा पुर चढ़ाऊ थू। तिन्यै तिन्या जो यीशु री धुनी कनारी रखुरा थू। तिन्या मंज अक्की डाकूयै यीशु रा मजाक उड़ाऊ, अपर दूयै बल्लू, "कै तू ना डरदा कि प्रमात्मै तीजो दंड दिणा? अहै मतै बुरै कमा जो करनै रै दोषी हिन्, अपर एह मणु निर्दोष हा।" फिरी तिनी यीशु सितै बल्लू, "जैहणै तू अपणै राज्य मंज अइया ता कृपा करीके मिंजो याद रखैं।" यीशुयै जवाब दित्ता, "आज ही तू मिंजो सोगी स्वर्गलोक मंज भूणा।"

यहूदी अगुवै अतै भीड़ा रै होरी मणुयै यीशु रा मजाक उड़ाऊ। तिन्यै तैस सितै बल्लू, "जे तू प्रमात्मै रा पुत्र हा, ता क्रूसा थऊँ थल्लै उतर अई अतै अप्पू जो बचाई लै! तैहणै असू तीजो पुर विश्वास करना।"

तैहणै तैस पुरै देशा रा अम्बर पूरी तरह थऊँ काळा भूची गो, भलै ही सो धैड़ै रै बीचा रा टैम थू। एह दिय्या रै टैमै काळा भूआ थू अतै त्रीं घंटै तिकर ऐसा ही रेऊ थू।

तैहणै यीशुयै पुकारी करी बल्लू, "पूरा भुआ! हे पिता, अऊँ अपणी आत्मा तेरै हथा मंज दिंदा हा।" तैहणै तिनी अपणै हैरा जो झुकाऊ अतै अपणै प्राणा जो त्यागी दित्ता। जैहणै सो मरू ता अक्क भूकम्प आ। सो बड्डा पर्दा जेड़ा प्रमात्मै री मोजूदगी सितै मणु जो लग करन्दा थू ऊपरा थऊँ थला री तरफ फटी करी दोई भाग भूची गो।

अपणी मोती द्वारा, यीशुयै मणु ताई प्रमात्मै बलै ईणै रा रस्ता खोली दित्ता। जैहणै यीशु री निगरानी करनै वाळै अक्की सपाईयै जो कुछ भूआ थू एह सब हेरू ता तिनी बल्लू, "पक्का, एह मणु निर्दोष थू। एह प्रमात्मै रा पुत्र हा।"

तैहणै यूसुफ अतै नीकुदेमुस नां रै दोई यहूदी अगुवै आयै। सो विश्वास करन्दै थीयै कि यीशु ही मसीह थू। तिन्यै पिलातुस थऊँ यीशु रै शरीरा जो मंगू। तिन्यै तसेरै शरीरा जो ओडणा मंज लपेटू। तैहणै सो तैसियो अक्की चट्टान थऊँ कटी करी बणऊरी कब्रा मंज लेई गै अतै तठेरै अंदर रखी दित्ता। तैहणै तिन्यै तैसा कब्रा रै दारा जो बंद करनै ताई अक्क मोट्टै नड़ा जो लुढ़काई दित्ता।