32. यीशु दुष्टात्मा सितै ग्रस्त मणु जो अतै अक्की बमार जनानी जो चंगा करदा हा

यीशु अतै तसेरै चेलै अपणी किस्ती मंज तैस क्षेत्र जो गै जैठी गिरासेनी मणु रहन्दै थीयै। औ तैस क्षेत्र मंज पूजी करी किस्ती थऊँ उतरी गै।

तैठी अक्क मणु थू जेड़ा दुष्टात्मा सितै ग्रस्त थू।

एह मणु ऐतना ताकतवर थू कि कोई भी तैसियो काबू ना करी सकदा थू। कई बरी मणुयै तसेरै हथू अतै पैरा जो जंजीरा सितै भी बन्नू, अपर सो तिन्या जो तोड़ी दिंदा थू।

सो मणु तैस क्षेत्रा मंज कब्रा मंज रैहन्दा थू। एह मणु पूरा धैड़ा अतै पूरी रात बकन्दा थू। सो ओडणा ना लंदा थू अतै अक्सर अप्पू जो नड़ा सितै घायल करंदा थू।

सो मणु दौड़ी करी यीशु बलै आ अतै तसेरै सामणै घुटनै टेकी दित्तै। तैहणै यीशुयै तैस मणु रै अन्दरा री दुष्टात्मा सितै गल करी अतै बल्लू, "एस मणु मंज थऊँ बाहर निकळी आई!"

सो दुष्टात्मा ऊची वाज मंज बकी, "हे यीशु, परम प्रधान प्रमात्मै रै पुत्र, तेरा मिंजो सितै कै कम? कृपा करीके मिंजो मत सता!" तैहणै यीशुयै तैसा दुष्टात्मा थऊँ पुछु, "तेरा नां कै हा?" तैहै जवाब दित्ता, "मेरा नां सेना हा, क्योकि अहै मती हिन्।" (रोमी सेना मंज कई हजार सपाई रा अक्क झुण्ड अक्क "सेना" भुन्दी थी।)

तिन्यै दुष्टात्मै यीशु सितै विनती करी, "कृपा करीके असियो एसा जगहा थऊँ बाहर मत भैज!" तैठी नेड़ै रै पाड़ा पुर सूअरा रा अक्क झुंड चुगु करदा थू। ठेरैताई तिन्यै दुष्टात्मै यीशु सितै विनती करी, "कृपा करीके असुओ इन्या सूअरा मंज भैजी दे!" यीशुयै बल्लू, "ठीक हा, तिन्या मंज चली गच्छा!"

अतः सो दुष्टात्मा तैस मणु मंज थऊँ नकेई करी तिन्या सूअरा मंज चली गेई। सो सूअर दौड़ी करी अक्की खड़ै टीलै थऊँ झीला मंज कूदी गै अतै डूबी मरै। तैस झुंडा मंज लगभग 2,000 सूअर थीयै।

तैठी तिन्या सूअरों री देखभाल करनै वाळै मणु थीयै। जेड़ा कुछ भुआ थू जैहणै तिन्यै हेरू ता सो नगरा मंज नही गै। यीशुयै जेड़ा करू थू तैठी तिन्यै सबी जो दस्सू। तैस नगर रै मणु निकळी आयै अतै तैस मणु जो हेरू जैस मंज दुष्टात्मा थी। सो शान्ति सितै, ओडणा लऊरै, अतै अक्क साधारण मणु री तरह व्यवहार करन्दै बैहुरा थू।

सो मणु बड़ै डरुरै थीयै अतै तिन्यै यीशु सितजो गाणै ताई बल्लू। अतः यीशु किस्ती पुर चढ़ी गो। सो मणु जैस मंज दुष्टात्मा थी तिनी यीशु सोगी गाणै री विनती करी ।

अपर यीशुयै तैस सितै बल्लू, "ना। अऊँ चाहन्दा हा कि तू घरै गिचिकरी सबी जो दस्सा कि प्रमात्मै तेरै ताई कै करू हा। तिन्या जो दस कि किन्या प्रमात्मै तीजो पुर दया करी थी।"

ठेरैताई सो मणु चली गो अतै सबी जो ठेरै बारै मंज दस्सू जेड़ा यीशुयै तैस ताई करू थू। तसेरी कहाणी जो हुणनै वाळा हर अक्क जन हेरान भूआ थू।

यीशु झीला री दूई कनारी फिरी आ। तसेरै तैठी पूजणै बाद, अक्क बड़ी भीड़ तसेरै अखै-ब्र्खै किठठी भुई अतै तैसियो दबाणा लगी। तैसा भीड़ा मंज अक्क जनानी थी जेड़ी बारह साला थऊँ खून नकैणै री समस्या थऊँ पीड़ित थी। तैहै अपणा पूरा धन डाक्टरा जो दी दितुरा थू ताकि सो तैसाओ ठीक करी सकन, अपर तसारा रोग होर भी बिगड़ी गछुरा थू।

तैह हुणु थू कि यीशुयै कई बमार मणु जो ठीक करूरा थू अतै तैहै सोचु, "अऊँ जाणदी हा कि यीशु रै ओडणा जो ही छूई लैली, ता मुं भी ठीक भूची गाणा!" ठेरैताई सो यीशु रै पचुआं थऊँ आई अतै तसेरै ओडणा जो छूई लेऊ। जिंया ही तैहै तैसियो छु, खुना रा चलना बंद भूची गो।

अकदम ही, यीशुयै जाणी लेऊ कि तैस थऊँ सामर्थ निकळी हा। ठेरैताई तिनी प्चुं मुड़ी करी पुछु, "मिंजो कुणी छु आ?" चेलै जवाब दित्ता, "एठी ऐतनै सारै मणुयै तेरै चोरूनी कनारी भीड़ लगऊरी हा, अतै तीजो सितै हचणा लगुरै हिन्। ता तेई क्यो पूछु कि मिंजो कुणी छुउ आ ?"

सो जनानी यीशु रै सामणै कमदी भुई अतै बड़ी डरूरी अपणै घुटनै पुर बैही गेई। तैहणै तैहै तैसियो दस्सू कि तैहै कै करू हा, अतै एह भी कि सो ठीक भूची गेई हा। यीशुयै तैसा सितै बल्लू, "तेरै विश्वासै ही तीजो चंगा करू हा। शान्ति सितै चली गा।"