33. अक्क किसान री कहाणी

अक्क धैड़ा, यीशु झीला रै कनारै रै नेड़ै थू। सो मणु री अक्क बड़ी बड्डी भीड़ा जो शिक्षा दिछु करदा थू। तैसियो हुणनै ताई ऐतनै सारै मणु आयै कि यीशु बलै तिन्या सबी सितै गल करनै ताई जगह ना थी । ठेरैताई सो पाणी मंज खड़ुरी किस्ती पुर चढ़ी गो। तैठी सो बैही गो अतै मणु जो शिक्षा दित्ती।

यीशुयै तिन्या जो एह कहाणी हुणाई, "अक्क किसान बी बाणै ताई बाहर निकळू। जैहणै सो हथा सितै बीया जो बखेरू करदा थू ता कुछ बी बत्ता मंज पै। अपर पखेरुयै इचिकरी तिन्या सबी बिया जो खाई लेऊ ।"

दूयै बी पथरीली जमीना पुर पै जैठी बड़ी घट चिक थी। पथरीली भूमि पुर पै बीज बड़ी तोंळी जमी पै, अपर तयांरी जड़ा जमीना मंज गहराई मंज गाणै रै काबल ना थीं। जैहणै सूरज नकेऊ अतै गर्मी भुई ता सो बूट मुरझाई गै अतै मरी गै।

ताभी दूयै बी झाड़ी रै बीचा मंज पै। तिन्यै बीयै बढ़ना शुरू करू, अपर कन्डै तिन्या जो दबी दिता। ठेरैताई कन्डैदार जमीना पुर पेऊरैबिया रै बूटा थऊँ कोई भी फळ ना दी सकू ।

दूयै बी खरी जमीना पुर पै। सो बी बढ़ै अतै जैतणै बी बायै थीयै तिन्यै 30, 60, अतै ऐड़ीया तिकर कि 100 गुणा अनाज पैदा करू। जो कोई भी प्रमात्मै रै प्चुं चलना चाहन्दा हा, सो एसा गल्ला पुर ध्यान देया जेड़ी अऊँ बल्लू करदा हा!

ऐसा कहाणीयै चेलै जो उलझन मंज पाई दित्ता। ठेरैताई यीशुयै व्याख्या करी, "सो बी प्रमात्मै रा वचन हा। सो रस्ता अक्क ऐसा मणु हा जेड़ा प्रमात्मै रै वचना जो हूँणदा हा, अपर तैसियो समझन्दा निया। तैहणै शैतान तैस थऊँ वचना जो चोरी लेई गन्दा हा। मतलब शैतान तैस वचना जो समझणै थऊँ दूर रखन्दा हा।"

सो पथरीली भूमि ऐसा मणु हा जेड़ा प्रमात्मै रै वचना जो हुणदा हा अतै ख़ुशी सोगी तैसियो अपनाई लैंदा। अपर जैहणै मुश्कल टैम इन्दा हा, या जैहणै होर मणु तैसियो सतान्दै हिन्, ता सो प्रमात्मै थऊँ दूर चली गन्दा हा। मतलब सो प्रमात्मै पुर भरोसा करना बंद करी दिंदा हा।

सो कन्डैदार जमीन ऐसा मणु हा जेड़ा प्रमात्मै रै वचना जो हुणदा हा। अपर सो बड़ी सारी गल्ला रै बारै मंज चिन्ता करना शुरू करी दिंदा हा, अतै सो मता धन कमाणै रा जोर लंदा हा, अतै सो मती जिनी चीजा जो पाणै रा कोशिश करन्दा हा । कुछ टैमा बाद, अबै सो प्रमात्मै जो प्रेम करनै मंज काबल निया । ठेरैताई जेड़ा तिनी प्रमात्मै रै वचना थऊँ सीखू थू सो तैसियो प्रमात्मै जो खुश करनै मंज काबल ना करदा। सो कणका री टठंळा साईं हा जेड़ी कोई अनाज पैदा ना करदी हिन्।

अपर खरी जमीन सो मणु हिन् जेड़ै प्रमात्मै रै वचना जो हूँणदा हा, तैस पुर विश्वास करन्दा हा, अतै फल पैदा करन्दा हा।