39. यीशु पुर मुकद्दमा चलन्दा हा

अबै एह धी राती रा टैम थू। सो सपाई यीशु जो महायाजक रै घरै लेई आयै, क्योकि सो यीशु सितै सवाल करना चाहन्दा थू। पतरस दूरा थऊँ तयांरा पीछा करू करदा थू। जैहणै सपाई यीशु जो घरा मंज लेई गै, ता पतरस बाहर रुकी करी अप्पू जो अग्गी सितै गर्म करना लगा।

घरा रै अंदर यहूदी अगुवै यीशु पुर मुकद्दमा चलऊ। सो तसेरै वरुद्ध झूठी गल्ला जो बलनै ताई मतै झूठै गवाह जो लेईकरी आयै। हालाँकि, तयांरी गल्ला अक्की दूयै थऊँ सहमत ना थीं, ठेरैताई यहूदी अगुवै एह साबित ना करी पायै कि सो कसा गल्ला रा दोषी थू। यीशुयै कुछ ना बल्लू।

अंत मंज, महायाजकै सीधै यीशु री तरफ हेरी करी बल्लू, "असियो दस कि कै तू ही जिन्दै प्रमात्मै रा पुत्र मसीह हा?"

यीशुयै बल्लू, "अऊँ हा, अतै तुहै मिंजो प्रमात्मै सोगी बैहुरा अतै स्वर्गा थऊँ इन्दा भी हेरना।" महायाजकै अपणै ओडण फाड़ी लै क्योकि जेड़ा यीशुयै बल्लू सो तैसा गल्ला पुर बड़ा गुस्सा थू। सो होरी अगुवै पुर बकू, "असुओ एह दसणै ताई कसी होरी गवाह री जरूरत ना हा कि इनी मणुयै कै करू हा! तुहै अप्पू ही तैसियो एह बलन्दै हुणी लेऊ हा कि सो प्रमात्मै रा पुत्र हा। तसेरै बारै मंज तुन्दा कै फैसला हा?"

सबी यहूदी अगुवै महायाजक जो जवाब दित्ता, "सो मरनै काबल हा!" तैहणै तिन्यै यीशु री हाख्री पुर पट्टी बन्नी दित्ती, तैस पुर थूकु, तैसियो मारू, अतै तसेरा मजाक उड़ाऊ।

अतै पतरस, जैहणै सो घरा रै बाहर भाळ करू करदा थू। तैहणै अक्की दासी कुळीयै तैसियो हेरू। तैहै तैस सितै बल्लू, "तू भी यीशु सोगी थू!" पतरसै ना करी दित्ता। बादा मंज, कसी होरी कुळीयै एसा गल्ला जो बल्लू, अतै पतरसै फिरी ना करी दित्ती। अंत मंज, कुछ मणुयै बल्लू, "अहै जाणदै हिन् कि तू यीशु सोगी थू क्योकि तुहै धोई गलील थऊँ हिन् ।"

तैहणै पतरसै बल्लू, "जे अऊँ एस मणु जो जाणदा ता प्रमात्मा मिन्ज्पो हराप देया!" तुरन्त ही पतरस रा एस तरह कसम खाणै थऊँ बाद, अक्की कुकड़ै बाँग दित्ती। यीशुयै पचुं मुड़ी करी पतरस जो हेरू।

पतरस तैठीया थऊँ चली गो अतै फूटी-फूटी करी रोऊ। तैस ही टैमै, यीशु जो पकड़ाणै वाळै यहूदै हेरू कि यहूदी अगुवै यीशु जो मृत्युदंड दित्ता हा। यहूदा बड़ा दुःखी भूची गो अतै गिचिकरी अप्पू जो मारी दित्ता।

अबै तैस देशा रा राज्यपाल पिलातुस थू। सो रोम ताई काम करन्दा थू। यहूदी अगुवै यीशु जो तसेरै नेड़ै लेईकरी आयै। सो चाहन्दै थीयै कि पिलातुस तैसियो मृत्युदंड देया अतै तैसियो मारी देया। तैहणै पिलातुसै यीशु थऊँ पूछु, "कै तू यहूदी रा राजा हा?"

यीशुयै जवाब दित्ता, "तेई सच ही बल्लू हा। अपर मेरा राज्य एठी पृथ्वी रा निया। जे भुन्दा ता मेरै दास मेरै ताई लड़ाई करन्दै। अऊँ पृथ्वी पुर प्रमात्मै रै बारै मंज सच दसणा छुरा हूँ। हर अक्क जन जेड़ा सचाई सितै प्रेम करदा हा सो मेरी हुणदा हा।" पिलातुसै बल्लू, "ता सच कै हा?"

यीशु सोगी गल करनै बाद, पिलातुसै बाहर भीड़ा बलै गिचिकरी बल्लू, "अऊँ ऐसा कोई कारण ना पन्दा कि एह मणु मारनै रै काबल भोआ।" अपर यहूदी अगुवै अतै भीड़ै बकी करी बल्लू, "एसियो क्रूस पुर चढ़ाई देया!" पिलातुसै जवाब दित्ता, "सो कुछ भी गलत करनै रा दोषी निया।" अपर सो होर भी ऊँची अवाजा मंज बकणा लगै। तैहणै पिलातुसै त्री बरी बल्लू, "सो दोषी निया!"

पिलातुस डरी गो कि सो भीड़ दंगा शुरू करी दिणा, ठेरैताई सो अपनै सपाई द्वारा यीशु जो क्रूस पुर चढ़ाणै ताई मन्नी गो। रोमी सपाईयै यीशु जो कोड़ै लायै, अतै तैसियो राज ओडण लोआयै, अतै तसेरै हेरा पुर कंण्डैं सितै बणुरा मुकुट रखु। तैहणै सो एह बल्ली करी तसेरा मजाक उड़ाणा लगै, "हेरा, यहूदी रा राजा!"