27. दयालु सामरी री कहाणी

अक्क धैड़ै, यहूदी व्यवस्था रा अक्क विशेषज्ञ यीशु बलै आ। सो सबी जो एह दसनणा चाहन्दा थू कि यीशु गलत रीति सितै शिक्षा दिछु करदा हा । ठेरैताई तिनी बल्लू, "हे गुरु, अनन्त जीवन पाणै ताई कै करूँ?" यीशुयै जवाब दित्ता, "प्रमात्मै री व्यवस्था मंज कै लिखुरा हा?"

तिनी मणुयै बल्लू, "सो बल्दी हा कि अपणै प्रमात्मै सितै अपणै सारै मन, प्राण, सामर्थ, अतै बुद्धि सितै प्रेम रख। अतै अपणै पड़ोसी सितै अपणै समान प्रेम रख।" यीशुयै जवाब दित्ता, "तू एकदम सही हा! जे तू ऐसा करा, ता तीजो अनन्त जीवन हासल भूणा।"

अपर सो व्यवस्था रा विशेषज्ञ मणु जो दसणा चाहन्दा थू कि तसेरा जीवन जीणै रा तरीका सही थू। ठेरैताई तिनी यीशु थऊँ पुछु, "ठीक हा, ता मेरा पड़ोसी कुण हा?"

यीशुयै तैसा व्यवस्था रै विशेषज्ञ जो अक्क कहाणीदिता द्वारा जवाब दिया। "अक्क यहूदी मणु थू जेड़ा अक्की सड़क मितै चलुरा यरूशलेम थऊँ यरीहो री यात्रा करू करदा थू|"

अपर कुछ डाकुयै तैसियो हेरू अतै तैस पुर हमला करी दित्ता। तिन्यै तसेरा सब कुछ लेई लेऊ अतै तैसियो लगभग मरनै तक मारू-जक्कू। तैहणै सो चली गै।

तठेरैअक्क तुरन्त बाद, एक यहूदी याजक तैसा ही सड़क मितै गुजरु। तिनी याजकै तैस मणु जो सड़का पुर पेऊरै हेरू। जैहणै तिनी तैसियो हेरू ता सो सड़का री दूई तरफ गिचिकरी अगुं बदी गो। तिनी तैस मणु जो पूरी तरह थऊँ अणहेरा करी दित्ता ।

ठेरै बाद कुछ ही टैम बीतणै पुर, अक्क लेवी तैसा सड़का पुर आ। (लेवी यहूदि रा एक गोत्र थू जिन्यै मंदरा मंज याजका री मदद करी थी।) सो लेवी भी सड़का री दुई तरफा थऊँ निकळी गो। तिनी भी तैस मणु जो अणहेरा करी दित्ता।

अगला जन जेड़ा तैसा सड़का पुर आ सो सामरिया रा अक्क मड़द थू। (सामरी अतै यहूदी अक्की दूयै सितै नफरत करन्दै थीयै।) तिनी सामरीयै सड़का पुर तैस मणु जो हेरू। तिनी हेरू कि सो यहूदी थू, अपर फिरी भी तिनी तैस पुर बड़ा तरस खाऊ। अतः सो तैस बलै गो अतै तसेरै जखमा पुर पट्टि बन्नी।

फिरी तिनी सामरीयै तैस मणु जो अपणै गधै पुर बहालू अतै तैसियो अक्की सराय मंज लेई गो। जैठी तिनी तसेरी देखभाळ करना जारी रखु।

अगले धैड़ै, तैस सामरी जो अपणी यात्रा जो गाणा थू। तिनी तैसा सराय रै प्रभारी मणु जो कुछ धन दित्ता। तिनी तैस सोगी बल्लू, "इस मणु री देखभाळ करैं। जे इंया पैहै रै अलावा तेरा कुछ और पैहा खर्च भोआ ता फिरी ईणै पुर मुं तेरै तिन्या खर्चै रा भुगतान करी दिल्ला ।"

फिरी यीशुयै तैसा व्यवस्था रै विशेषज्ञ थऊँ पुछु, "तुहै कै सोचदै हिन्? इन्या त्रीं मणु मंज कुण तैस मणु रा पड़ोसी हा जैसियो लूटु अतै जक्कू थू?" तिनी जवाब दित्ता, "सो ही जिनी तैसपुर दया करी।" यीशुै तैस सितै बल्लू, "तू गा अतै इन्या ही कर ।"