6. प्रमात्मा इसहाक ताई प्रबंध करन्दा हा

जैहणै अब्राहम बड़ा बुड्डा भूची गो थू तैहणै तसेरा पुत्र, इसहाक, अक्क जोआन री उम्रा रा भूची गछुरा थू| ठेरैताई अब्राहमै अपणै अक्की सेवका जो अपणै पुत्र इसहाक ताई तैस देशा थऊँ अक्क लाड़ी लेईणै ताई भैज्जू जैठी तसेरै रिश्तेदार रैहन्दै थीयै|

जैठी अब्राहम रै रिश्तेदार रैहन्दै थीयै तैस देश जो गाणै री अक्क बड़ी लम्बी यात्रा रै बाद प्रमात्मै तैस सेवका रा साक्षात्कार रिबका थऊँ करवऊ| सो अब्राहम रै भाई री पोत्री थी|

रिबका अपणै टबरा जो छड्डी करी तैस सेवका सोगो फिरी गाणै जो मन्नी गेई| जिंया हो सो पुज्जै इसहाकै तैसा सितै वैह करी लेऊ|

अक्क लम्बै टैमा रै बाद, अब्राहम मारी गो| तैहणै प्रमात्मै अब्राहम रै पुत्र इसहाक जो, अब्राहम रै सोगी बनुरी वाचा री वजह थऊँ आशीष दित्ती| तैसा वाचा मंज प्रमात्मै री अक्क प्रतिज्ञा थी कि अब्राहम रै अणगिनत वंशज भूणै| पर इसहाक री लाड़ी रिबका बलै कोई संतान पैदा ना भूई|

इसहाकै रिबका ताई प्रार्थना करी, अतै प्रमात्मै तैसायो जुड़बा बच्चै रा गर्भ धारण करनै मंज काबल करू| जैस टैमै सो बच्चै रिबका रै गर्भ मंज ही थीयै सो अप्पू मंज घुळना लगै, ठेरैताई जेड़ा कुछ भुछु करदा थू रिबकै सो प्रमात्मै जो दस्सी दित्ता|

प्रमात्मै रिबका सोगो बल्लू, “तू दूँ पुत्रा जो जन्म दिली| तयांरै वंशज दोई लग-लग जाति बणनी| तिन्या अक्की दूयै सोगी घुळना| पर मोट्टै पुत्रा थऊँ पैदा भूणै वाळी जाति जो हलकै पुत्रा थऊँ ईणै वाळी जाति री आज्ञा मनणा पैणी हा|

जैहणै रिबका रै बच्चै रा जन्म भुआ, ता मोट्टा पुत्र लाल अतै रोएँदार थू, अतै तिन्यै तसेरा नां एसाव रखु| तैहणै हल्का पुत्र एसाव री खुरी जो पकुड़ूरा जम्मू, अतै तिन्यै तसेरा नां याकूब रखु|