26. यीशु अपणी सेवा शुरू करन्दा हा

शैतान री परीक्षा रा इंकार करनै रै बाद, यीशु वापस गलील रै क्षेत्र मंज आ। एही सो जगह हा जैठी सो रैहन्दा थू। पवित्र आत्मा तैसियो बड़ी सामर्थ दिछु करदा थू, अतै यीशु अकी जगह थऊँ दुई जगह जो गो अतै मणु जो शिक्षा दित्ती। सभीयै तसेरै बारै मंज खरी गल्ला बल्ली।

यीशु नासरत नगर मंज गो। एह सो ग्रां हा जैठी सो अपणै बालकपन मंज रैहन्दा थू संदेशा री अक्क कताब दित्ती। सो चाहन्दै थीयै कि सो तैत थऊँ पढ़न। अतः यीशुयै तैसा कताबा जो खोली करी तसेरै अक्की भागा जो मणु ताई पढ़ू।

यीशुयै पढ़ू, "प्रमात्मै मिंजो अपना आत्मा दिता ताकि अऊँ कंगाला मंज सुसमाचार प्रचार करी सकूँ। तिनी मिंजो ठेरैताई भैज्जू हा कि कैदि जो अजाद करूँ, अंधै जो दृष्टि दिछुं, अतै तिन्या जो छुटकारा दिछुं जिंयाजो दूयै मणु कुचलु करदै हिन्। एह सो हो टैम हा जैहणै प्रमात्मा असू पुर कृपालु भूणा अतै इंदी मदद करनीया"

फिरी यीशु बैही गो। सब मणु तैसियो बड़ै ध्याना सितै हेरू करदै थीयै। सो जाणदै थीयै कि पवित्रशास्त्र रा जो भाग तिनी अली पढ़ू थू सो मसीह रै बारै मंज थू। यीशुयै बल्लू, "जेड़ी गल्ला मैंई अजूं तुन्दै ताई पढ़ी हिन्, सो एस टैमै घटू करदी हिन्।" सब मणु हरान थीयै। तिन्यै बल्लू, "कै एह यूसुफ रा पुत्र निया?"

तैहणै यीशुयै बल्लू, "एह सच हा कि मणु कसी ऐसै भविष्यद्वक्ता जो कदी स्वीकार ना करन्दै जेड़ा तयांरै नगर मंज पळूरा भोआ। एलिय्याह भविष्यद्वक्ता रै टैमा मंज, इस्राएल मंज मती विधवा थी। अपर जैहणै साढ़ै तराई साल तिकर बरखा ना भूई ता प्रमात्मै एलिय्याह जो इस्राएल मंज कसी विधवा री मदद करनै ताई ना भैज्जू। ठेरै बजाए, तिनी एलिय्याह जो कसी अन्य देशा री विधवा बलै भैज्जू।"

यीशुयै बलना जारी रखू, "अतै एलीशा भविष्यद्वक्ता रै टैमा मंज, इस्राएल मंज मतै मणु चमड़ी रै रोगा सितै पीड़ित थीयै। अपर एलीशै तिन्यामंज कसी जो भी ठीक ना करू । तिनी केवल इस्राएल रै दुशमणा रै सेनापति नामान जो ठीक करू।" अपर जेड़ै मणु यीशु जो हुणु करदै थीयै सो यहूदी थीयै। ठेरैताई जैहणै तिन्यै तैसियो एह बलदै हुणु ता सो तैस पुर गुस्सा भूयै।

नासरत रै मणुयै यीशु जो पकड़ी लेऊ अतै तैसियो आराधना री जगह थऊँ घसीटी करी बाहर लेई गै। सो तैसियो मारी दिणै ताई थल्लै फैकणै ताई अक्की चोटी पुर लेई गै। अपर यीशु भीड़ा थऊँ नकेई गो अतै नासरत नगर जो छडी करी चली गो।

फिरी यीशु सारै गलील रै क्षेत्रा मंज गो, अतै मोट्टी भीड़ तैस बलै आई। सो एसै मतै मणु जो लेईकरी आए जेड़ै बीमार अतै विकलांग थीयै। तिन्या मंज कुछ हेरी, चली, हुणी या बल्ली ना सकदै थीयै, अतै यीशुयै तिन्या जो ठीक करू ।

ठेरै अलावा, मतै इनै मणु यीशु बलै अन्दै जिंया मंज दुष्टात्मा थीं। यीशुयै दुष्टात्मा जो तिन्या थऊँ निकळी गाणै रा हुक्म दित्ता। सो दुष्टात्मा अक्सर चिल्लाईं, "तू प्रमात्मै रा पुत्र हा!" भीड़ा रै मणु हेरान थीयै, अतै तिन्यै प्रमात्मै री स्तुति करी।

फिरी यीशुयै बारह मड़दा जो चुणु जिंया जो तिनी अपणै प्रेरित बल्लू। तिन्यै प्रेरितै तैस सोगी यात्रा करी अतै तैस थऊँ शिक्षा हासल करी ।