35. दयालु पिता री कहाणी

अक्क धैड़ै, यीशु तिन्या मतै मणु जो शिक्षा दिछु करदा थू जेड़ैतसेरी हुणनै ताई किठुरै थीयै। एह मणु चुंगी लैणै वाळै अतै सोगी होर मणु भी थीयै जिन्यै मूसा री व्यवस्था रा पालन करनै री कोशिश ना करी थी।

कुछ धार्मिक अगुवै हेरू कि यीशु इन्या मणु सितै अक्क मित्रा साईं गला करू करदा थू। ठेरैताई तिन्यै अक्की दूयै सितै एह बलना शुरू करी दित्ता कि सो गलत करू करदा थू। यीशुयै तिन्या जो गल्ला करन्दै हुणु, ठेरैताई तिनी तिन्या जो एह कहाणी हुणाई।

अक्क मणु थू जसेरै दोई पुत्र थीयै। हलकै पुत्रै अपणै पिता सितै बल्लू, 'हे पिता, मिंजो अजूं मेरा हिस्सा चेहिन्दा!' अतः पितै अपणै दोनों पुत्रा रै बीचा मंज अपणी सम्पत्ति रा बँटवारा करी दित्ता ।

तोंळै ही हल्का पुत्र अपणा सब कुछ कट्ठेरी करी दूर देशा जो चली गो अतै पापी जीवन जीणै मंज अपणै सारे धना जो बर्बाद करी दित्ता।

ठेरै बाद, जैठी हल्का पुत्र थू तैस देशा मंज अक्क भयंकर अकाल पेऊ, अतै तैस बलै अन्न खरीदणै ताई धन ना थू। ठेरैताई तैसियो जेड़ा काम मुळू सो सूअरा जो चारने रा थू। सो एतना दुःखी अतै भूखा थू कि सो सूअरा रा अन्न खाणा चाहन्दा थू।

आखिरकार, तिनी हलकै पुत्रै अप्पू सितै बल्लू, 'अऊँ कै करू करदा? मेरेै पितै रै सबी सेवका बलै खाणै ताई मता हा, फिरी भी अऊँ एठी भूखा मरू करदा। मुं अपणै पिता बलै वापस गाणा अतै अपणै पिता रा अक्क सेवक बणनै ताई तैस सितै विनती करला।'

अतः तिनी हलकै पुत्रै वापस अपणै पिता रै घरा जो चलू। जैहणै कि सो अल्ली दूर ही थू, तसेरै पितै तैसियो हेरू अतै तैस पुर तरस खऊ। सो दौड़ी करी अपणै पुत्रा बलै गो अतै तैसियो गळै लाई करी चुमू।

तनी पुत्रै बल्लू, 'हे पिता, मेंई प्रमात्मै रै अतै तेरै वरुद्ध पाप करू हा। अऊँ तेरा पुत्र कहलाणै रै लायक भी निया।'

अपर पितै अपणै अक्की सेवका सितै बल्लू, 'तोळै गिचिकरी सबी थऊँ खरै ओडण लेइकरी अईया अतै मेरै पुत्रा जो पैनाह! तसेरी उंगळी मंज गूठीं अतै तसेरै पैरों मंज जूट्टै पोया। फिरी सबी थऊँ खरा बकरा बडा ताकि अहै खान अतै उत्सव मनान, क्योकि मेरा पुत्र मरी गछुरा थू, अपर अबै सो जिन्दा हा! सो गोआची गछुरा थू, अपर अबै अहै तैसियो पाई लेऊ हा!'

ठेरैताई मणुयै उत्सव मनाणा शुरू करू। कुछ टैम बीतणै पुर, मोट्टा पुत्र बगड़ी मंज काम करीके घरा जो आ। तिनी गाणै अतै नाच री अवाज हुणी अतै हेरान भुआ कि यह कै भुछु करदा थू।

जैहणै मोट्टै पुत्रा जो पता लगा कि सो ठेरैताई उत्सव मनाऊ करदै थीयै क्योकि तसेरा भाई घरै चली छुरा थू, ता सो बड़ा जळू अतै घरा मंज अंदर ना आ । तसेरै पितै बाहर इचिकरी तैसीयो उत्सव मनाणै रा निवेदन करू, अपर तिनी मना करी दित्ता ।

तिनी मोट्टै पुत्रै अपणै पिता सितै बल्लू, 'इन्या सबी' साला मंज मेई तेरै ताई इमानदारी सितै काम करू! कदी भी तेरी गल्ला जो ना टाळू, अपर तेई कदी भी मिंजो हल्की बकरी भी ना दित्ती ताकि अऊँ अपणै मित्रा सोगी दावत करी सकूँ। अपर तेरै पुत्रै तेरै धन जो पापी कम्मा करनै मंज बर्बाद करी दित्ता हा। अतै अबै जैहणै सो आ ता तसेरै ताई उत्सव मनाणै ताई तेई सबी थऊबदिया बकरै जो मारी दित्ता !'

पितै जवाब दित्ता, 'हे मेरै पुत्र, तू हमेशा मिंजो सोगी हा, अतै जो कुछ मेरा हा सो सब तेरा हा। अपर इन्दै ताई उत्सव मनाणा सही हा क्योकि तेरा भाई मरी गछुरा थू, अपर अबै सो जिन्दा हा। सो गोआची गछुरा थू, अपर अबै अहै तैसियो पाई लेऊ हा!'