31. यीशु पाणी पुर चलन्दा हा

पाँज हजार मणु जो खुआणै थऊँ बाद, यीशुयै अपणै चेलै सितै किस्ती मंज गाणै ताई बल्लू। तिनी तिन्या जो झीला रै दूई कनारी चली गाणै ताई बल्लू जबकि सो थोड़ै टैमा ताई वहीं ठैहरी गो। अतः चेलै चली गै अतै यीशुयै भीड़ा जो विदा करू कि सो अपणै घरा जो गान। ठेरै बाद, यीशु प्रार्थना करनै ताई अक्की पाड़ा पुर चली गो। तैठी सो अकेला थू, अतै तिनी देर राती तिकर प्रार्थना करी।

तैस टैमै, चेलै अपणी किस्ती जो चलन्दै चलूरै थीयै, अपर हवा तयांरी तरफ जोरा सितै लगुरी थी। बड़ी रात भूची गछुरी थी पर सो अल्ली झिला रै मंजै ही पुज्जै थीयै।

तैस टैमै यीशुयै प्रार्थना करनी खत्म करी अतै अपणै चेलै बलै वापस चलू। सो किस्ती री कनारी गाणै ताई पाणी रै ऊपर चलना लगा।

तैहणै चेलै तैसियो हेरू। सो बड़ै डरी गै क्योकि तिन्यै सोचु थू कि सो कोई भूत हा। यीशु जाणदा थू कि सो डरी गै थीयै, ठेरैताई तिनी तिन्या जो आक पाई करी बल्लू, "डरा मत, एह अऊँ हा!"

तैहणै पतरसै यीशु सितै बल्लू, "हे प्रभु, जे एह तू हा ता मिंजो पाणी पुर चली करी तीजो बलै ईणै रा हुक्म दे।" यीशुयै पतरस सितै बल्लू, "अई!"

अतः पतरस किस्ती थऊँ उतरी गो अतै यीशु बलै गाणै ताई पाणी रै ऊपर रै चलना शुरू करू । अपर थोड़ी दूर गिचिकरी, तिनी अपणी हाख्री जो यीशु थऊँ फेरी लेऊ अतै लैहरा जो हेरना अतै तेज हवा जो महसूस करना शुरू करी दित्ता।

तैहणै पतरस डरी गो अतै पाणी मंज डूबणा लगा। सो चिल्लाऊ, "हे प्रभु, मिंजो बचा!" यीशुयै तैस टैमै हाथ बढ़ाई करी तैसियो पकड़ी लेऊ। तैहणै तिनी पतरस सितै बल्लू, "तेरा विश्वास बड़ा कम हा! तीजो ठीक रखणै ताई तेई मिंजो पुर भरोसा क्यो ना करू ?"

तैहणै यीशु अतैै पतरस किस्ती पुर चढ़ी गै, अतै तुरन्त हवा रा चलना बंद भूची गो। पाणी शान्त भूची गो। चेलै हेरान भूची करी यीशु रै अगै घुटनै टेकी दित्तै। तिन्यै तसेरी आराधना करी अतै तैस सितै बल्लू, "सचमुच तू प्रमात्मै रा पुत्र हा।"