28. अमीर जोआन शासक

अक्क धैड़ै, अक्क अमीर जोआन शासकै यीशु बलै इचिकरी तैस थऊँ पुछु, "हे उत्तम गुरु, अनन्त जीवन पाणै ताई मिंजो कै करना चेहिन्दा?" यीशुयै तैस सित बल्लू, "तू मिंजो 'उत्तम' क्यो बलदा हा? केवल अक्क ही उत्तम हा अतै सो प्रमात्मा हा। अपर जे तू अनन्त जीवन पाणा चाहन्दा ता प्रमात्मै री व्यवस्था रा पालन कर।"

मिंजो कसा-कसा आज्ञा रा पालन करनै री जरूरत हा? तिनी पुछु। यीशुयै जवाब दित्ता, "हत्या ना करना। व्यभिचार ना करना। चोरी ना करना। झूठ ना बलना। अपणै पिता अतै माता रा आदर करना, अतै अपणै पड़ोसी सितै अपणै समान प्रेम करना।"

अपर तिनी जोआन मड़दै बल्लू, "अऊँ बचपना थऊँ ही इन्या गल्ला जो करदा हा । मिंजो सदा ताई जिन्दै रैहणै ताई अबै कै करनै री जरूरत हा ?" यीशुयै तैस जो ह्रेरू अतै तैस सितै प्रेम करू ।

यीशुयै जवाब दित्ता, "जे तू सिद्ध भूणा चाहन्दा हा ता गिचिकरी अपणा सब कुछ बेची दे अतै सो धन गरीबा मंज बंडी दे, अतै तीजो स्वर्गा मंज धन मुळना। तैहणै इचिकरी मिंजो पीचै चल ।"

जेड़ा यीशुयै बल्लू तिनी जोआन मड़दै हुणु ता सो बड़ा उदास भूची गो, क्योकि सो बड़ा अमीर थू अतै तिनी अपणी पुरी सम्पत्ति जो ना दिणा चाहन्दा थू। सो मुड़ी करी यीशु रै नैड़ै थऊँ चली गो।

तैहणै यीशुयै अपणै चेलै सितै बल्लू, "प्रमात्मै रै राज्य मंज अमीर मणु रा प्रवेश करना बड़ा कठण हा! हाँ, अक्की अमीर मड़दा रा प्रमात्मै रै राज्य मंज गाणै री तुलना मंज कसी ऊँटा रा सूई रै नाकै मितै भुचिकरी निकळी गाणा असान हा।"

जेड़ा यीशुयै बल्लू जैड़ा चेलै हुणु ता सो हेरान भूची गै। तिन्यै बल्लू, "जे एह ऐसा हा ता प्रमात्मै कसियो बचाणा?"

यीशुयै चेलै री कनारी हेरू अतै बल्लू, "मणु ताई अपणा उद्धार करना असम्भव हा। अपर प्रमात्मै ताई कुछ भी करना असम्भव निया।"

पतरसै यीशु सितै बल्लू, "अहै चेलै अपना सब कुछ छड्डी करी तेरै पचुं चलूरै हिन्। ता इन्दा इनाम कै भुणा ?"

यीशुयै जवाब दित्ता, "हर अक्क जन जिनी मेरै कारण घर, भाई, बहन, पिता, माता, बच्चे, या सम्पत्ति जो छडूरा हा, सो तैस थऊँ 100 गुणा ज्यादा हासल करना अतै अनन्त जीवन जो भी पाणा। अप्पर मतै जेड़ै पैहलै हिन् तिन्या प्चुं भूणा, अतै मतै जेड़ै पिछलै हिन् तिन्या पैहलै भूणा।"