10. दस मुसीबता

प्रमात्मै मूसा अतै हारून जो चेतावनी दिती कि फिरौन हठीला भूची गाणा| जैहणै सो फिरौन बलै गै ता तिन्यै बल्लू, “इस्रायल रा प्रमात्मा इन्या बलदा हा, ‘मेरै मणु जो गाणा दे!’” पर फिरौनै तयांरी ना हुणी अतै इस्राएलि जो गाणै ताई आजाद करनै रै बजाए तिनी तिन्यायो होर कठण मेहनत करनै ताई मजबूर करू|

फिरौन तिन्या मणु जो गाणै दीणै थऊँ लगातार इनकार करदा रेऊ, ठेरैताई प्रमात्मै फिरौन जो दस्सू कि सो फिरौन अतै मिस्र रै देवतै थऊँ ज्यादा शक्तिशाली हा|

प्रमात्मै नील नदी जो खुना मंज बदली दित्ता, पर फिरौनै अल्ली भी इस्रायली जो गाणा ना दित्ता|

प्रमात्मै पुरै मिस्र मंज मेंढक भैजै| फिरौनै मेंढका जो दूर करनै ताई मूसा सितै विनती करी| पर सब मेंढका जो मरी गाणै थऊँ बाद, फिरौनै अपणै मना जो कठोर करी लेऊ अतै इस्रायली जो मिस्र थऊँ निकळना ना दिता|

ठेरैताई प्रमात्मै कुटकी री मुसीबत भैजी| तैत थऊँ तिनी डांसों री मुसीबत भैजी| फिरौनै मूसा अतै हारून जो हद्दु अतै तिनी बल्लू कि जे सो तैसा मुसीबता जो रोकी देया ता इस्रायली मिस्र जो छड्डी करी गिची सकदै हिन्|जैहणै मुसै प्रार्थना करी ता प्रमात्मै मिस्र पुर थऊँ डांसां जो हटाई दित्ता| पर फिरौनै अपणा मन कठोर करी लेऊ अतै तिन्या मणु जो आजाद भूची करी गाणा ना दित्ता|

ठेरै अगै, प्रमात्मै मिस्री रै सबी पालतू जानवरा जो बमार भूची करी मरी गाणा दित्ता| पर फिरौन रा मन कठोर भूची गछुरा थू अतै तिनी इस्रायली जो गाणा ना दित्ता|

तैहणै प्रमात्मै मूसा थऊँ फिरौन रै सामणै हवा मंज धुड़ फैकणै जो बल्लू| जैहणै तिनी एसा करू ता मिस्र रै मणु री त्वचा पुर पीड़ादाउक फोड़ै निकळी आयै, पर इस्रायली जो कुछ ना भुआ| प्रमात्मै फिरौन रै मना जो कठोर करी दित्ता, अतै फिरौनै इस्रायली जो आजाद भूची करी गाणा ना दित्ता|

ठेरै बाद, प्रमात्मै ओळै फड़ायै अतै मिस्र री ज्यादातर फसला जो खत्म करी दित्ता अतै जेड़ा कोई भी बाहर निकळू तैसियो मारी दित्ता| फिरौनै मुसा अतै हारून जो हद्दू अतै तिन्या सितै बल्लू, “मेई पाप करू हा| तुहै मणु गिची सकदै हिन्|” अत: मूसै पार्थना करी, अतै अम्बरा थऊँ ओळै पैणा रुकी गै|

पर फिरौनै फिरी पाप करू अतै अपणै मना जो कठोर करी लेऊ| तिनी इस्रायली जो आजाद भूची करी करी गाणा ना दित्ता|

अत: प्रमात्मै मिस्र पुर टिड्डी रै दला जो ईणा दित्ता| इन्यै टिड्डीयै तिन्या पूरी फसला जो खाई लेऊ जिंया जो ओळै खत्म ना करूरा थू|

फिरी प्रमात्मै अंधकार करी दित्ता जेड़ा तराई धैड़ै तक बणी रेऊ| एह एतना घोर थू कि मिस्री मणु अपणै गहरा थऊँ ना निकळी पायै| पर जैठी इस्रायली मणु रैहन्दै थीयै तैठी प्रगड़ा थू|

इन्या नौ मुसीबता रै बाद भी, फिरौन इस्रायली जो आजाद भूची करी गाणै थऊँ इनकार करी दिता| चूँकि फिरौनै ना हूँणुरा थू ठेरैताई प्रमात्मै अक्क आख़री मुसीबत भैजणै री योजना बणाई| एह फिरौन रै मना जो बदली दिली|