38. यीशु जो पकड़ाणा

हर साल, यहूदी मणु फसह रा पर्व मनदैं थीयै। एह एस बारै मंज अक्क उत्सव थू कि कई शताब्दी पैहलै प्रमात्मै तयांरै पूर्वजा जो मिस्र री गुलामी थऊँ छड़ऊ थू। लगभग त्रीं साला रै बाद यीशुयै सार्वजनिक रूप सितै प्रचार करना अतै शिक्षा दिणा शुरू करू। यीशुयै अपणै चेलै जो दस्सू कि सो तयांरै सोगी यरूशलेम मंज फसह रै पर्व जो मनाणा चाहन्दा हा, अतै एह भी कि सो तैठी मारी दिणा।

यीशु रै चेलै मंज अक्क यहूदा नां रा मणु थू। यहूदा प्रेरिता रै पैहै री थैली रखणै रा प्रभारी थू, अपर अक्सर सो तैसा थैली थऊँ पैसै कड्डी लैन्दा थू। यीशु अतै चेलै यरूशलेम मंज पूजणै बाद यहूदा यहूदी अगुवै बलै गो। तिनी पैहै रै बदलै मंज यीशु जो तयांरै हथै पकड़ाणै रा प्रस्ताव रखु। सो जाणदा थू कि यहूदी अगुवै स्वीकार ना करन्दै थीयै कि यीशु ही मसीह थू। सो जाणदा थू कि सो तैसियो मारी दिणा चाहन्दै थीयै।

महायाजक रै बलनै पुर यहूदी अगुवै यीशु जो तयांरै हथा मंज पकड़ाणै ताई यहूदा जो ती चाँदी रै सिक्कै दित्तै। एह तैस ही साह्ब्बै सितै भूआ जिंया कि भविष्यद्वक्तै बल्लू थू कि भूणा। यहूदा मन्नी गो अतै पैहै लेईकरी चली गो। सो यीशु जो गिरफ्तार करनै मंज तयांरी मदद करनै ताई कसी अवसर री खोज करना लगै।

यरूशलेम मंज, यीशुयै अपणै चेलै सोगी फसह रा पर्व मनाऊ। फसह रै भोज रै दौरान, यीशुयै रोटी लेईकरी त्रोड़ी। तिनी बल्लू, "एतियो लेया अतै खा। एह मेरा शरीर हा जेड़ा अऊँ तुन्दै ताई दिंदा हा। एतियो मेरी याद मंज करैं।" इस साह्ब्बा सितै, यीशुयै बल्लू कि तैस तयांरै ताई मरी गाणा, मतलब तयांरै ताई सो अपणै शरीरा जो बलि चढ़ाई दिणा।

फिर यीशुयै अक्क दाखरस रा प्याला लेऊ अतै बल्लू, "एतियो पी लेया। एह नई वाचा रा मेरा लहू हा जो कि मुं उंडेलणा ताकि प्रमात्मा तुन्दै पापा जो माफ़ करा। हर बार एतियो पीन्दै टैमै मेरी याद मंज एतियो करा जेड़ा अऊँ अजूं करू करदा हा।"

तैहणै यीशुयै अपणै चेलै सितै बल्लू, "तुसू मंज अक्की मिंजो पकड़ाणा।" चेलै चौंकी पै, अतै पूछणा लगै कि कुण एसा काम करला। यीशुयै बल्लू, "मेरा पकड़ाणै वाला मणु सो हा जैसीयो अऊँ एह रोटी रा टुकड़ा दिंदा हा।" तैहणै तिनी सो रोटी यहूदा जो दित्ती ।

तैसा रोटी जो लैणै रै बाद, यहूदा मंज शैतान समाई गो। यहूदा निकळी करी यीशु जो गिरफ्तार करनै ताई यहूदी अगुवै री मदद करनै जो चली गो। एह राती रा टैम थू।

खाणै थऊँ बाद, यीशु अतै तसेरै चेलै जैतून पाड़ा जो चली गै। यीशुयै बल्लू, "तुहै सब आज राती मिंजो छड्डी दिणा। एह लिखुरा हा, 'मुं पाअला जो मारना अतै सारी भैड़ा तितर-बितर भूची गाणी।'"

पतरसै जवाब दित्ता, "भले ही बाकी सब तीजो छड्डी दीन, मुं ना छडणा!" तैहणै यीशुयै पतरस सितै बल्लू, "शैतान तुसू सबी जो लेई लैणा चाहन्दा हा, अपर हे पतरस, मैंई तेरै ताई प्रार्थना करी हा कि तू विश्वास थऊँ चुकि ना गच्छा। फिरी भी, आज री राती, कुकड़ा री बाँग दिणै थऊँ पैहलै तूद तराई बरी इंकार करना कि तू मिंजो जाणदा भी निया।"

पतरसै तैहणै यीशु सितै बल्लू, "भले ही अऊँ मरी भी गछु, मुं कदी भी तेरा इंकार ना करना!" बाकी रै सब चेलै भी एही बल्लू।

तैहणै यीशु अपणै चेलै सोगी गतसमनी नां री जगह पुर गो। यीशुयै अपणै चेलै सितै प्रार्थना करनै ताई बल्लू ताकि शैतान तयांरी परीक्षा ना करा। तैहणै यीशु अप्पू प्रार्थना करनै ताई चली गो।

यीशुयै तराई बरी प्रार्थना करी, "हे मेरे पिता, जे सम्भव ता ता कृपा करीके एह दुःखा रा प्याला पीणै ताई मिंजो मत दे। अपर जे मणु रै पाप माफ़ करनै ताई कोई होर रस्ता निया, ता तेरी ही इच्छा पूरी भोआ।" यीशु बड़ा दोकुळुरा थू अतै तसेरा पसीना लहू री बूँदा साईं थू। तैसियो सामर्थ दिणै ताई प्रमात्मै अक्क स्वर्गदूत जो भैजू।

हर बार प्रार्थना रै बाद, यीशु अपणै चेलै बलै वापस आ, अपर सो सोई गछुरै थीयै। जैहणै यीशु त्री बरी फिरू ता यीशुयै बल्लू, "जागी गच्छा! मेरा पकड़ाणै वाळा एठी हा।"

यहूदी अगुवै, सपाई, अतै अक्क बड़ी भीड़ा सोगी यहूदा आ। तिन्यै तलवारा अतै होठी लेऊरी थी। यहूदै यीशु बलै इचिकरी तैस सितै बल्लू, "हे गुरु, नमस्कार," अतै तैसियो चूमी लेऊ। तिनी गिरफ्तार करनै ताई यीशु जो यहूदी अगुवै जो दसणै ताई ऐसा करू थू। तैहणै यीशुयै बल्लू, "हे यहूदा, कै तू अक्की पोक्कू सितै मिंजो पकड़वाऊ करदा हा?"

जैहणै सो सपाई यीशु जो पकड़ू करदै थीयै, ता पतरसै अपणी तलवार कड्डी अतै महायाजक रै अक्की सेवका रा कान बड्डी दित्ता। यीशुयै बल्लू, "तलवारा जो दूर कर! अऊँ अपणै पितै थऊँ मेरा बचाव करनै ताई स्वर्गदूता री अक्की सेना ताई विनती करी सकन्दा हा। अपर मिंजो मेरै पिता री गल मनणी हा।" तैहणै यीशुयै तैस मणु रै कना जो ठीक करी दित्ता। तैहणै साब चेलै नही गै।