7. प्रमात्मा याकूब जो आशीष दिंदा हा

जैहणै सो बच्चै बड्डै भूयै ता याकूब जो घरै रैहणा खरा लगु, पर एसाव जो जानवरा रा शकार करना भऊ| रिबकै याकूब सितै प्यार करू, पर इसहाकै एसाव सितै लगाव रखु|

अक्क धैड़ै, जैहणै एसाव शकार करीके फिरी आ ता सो बड़ा भूखा थू| एसावै याकूब सोगी बल्लू, “जेड़ा तेई पकाऊ हा तैत थऊँ थोड़ा खाणा मिंजो दे|” याकूबै जवाब दित्ता, “पैहलै मिंजो सोगी एह प्रतिज्ञा कर कि पहलौठा भूणै रै कारण थऊँ हर अक्क चीज जेड़ी तीजो मुळना चेईन्दी, सो सब तू मिंजो दिल्ला|” अत: एसावै तिन्या सबी चिजा जो याकूब जो दीणै री प्रतिज्ञा करी दिती| तैहणै याकूबै तैसियो कुछ खाणा दित्ता|

इसहाक एसाव जो आशीष दीणा चाहन्दा थू| पर ऐत थऊँ पैहलै कि तिनी एसा करू, रिबका अतै याकूबै याकूब रै एसाव भूणै जो डोंग करीके तैस सोगी धोखा करू| इसहाक बुड्डा थू अतै अबै हेरी ना पन्दा थू ठेरैताई याकूबै एसाव रै ओडण लायै अतै बकरी री खल्ला जो अपणै गळै अतै हथा मंज लपेटी लेऊ|

याकूब इसहाक बलै आ अतै बल्लू, "अऊँ एसाव हा| अऊँ ठेरैताई आ कि तू मिंजो आशीष दे|” जैहणै इसहाकै बकरी रै बाळा जो मसूस करू अतै ओडणा जो हिंगू, ता तिनी सोचु कि सो एसाव हा अतै तैसियो आशीष दिती|

एसावै याकूब थऊँ जळू क्योकि याकूबै तसेरै पैहलै पुत्रा रै अधिकार जो अतै सोगी ही तसेरी आशीषा जो भी चोरी लेऊ थू| अत: तिनी त्यांरै पिता रै मरनै थऊँ बाद याकूब जो मारी दीणै री सलाह बणाई|

अपर रिबकै एसाव री सलाई जो हुणी लेऊ| ठेरैताई तिनी अतै इसहाकै याकूब जो तसेरै रिश्तैदारा सोगी रैहणै ताई बड़ी दूर भैजी दित्ता|

याकूब कई साला तिकर रिबका रै रिश्तैदारा सोगी रेऊ| तैस टैमा रै दोरान तिनी बैह करू अतै बारा पुत्रा जो अतै अक्क पुत्री जो जन्मऊ| प्रमात्मै तैसियो बड़ा धनि बणाई दित्ता|

बिया साला तिकर कनान मंज अपणै घरा थऊँ दूर रैहणै रै बाद, याकूब अपणै टबरा, अपणै सेवका, अतै अपणै जानवरा रै सबी झुन्डा सोगी तैठी वापस फिरू|

याकूब ठेरैताई बड़ा डरुरा थू क्योकि तिनी सोचु कि एसाव अबै भी तैसियो मारना चाहंदा थू| ठेरै ताई तिनी उपहार सरूप जानवरा रै झुंडा जो एसाव बलै भैज्जू जेड़ा सेवक तिन्या झुंडा जो लेई करी गछुरै थीयै तिन्यै बल्लू, “तेरा दास याकूब, इन्या जानवरा जो तीजो दिंदा हा| सो झट ही इछु करदा हा|”

अपर एसाव अबै याकूब जो नुक्सान ना पूजाणा चाहन्दा थू| ठेरै बजाए, सो तैसियो अक्क बरी फिरी थऊँ हेरी करी बड़ा खुश थू| तैत थऊँ बाद याकूब कनान मंज शांति सितै रेऊ| फिरी इसहाक मारी गो अतै याकूब अतै एसावै तैसियो दफनऊ| वाचा री प्रतिज्ञा जो प्रमात्मै अब्राहम सितै करी थी सो अबै इसहाक थऊँ एसाव पुर चली आई थी|