37. यीशु लाज़र जो मरूरै थऊँ जियन्दा हा

लाज़र नां रा अक्क मणु थू। तसेरी दोई बैहणी थी ज्यारैं नां मरियम अतै मार्था थू। सो सब यीशु रै गैरै मित्र थीयै। अक्क दिन, कसीयै यीशु जो दस्सू कि लाज़र बड़ा बमार थू। जैहणै यीशुयै एह हुणु ता तिनी बल्लू, "एह बमारी लाज़र रै मरनै सोगी खत्म ना भूणी। ठेरै बजाए, एह मणु जो प्रमात्मै रा आदर करनै ताई प्रेरित करली ।"

यीशु अपणै मित्रा सितै प्रेम करन्दा थू, अपर जैठी सो थू तैठी तिनी दोई दिना तिकर भाळ करी। तिन्या दूँ धैड़ै के बाद, तिनी अपणै चेलै सितै बल्लू, "अईया, वापस यहूदि जो चलन।" चेलै जवाब दित्ता, "अपर हे गुरु, अल्ली कुछ ही टैमा पैहलै तैठीया रै मणु तीजो मारी दीणा चाहन्दै थीयै !" यीशुयै बल्लू, "इन्दा मित्र लाज़र सोई गो हा, अतै मिंजो तैसियो जगाणा चेहिन्दा।"

यीशु रै चेलै जवाब दित्ता, "हे प्रभु, जे लाज़र सोऊ करदा हा, ता सो ठीक भूची गाणा।" तैहणै यीशुयै तिन्या सितै साफ़ बल्ली दित्ता, "लाज़र मरी गो हा । अऊँ खुश हा कि अऊँ तैठी ना थू, ताकि तुहै मिंजो पुर विश्वास करी सकन।"

जैहणै यीशु लाज़र रै ग्रां पुजू ता लाज़र जो मरूरै पैहलै थऊँ ही चऊर धैड़ै भूची चुकुरै थीयै। मार्था यीशु सितै मुळनै ताई बाहर आई अतै बल्लू, "हे प्रभु, जे तू एठी भुन्दा ता मेरा भाई ना मरन्दा। अपर अऊँ विश्वास करन्दी हा कि जेड़ा कुछ भी तू प्रमात्मै थऊँ मंगा सो तीजो दिणा।"

यीशुयै जवाब दित्ता, "पुनरुत्थान अतै जीवन अऊँ हा। जो कोई मिंजो पुर विश्वास करन्दा हा जे सो मरी भी गच्छा ता भी जीणा। जो कोई मिंजो पुर विश्वास करन्दा हा तैस कदी ना मरना। क्या तू एस पुर विश्वास करन्दी हा?" मार्थै जवाब दित्ता, "हे प्रभु, अऊँ विश्वास करन्दी हा कि तू प्रमात्मै रा पुत्र मसीह हा।"

तैहणै मरियम आई। तैहै यीशु रै चरणा मंज पेई करी बल्लू, "हे प्रभु, जे तू एठी भुन्दा ता मेरा भाई ना मरन्दा।" यीशुयै तैस थऊँ पूछु, "तुहै लाज़र जो कड़ी रखु हा?" तिन्यै तैसियो दस्सू, "कब्रा मंज। अई अतै हेरी लै।" तैहणै यीशु रुणा लगा।

सो कब्र अक्क गुफा थी जठेरै दारा पुर अक्की नड़ा जो खसकऊ थू। जैहणै यीशु कब्रा पुर पुज्जू ता तिनी तिन्या सितै बल्लू, "नड़ा जो हटाई देया।" अपर मार्थै बल्लू, "तैसियो मरूरै चऊर धैड़ै भूची चुकूरै हिन्। तैस थऊँ मुश्क इंदी भूणीया।"

यीशुयै जवाब दित्ता, "कै मैंई तुसू सितै ना बल्लू थू कि जे तुहै मिंजो पुर विश्वास करा ता प्रमात्मै रै सामर्थ जो हेरलै?" ठेरैताई तिन्यै नड़ा जो हटाई दित्ता।

तैहणै यीशुयै ऊपर स्वर्गा री कनारी हेरी करी बल्लू, "हे पिता, मेरी हुणनै ताई अऊँ तेरा धन्यवाद करन्दा । अऊँ जाणदा हा कि तू हमेशा मेरी हुणदा हा, अपर मैंई एह एठी खड़ूरै सबी मणु री मदद करनै ताई बल्लू ताकि एह विश्वास करन कि तेई मिंजो भैजू हा।" तैहणै यीशुयै अवाज लगाई, "हे लाज़र, बाहर निकळी अई!"

अतः लाज़र बाहर निकळी आ! सो अल्ली भी कफणा मंज लिपटूरा थू। यीशुयै तैस सितै बल्लू, "एस कफणा जो कडणै मंज तसेरी मदद करा अतै एसियो अजाद करा।" एस चमत्कार रै कारण मतै यहूदियै यीशु पुर विश्वास करू।

अपर यहूदी रै धार्मिक अगुवै यीशु सितै जळना लगै, ठेरैताई सो योजना बणाणै ताई अक्क सोगी किट्ठीयै कि किन्या यीशु अतै लाज़र जो मारी दिछीया ।