34. यीशु दूई कहाणी री शिक्षा दिंदा हा

यीशुयै प्रमात्मै रै राज्य रै बारै मंज होर बड़ी कहाणी हुणाई। उदाहरण ताई, तिनी बल्लू, "प्रमात्मै रा राज्य अक्क राई रै बीया साईं हा जैसियो कसीयै अपणी बगड़ी मंज बाई दित्ता। तुहै जाणदै हिन् कि राई रा बी सबी बीया मंज सबी थऊँ हल्का भुन्दा हा।"

अपर जैहणै राई रा बी बदी गन्दा हा ता सो बगीचै रै सबी रुखा मंज सबी थऊँ बडा भूची गन्दा हा, एतना बडा कि पखेरू इचिकरी तसेरी डाळी पूर राम करन्दै हिन्।

यीशुयै अक्क होर कहाणी हुणाई, "प्रमात्मै रा राज्य खमीर साईं हा जैसियो लेईकरी अक्क जनानी पिठै रै पेड़ै मंज मलाई दिन्दी हा तैहणै सो सबी पेड़ै मंज फैली गन्दा हा।"

स्वर्गा रा राज्य तैस खजानै साईं हा जैसियो कसीयै बगड़ी मंज दब्बी दित्ता। कसी होर मणु जो सो खजाना मुळी गो अतै तिनी तैसियो पाणै री बड़ी चाह करी। ठेरैताई तिनी तैतियो फिरी दब्बी दित्ता। सो ख़ुशी सितै एतना भरूरा थू कि तिनी गिचिकरी अपणा सब कुछ बेची दित्ता ताकि सो तैसा बगड़ी जो खरीदी सका जैठी सो खजाना थू।

स्वर्गा रा राज्य अक्क बड़ै कीमती शुद्ध मोती रै साईं भी हा। जैहणै कोई मोति रा व्यापारी तैतियो पाई लैन्दा हा ता सो तैतियो खरीदणै ताई अपणा सब कुछ बेची दिंदा हा।

तैठी कुछ मणु थीयै जेड़ै सोचन्दै थीयै कि प्रमात्मै तिन्या जो ठेरैताई स्वीकार करना क्योकि सो भलै काम करू करदैं हिन्। ऐह मणु इनै मणु जो तुच्छ मंदै थीयै जेड़ै तिन्या भलै कम्मा जो ना करदैं थीयै। ठेरैताई यीशुयै तिन्या जो एह कहाणी हुणाई "दोई मड़द थीयै अतै दोनो ही प्रार्थना करनै ताई मंदरा मंज गै। तिन्या मंज अक्क चुंगी लैणै वाळा थू, अतै दूआ अक्क धार्मिक अगुवा थू।"

तिनी धार्मिक अगुवै एस प्रकार प्रार्थना करी, 'हे प्रमात्मा, तेरा धन्यवाद भोआ कि अऊँ होरी मणु साईं – जिंया कि डाकू, अन्यायी मणु, व्यभिचारी, या एठीया तक कि एठी मोजूद ओस चुंगी लैणै वाळै साईं अक्क पापी निया।'

उदाहरण ताई, अऊँ हर हप्तै मंज दोई बरी उपवास रखन्दा हा, अतै अऊँ मिंजो मुळनै वाळै धन अतै समान रा दसवाँ हिस्सा तीजो दिंदा हा।

अपर सो चुंगी लैणै वाळा तैस धार्मिक अगुवै थऊँ बड़ी दूर खड़ी गो। तिनी ऊपर स्वर्गा री तरफ हाख्री भी ना चुकी। ठेरै बजाए, तिनी अपणी मुट्ठी सितै अपणी हिक्का जो जक्कू अतै प्रार्थना करी, 'हे प्रमात्मा, कृपा करीके मिंजो पुर दया कर क्योकि अऊँ अक्क पापी हा।'

फिरी यीशुयै बल्लू, "अऊँ तुसू सितै सच बलंदा हा, प्रमात्मै तैस चुंगी लैणै वाळै री प्रार्थना जो हुणु अतै तैसियो धर्मी घोषित करू। अपर तिनी तैस धार्मिक अगुवै री प्रार्थना जो पसंद ना करू। प्रमात्मा हर अक्क घमंडी रै हैरा जो नीचा करना, अपर सो हर तैस जन जो आदर दिणा जेड़ा अप्पू जो नम्र करन्दा हा।"