13. इस्राएल का दगड़ी पिता परमेश्वर की वाचा

इस्राएलियों तैं लाल समुद्र बट्टी पार ले के जांणा का बाद, पिता परमेश्वर ऊं तैं जंगल बट्टी हवे के सीनै कहलांण वला डांडा का तरपां चला। यु उ ही डांडो छो जख मूसा ल जलदी झाड़ी तैं देखि छो। ऊं लुखुं ल वे डांडा का मूड़ी अपड़ा तम्बुओं तैं खड़ो कैरी छो।

पिता परमेश्वर ल मूसा बट्टी इस्राएल का सभि लुखुं कु बोलि, "तुम हमेशा मेरी बातों तैं मंणयां अर जु वाचा मि तुम दगड़ी बंधुलु वे तैं बंणयां रखियां। जु तुम इन करिला, त तुम मेरा दियां इनाम बहुमूल्य धन, याजकों कु राज्य, अर एक पवित्र जाति ठरिला।"

पिता परमेश्वर द्वारा ऊं मा आंणु कु लुखुं तैं तीन दिनों तक अफ तैं तैयार कन पुडलो। तब पिता परमेश्वर सीनै डांडा बट्टी मूड़ी उतरी। जब उ ऐ त भूकम्प ऐ, बिजलियां चमकीनि, धुआं उठी, अर तुरहियों की बड़ीभरी आवाज हवे । तब मूसा अकेला ही मथी डांडा पर चढ़ी गै।

तब पिता परमेश्वर ल लुखुं का दगड़ी एक वाचा बांधी। पिता परमेश्वर ल बोलि, "मि तुम्हरो परमेश्वर यहोवा छो। मि ही छो जैल तुम तैं मिस्र देश का दासत्व बट्टी तुम तैं छुडै। कै हैंका दिबता की उपासना नि करयां।"

"मूर्तियाँ नि बंणयां अर ऊंकी उपासना नि करियां, किलैकि मि, यहोवा तुम्हरो एक ही परमेश्वर छो। बगैर कीं बात का मेरु नौं नि लियां। विश्राम का दिन तैं पवित्र मंनणु कु याद रखयां।"

"अपड़ा ब्वे-बुबा कु आदर करयां। हत्या नि करयां। व्यविचार नि करयां। चोरी नि करयां। अपड़ा पड़ोसी की जनन, वेको घौर, या वेका कै भि सामान कु लालच नि करयां।"

तब पिता परमेश्वर ल यूं ढ आज्ञाओं तैं ढुंगा की द्वी पट्टियों पर लिखी के मूसा तैं दींनि। पिता परमेश्वर ल आज्ञा मंनणु कु लुखुं तैं हैंकी भौत सी आज्ञा दींनि। जु ऊंल यूं आज्ञाओं कु पालन कैरी त पिता परमेश्वर ल ऊं लुखुं तैं आशीष दींण अर ऊंकी रक्षा कनो कु वादा कैरी। पर ऊंल बोलि कि जु ऊंल यांको पालन नि कैरी त उ ऊं लुखुं तैं दंड दयालो।

पिता परमेश्वर ल इस्राएलियों बट्टी एक बड़ो तंबू बनांणु कु भि बोलि- मिलाप वलो तंबू। वेल ऊं तैं ठिक-ठिक बतै कि ये तंबू तैं कन के बनांण, अर ऊंका भित्र कीं चीजों तैं रखण। वेल ऊं तैं वे तम्बू तैं द्वी कमरों मा बंटण कु एक बड़ो पर्दा तैं बनांणु कु बोलि। पिता परमेश्वर वे पर्दा का पिछनै वला कमरा मा आलो अर उख रालो। जख परमेश्वर छो वे कमरा मा जांणै की अनुमति भस महायाजकों तैं ही छै।

ऊं लुखं तैं वे मिलाप वला तम्बू का समणी एक वेदी बनांणु कु बोलि। कुई भि जु पिता परमेश्वर की आज्ञाओं तैं अनदेखो करलो उ वीं वेदी पर एक जानवर तैं ले के आलो। तब याजक वे तैं बलि करलो अर वेदी पर पिता परमेश्वर कु बलि का रूप मा जलालो। पिता परमेश्वर ल बोलि कि वे जानवर का ल्वे वे आदिम का पापों तैं ढाँप दयालो। इन के जब, पिता परमेश्वर वे पाप तैं नि दिखलो। उ आदिम पिता परमेश्वर की नजर मा "शुद्व" ठहरलो। पिता परमेश्वर ल मूसा का भये हारुन तैं अर हारुन का वंशजों तैं अपड़ो याजक हूंणु कु चुंणी।

पिता परमेश्वर ल ऊं लुखुं तैं जु आज्ञा दये छै उ ऊं आज्ञाओं कु पालन कनु कु मांणी गैनी। उ भस पिता परमेश्वर का लोग हूंणु कु अर भस वेकी आराधना कनु कु मांणी गैनी।

भौत दिनों तक, मूसा सीनै डांडा पर ही रै। उ पिता परमेश्वर दगड़ी बात कनु रै। पर लोग ऊं मा वापस लौटणो कु इन्तेजार करदी-करदी थकी गैनी। इलै उ हारून मा सोना ले के ऐनी अर वे बट्टी एक मूर्ती बनांणु कु बोलि कि उ पिता परमेश्वर की जगह पर वीं की उपासना कैरा। इन के, ऊंल भयंकर रूप मा पिता परमेश्वर का विरूद्ध मा पाप कैरी।

हारून ल एक कलौडा का आकर मा सोने की एक मूर्ती बंणै। ऊं लुखुं ल वीं मूर्ती की उपासना कन शुरू कैरी दींनि अर वे तैं बलि चढ़ै! ऊंका पाप की वजह ल पिता परमेश्वर ऊं बट्टी भौत गुस्सा हवे। उ ऊं लुखुं तैं खत्म कैरी दींण चांदु छो। पर मूसा ल ऊं तैं नि मरण की बिनती कैरी। पिता परमेश्वर ल ऊंकी बिनती तैं सूंणी अर ऊं तैं खत्म नि कैरी।

आखिरकार मूसा सीनै डांडा बट्टी मूड़ी उतर ऐ। उ ऊं द्वी ढुंगे की पट्टियों तैं हथ मा ले के छो जूं पर पिता परमेश्वर ल दस आज्ञाओं तैं लिखयूं छो। फिर वेल वीं मूर्ती तैं देखि। उ इथग गुस्सा हवे कि वेल ऊं पट्टियों तैं चकनाचूर कैरी दींनि।

फिर मूसा ल वीं मूर्ती तैं पीसी के वीं तैं बरबाद कैरी दींनि, अर वे बुरादा तै पांणी मा मिलै के ऊं लुखुं तैं पिलै दींनि। पिता परमेश्वर ल ऊं लुखुं पर एक विपत्ति भेजि अर ऊं मा बट्टी भौत सी लोग मोरि गैनी।

जूं पट्टियों तैं मूसा ल तोड़ेले छो ऊंकी जगह लींणु कु मूसा ल ऊं दस आज्ञाओं की ढुंगा की पट्टियों बंणैनि। तब उ फिर से डांडा पर चढ़ी गै अर प्रार्थना कैरी कि पिता परमेश्वर ऊं लुखुं तैं माफ कैरो। पिता परमेश्वर ल मूसा की सूंणी अर ऊं तैं माफ कैरी दींनि। नई पट्टियों पर दस आज्ञाओं तैं मूसा डांडा बट्टी मूड़ी ऐ। तब पिता परमेश्वर ल सीनै डांडा बट्टी ले ले वादा कियां देश तक इस्राएलियों की अगवै कैरी।