29. निर्दयी दासा री कहाणी

अक्क धैड़ै, पतरसै यीशु थऊँ पुछु, "हे स्वामी, मिंजो अपणै भाई जो कतनी बरी माफ़ करना चेहिन्दा जैहणै सो मेरै वरुद्ध पाप करन्दा हा? कै सात बरी तक?" यीशुयै बल्लू, "सात बरी ना, अपर सात री सत्तर बरी!" ठेरै द्वारा, यीशु रा मतलब हा कि असियो हमेशा माफ़ करना चेहिन्दा। तैहणै यीशुयै एह कहाणी हुणाई।

यीशुयै बल्लू, "प्रमात्मै रा राज्य अक्क राजा रै समान हा जो अपणै दासा थऊँ लेखा लैणा चाहन्दा थू। तसेरा अक्क दास 2,00,000 साला री मजदूरी रै अक्की बड़ै कर्जै रा कर्जदार थू।"

अपर सो दास अपणै कर्ज जो चुकाई ना पाऊ, ठेरैताई राजै बल्लू, "सेरा कर्ज चुकाणै ताई एस मड़दा जो अतै सेरै टबरा जो दासा रै रूपा मंज बेचीं देया ।"

तिनी दासै राजै रै सामणै अपणै घुटनै पुर पेई करी बल्लू, 'कृपा करीके मिंजो सोगी धीरज धर, अतै अऊँ अपणै कर्ज री पूरी रकम रा भुगतान करी दिल्ला।' राजै दासा पुर दया करी, ठेरैताई तिनी तसेरै पुरै कर्ज जो माफ करी दित्ता अतै तैसियो गाणा दित्ता।

अपर जैहणै सो दास राजै थऊँ बाहर गो, ता तैसियो तसेरा अक्क साथी दास मुळू जेड़ा तसेरी चों महीनै री मजदूरी रा कर्जदार थू। तिनी दासै अपणै साथी दास जो पकड़ी लेऊ अतै बल्लू, 'जेड़ा तेरै ऊपर मेरा कर्ज हा मिंजो तैतियो दे !

तिनी दासै घुटनै पुर पेई करी बल्लू, 'कृपा करीके मिंजो सोगी धीरज धर, अतै अऊँ अपणै कर्ज री पूरी रकम रा भुगतान करी दिल्ला।' अपर ठेरै बजाए, तिनी दासै अपणै साथी दास जो जेलखानै मंज पाई दित्ता जैहणै तक कि सो तैस कर्ज रा भुगतान ना करी देया ।

जेड़ा कुछ भूआ थू ततियो कुछ होरी दासै हेरू अतै सो बड़ै परेशान भूयै। सो राजै बलै गै अतै तैसियो सब कुछ दस्सू ।

राजै तैस दासा जो हद्दी करी बल्लू, 'हे दुष्ट दास! मैंई तेरै कर्ज जो ठेरैताई माफ़ करू थू क्योकि तेई मुझसे विनती करी थी। तीजो भी तिन्या ही करना चेहिन्दा थू।' राजा इतना जळू थू कि तिनी तैस दुष्ट दासा जो जेलखानै मंज पाई दित्ता जैहणै तिकर कि सो अपणै पुरै कर्ज रा भुगतान ना करी देया।

तैहणै यीशुयै बल्लू, "मेरा स्वर्गा मंज विराजमान पिता तुसू मंज हर अक्की सोगी ऐही करना जे तुहै अपणै भाई जो अपने दिला थऊँ माफ़ ना करदैं।"