9. प्रमात्मै मूसा जो हैददा हा

यूसुफ रै मरनै थऊँ बाद तसेरै सब रिश्तेदार मिस्र मंज बसी गै। सो अतै तयांरै वंशज कई साला तिकर मिस्र मंज ही रैह अतै तिन्यै मती ओलादी पैदा करी। सो इस्राएली कहलायै।

कई सौ साला रै बाद, इस्राएली री गिणती बड़ी बदी गेई थी। अतै मिस्री मणु अबै एसा गल्ला ताई अभारी ना थीयै कि तयांरी मदद करनै ताई यूसुफै बड़ा कुछ करू थू। सो इस्राएली थऊँ डरी गै क्योकि सो गिणती मंज तिन्या थऊँ बड़ै ज्यादा थीयै। ठेरैताई तैस टैमै मिस्र पुर शासन करनै वाळै फिरौनै इस्राएली जो मिस्री रा दास बणाई दित्ता।

मिस्रियै इस्राएली जो मती जिनी इमारता अतै एठीया तक कि कई नगरा जो बणाणै ताई मजबूर करू। तैस कठण मेहनतै तयांरै जीवना जो बड़ा दुःखदायी बणाई दित्ता, अपर प्रमात्मै तिन्या जो आशीष दित्ती अतै तिन्या बलै होर ज्यादा ओलादी पैदा भूई ।

फिरौनै हेरू कि इस्राएली बलै मती ओलादी पैदा भुछु करदी थी, ठेरैताई तिनी अपणै मणु जो इस्राएली रै सभी नर बच्चै जो नील नदी मंज फेंकी करी मारी दिणै रा हुक्म दित्ता।

अक्की इस्राएली जनानीयै अक्क नर बच्चै जो जन्म दित्ता। तैहै अतै तसारै लाड़ै जतूणा तिन्या थऊँ भूची सकू तैसै बच्च जो लुकाई करी रखु।

जैहणै तैस दब्बू रै माता-पिता तैसियो होर ज्यादा ना लुकाई सकै, ता तिन्यै तैसियो मारनै थऊँ बचाणै ताई अक्क तैरने वाली टोकरी मंज नील नदी रै कनारै पुर सरकंडै रै बीच रखी दित्ता। तसेरी मोट्टी बैहणीयै एह हेरनै ताई तसेरी निगरानी करी कि तैस सोगी कै भुल्ला।

फिरौन री कुळीयै तैसा टोकरी जो हेरी करी तठेरै अंदर झाँकू। जैहणै तिनी अक्की बच्चै जो हेरू ता तैहै तैसियो अपणा बच्चा बणाई लेऊ। तैहै अक्की इस्राएली जनानी जो तैसियो दूध पियाणै ताई कम्मा पुर रखी लेऊ, बिना एह जाणै कि सो तैस बच्चै री असली माता थी। जैहणै सो बच्चा एतना बड्डा भूची गो कि अबै तैसियो अपनी माता रै दूधा री जरूरत ना थी, ता तैहै फिरौन री कुळी बलै तैसियो फेरी दित्ता, तसेरा नाँ मूसा थू।

अक्क धैड़ा, जैहणै मूसा बड्डा भूची गो थू, ता तिनी हेरू कि अक्क मिस्री अक्की इस्राएली जो जक्कू करदा हा। मूसै अपणै साथी इस्राएली जो बचाणै री कोशिश करी।

जैहणै मूसै सोचु कि तैसियो कोई ना हेरला ता तिनी तैस मिस्री जो मारी दित्ता अतै तसेरै शव जो दफन करी दित्ता। अपर मूसै जेड़ा करू थू तैसियो कसीयै हेरी लेऊ थू।

फिरौन जो पता लगी गो कि मूसै कै करू हा। तिनी तैसियो मारनैरी कोशिश करी, अपर मूसा मिस्र थऊँ बणा मंज नही गो। फिरौन रै सपाई तैसियो तैठी तोपी ना सकै।

मिस्र थऊँ दूर बणा मंज मूसा अक्क पाअळ बणी गो थू। तिनी तैठी अक्की जनानी सित बैह करी लेऊ अतै दोई पुत्र पैदा करै।

मूसा अपणै हऊरै री भैड़ा री रखबाली करदां थू। अक्क धैड़ै, तिनी अक्क बळंदी झाड़ी जो हेरू जेड़ी फुकीणै बगैर बळूरी थी। तैसाओ हेरनै ताई सो तैसा झाड़ी रै नैड़ै गो। जैहणै सो तसारै बड़ै नैड़ै थू ता प्रमात्मै तैस सितै गल करी। तिनी बल्लू, "हे मूसा, अपणै जूट्टै जो खोली दे। तू अक्क पवित्र जगह पुर खड़ूरा हा।"

प्रमात्मै बल्लू, "मैंई अपणै मणु रै दुःखा जो हेरू हा। मुं तीजो फिरौन बलै भैजणा ताकि तू इस्राएली जो मिस्र री गुलामी थऊँ कड्डी लेई। मुं तिन्या जो कनान देश दिणा, सो देश जठेरा मैंई अब्राहम, इसहाक अतै याकूब सितै प्रतिज्ञा करी हा।"

मूसै पूछु, "अगर मणुयै जाणना चाऊ कि मिंजो कुणी भैज्जू हा ता अऊँ कै बल्लूं?" प्रमात्मै बल्लू, "जेड़ा अऊँ हा सो अऊँ हा। तिन्या सितै बल, 'प्रमात्मै मिंजो तुसू बलै भैज्जू हा।' तिन्या सितै एह भी बल, 'अऊँ तुन्दै पूर्वज अब्राहम, इसहाक अतै याकूब रा प्रमात्मा यहोवा हा।' मेरा एह नां सदा रा हा।"

मूसा डरन्दा थू अतै फिरौन बलै गाणा ना चाहन्दा थू क्योकि तिनी सोचु कि मिंजो थऊँ सही ना बलीणा, ठेरैताई प्रमात्मै मूसा रै भाई, हारून, जो तसेरी मदद करनै ताई भैज्जू।