30. यीशु पाँज हजार मणु जो खाणा खुअन्दा हा

यीशुयै अपणै प्रेरिता जो प्रचार करनै अतै मणु जो शिक्षा दिणै ताई मतै लग-लग ग्रां मंज भैज्जै। जैहणै सो तैठीया जो फिरै जैठी यीशु थू ता तिन्यै तैसियो दस्सू कि तिन्यै कै करू थू। तैहणै यीशुयै तिन्या जो झीला रै दुई तरफ तैस सोगी अक्की शान्त जगह पुर गिचिकरी कुछ टैम अराम करनै ताई आमंत्रित करू। अतः सो अक्की किस्ती पुर चढ़ी गै अतै झीला रै दूई कनारी चली गै।

अपर तैड़ी मतै मणु थीयै जिन्यै यीशु अतै चेलै जो किस्ती पुर गान्दै हेरू। ए मणु तिन्या थऊँ अगुं झीला रै दूई कनारी गाणै ताई झीला रै कनारै-कनारै पुर नहै। अतः जैहणै यीशु अतै चेलै पुज्जै ता मणु रा अक्क बड्डा झुण्ड तयांरी भाळ करन्दा तैठी पैहलै तैठी थू।

तैसा भीड़ा मज जनानी अतै बच्चै री गिणती रै बिना 5,000 थऊँ ज्यादा मड़द थीयै। यीशुयै तिन्या मणु पुर बड़ा तरस खाऊ। यीशु बलै सो मणु बिना पाअला री भैड़ा साईं थीयै। ठेरैताई तिनी तिन्या जो शिक्षा दित्ती अतै तयांरै बीचा मंज जेड़ै मणु बमार थीयै तिन्या जो चंगा करू ।

धैड़ै रै अंत मंज, चेलै यीशु सितै बल्लू, "अबै देर भूची गेई हा अतै अखै-ब्र्खै कोई नगर निया। इन्या मणु जो विदा कर ताकि सो गिचिकरी खाणै ताई कुछ लेई।"

अपर यीशुयै चेलै सितै बल्लू, "तुहै तिन्या जो खाणै ताई कुछ देया!" तिन्यै जवाब दित्ता, "अहै ऐसा किन्या करी सकन्दै हिन्? असू बलै केवल पाँज रोटी अतै दोई हल्की मछलि हिन्।"

यीशुयै अपणै चेलै सितै बल्लू कि सो भीड़ा रै मणु जो घा पुर पजांह- पजांह रै झुंडा मंज बैहणै ताई बल्ला।

तैहणै यीशुयै पाँज रोटी अतै दोई मछलि जो लेईकरी स्वर्गा री कनारी हेरू, अतै तैस खाणै ताई प्रमात्मै जो धन्यवाद दित्ता।

फिरी यीशुयै रोटी अतै मछलि जो टुकड़ै मंज तोड़ू। तिनी मणु जो दिणै ताई अपणै चेलै जो सो टुकड़ै दी दित्तै। चेलै तैस खाणै जो बडंदै रैह, अतै सो कदी खत्म ना भुआ! सो सब मणु खाईकरी रजी गै।

तठेरै बाद, चेलै तैस अन्न जो कठेरु जैसियो खाया ना गो थू अतै सो बारह टोकरी जो भरनै ताई मोजूद थू! सो सारा अन्न तिन्या पाँज रोटी अतै दोई मछलि थऊँ छुरा थू ।