12. निर्गमन

इस्राएली लोग मिस्र देश बट्टी निकली के भौत खुश छा। वु नौकर नि छा, अर वादा कियां देश मा जांणा छा! जु कुछ भी इस्राएलियों ल मांगी, मिस्रियों ल ऊं तैं उ सभि कुछ दींनि, इक तक कि सोना अर चांदी अर हैंको किस्म को कीमती चीज भि। दुसरा देश का कुछ लुखुं ल पिता परमेश्वर पर विश्वास कैरी अर जब इस्राएली लोग मिस्र देश बट्टी निकलींनि त उ भी ऊं दगड़ी हवे गैनी।

दिन का बगत बादल कु एक बड़ो खम्भा ऊंका अगनै-अगनै चलि। अर रात का बगत यु आग कु खम्भा बंणी गै। पिता परमेश्वर जु वे बादल अर आग का खम्भा मा छो, हमेशा ऊं दगड़ी ही छो अर पिता परमेश्वर ल यात्रा कन मा ऊं लुखुं की मदद कैरी।

कुछ बगत बाद, फिरौन अर ऊंका लुखुं ल अपड़ा मनों तैं बदली दींनि। उ इस्राएलियों तैं फिर से अपड़ो नौकर बनांण चांणा छा। इलै ऊंल इस्राएलियों कु पीछा कैरी। यु पिता परमेश्वर ही छो जैल ऊंका मनों तैं बदली छो। ऊंल यु इलै कैरी किलै कि उ अच्छो छो कि हर कुई यु जांण ल्यो कि फिरौन बट्टी अर मिस्रियों का सभि दिबतों बट्टी उ यहोवा, परमेश्वर ज्यादा शक्तिशाली च।

जब इस्राएलियों ल मिस्र की सेना तैं आंद देखि त ऊं तैं मालूम हवे कि उ फिरौन की सेना अर लाल समुद्र का बीच मा फंसी गैनी। उ भौत डैर गैनी अर रूंण लगि गैनी, "हम ल मिस्र देश तैं किलै छोड़ी? हम मुरण वला छा!"

मूसा ल इस्राएलियों बट्टी बोलि, "डैरा न! पिता परमेश्वर आज तुम कु लड़लो अर तुम तैं बचालो।" तब पिता परमेश्वर ल मूसा कु बोलि, "यूं लुखुं बट्टी लाल समुद्र का तरपां अगनै बढ़णु कु बोल।"

तब पिता परमेश्वर ल वे बादल का खम्भा तैं ले के इस्राएलियों अर मिस्रियों का बीच मा रखि दींनि कि मिस्री लोग इस्राएलियों तैं देख नि साका।

पिता परमेश्वर ल मूसा बट्टी समुद्र पर अपड़ो हथ बढ़ैणु कु बोलि। तब पिता परमेश्वर ल बथों से समुद्र का पांणी तैं बैं अर दैं तरपां कर्वे दींनि, ज्यां बट्टी समुद्र से हवे के एक रस्ता बंणी गै।

इस्राएली लोग अपड़ा द्वी तरपां पांणी की दीवारों का दगड़ी सुखीं धरती पर समुद्र से हवे के अगनै बढ़दी गैनी।

तब पिता परमेश्वर ल वे बट्टा बट्टी बादल तैं उठे दींनि कि मिस्री लोग इस्राएलियों तैं बचि के जै जांद देखा। मिस्रियों ल ऊं तैं पकड़णु कु ऊंको पीछा कनु को फैसला लींनि।

तब ऊंल समुद्र का बीच बट्टी वे बट्टा पर इस्राएलियों कु पीछा कैरी, पर पिता परमेश्वर ल मिसियों तैं घबरे दींनि अर ऊंका रथों तैं उख ही अटके दींनि। उ चिलांण लगि गैनी "भागा! इस्राएलियों की तरपां बट्टी पिता परमेश्वर लड़णु च!"

सैरा इस्राएली समुद्र का दुसरा तरपां पौंछि गैनी। तब पिता परमेश्वर ल मूसा बट्टी बोलि कि उ फिर से पांणी पर हथ बढ़ौ। जब मूसा ल इन कैरी, त पांणी मिस्री सेना पर ऐ अर अपड़ी साधारण अवस्था मा ऐ गै। सैरा मिस्री सेना डूबी गै।

जब इस्राएलियों ल देखि कि मिस्री मोरि गैनी त ऊंल पिता परमेश्वर पर विश्वास कैरी। ऊंल विश्वास कैरी कि मूसा पिता परमेश्वर की तरपां बट्टी एक भविष्यवक्ता च।

इस्राएली लोग इलै भि भौत खुश छा किलैकि पिता परमेश्वर ल ऊं तैं मुरण से अर नौकर हूंण से बचै छो। अब उ पिता परमेश्वर की आराधना कन अर वेकी आज्ञा कु पालन कनु कु आजाद छा। इस्राएलियों ल अपड़ी आजादी कु त्यौहार मनाणु कु अर पिता परमेश्वर की तरीफ कनु कु भौत सी गीतों तैं गाई किलैकि परमेश्वर ल ऊं तैं मिस्रियों की सेना बट्टी बचै छो।

पिता परमेश्वर ल इस्राएलियों तैं हर साल एक त्यौहार मनांणे की आज्ञा दये छै यु याद कनु कु कि कन के पिता परमेश्वर ल मिस्रीयों तैं हरै छो अर ऊं तैं नौकर हूंण से आजाद कैरी छो। यु त्यौहार फसह कु त्यौहार कहलांद छो। यांमा ऊं तैं त्यौहार मनांणु कु एक अच्छा चिनखा तैं बलि कन छो, वे तैं भूनण छो, अर वे तैं खमीर वली रूठी का दगड़ी खांण छो।