36. रूपान्तरण

अक्क धैड़ा, यीशुयै अपणै त्रिनि चेलै, पतरस, याकूब, अतै यूहन्ना जो अपणै सोगी लेऊ। (एह यूहन्ना नां रा चेला सो हो मणु निया जिनी यीशु जो बपतिस्मा दित्ता थू।) सो प्रार्थना करनै ताई अक्की ऊचै पाड़ा पुर गै।

जैहणै यीशु प्रार्थना करू करदा थू ता तसेरा मुहँ सूरजा साईं चमकदार भूची गो। तसेरै ओडण प्रगड़ै साईं चिट्टै भूची गै, जीना पृथ्वी पुर कोई करी सका तैस थऊँ भी बदी करी चिट्टै।

तैहणै मूसा अतै एलिय्याह भविष्यद्वक्ता प्रकट भूयै। एह मड़द एसा पृथ्वी पुर सो साला पैहलै रैहन्दै थीयै। तिन्यै यीशु सितै तसेरी मोती रै बारै मंज गल करी, क्योकि सो तोळा ही यरूशलेम मंज मरी गाणा ।

जैहणै मूसा अतै एलिय्याह यीशु सितै गल्ला करू करदै थीयै तैहणै पतरसै यीशु सितै बल्लू, "असू ताई एठी भूणा भला हा। अहै तराई मंडप जो बणान, अक्क तेरै ताई, अक्क मूसा ताई, अतै अक्क एलिय्याह ताई।" अपर पतरस ना जाणदा थू कि सो कै बल्लू करदा थू।

जैहणै पतरस गल करू करदा थू, ता अक्क चमकदार बदळ थल्लै इचिकरी तिन्या पुर छाई गो। फिरी तिन्यै बदळा थऊँ अक्क अवाज जो हुणु। तिनी बल्लू, "एह मेरा पुत्र हा जैस सितै अऊँ प्रेम करन्दा हा। अऊँ तैस थऊँ खुश हा। तसेरी हुणा।" सो त्रो चेलै डरी गै अतै जमीना पुर डेई गै।

तैहणै यीशुयै तिन्या जो छु अतै बल्लू, "डरा मत। उठी गच्छा।" जैहणै तिन्यै चोरुनी तरफ हेरू, ता जेड़ा भी तैठी थू सो केवल यीशु थू।

यीशु अतै सो त्रो चेलै तैस पाड़ा थऊँ वापस थल्लै उतरी आयै। तैहणै यीशुयै इन्या सितै बल्लू, "अजूं जेड़ा एठी भुआ ठेरी चर्चा कसी सितै ना करना। मुं तोळै ही मरी गाणा अतै फिरी जिन्दै भूची गाणा। तठेरै बाद, तुहै मणु जो दस्सी सकन्दै हिन् ।"