15. वादा कु देश

आखिर मा, अब उ बगत ऐ गै छो कि इस्राएली लोग वादा का कनान देश मा जां। वे देश मा यरीहो नौ कु एक नगर छो। वेकी रक्षा कु वेका चौतरपां मजबूत दीवार छै। यहोशू ल वे नगर मा द्वी भेद लींण वलों तैं भेजि। वे नगर मा राहाब नौ की एक वेश्या रौंदी छै। वींल ऊं भेद लींण वलों तैं छिपै, अर फिर बाद मा वींल ऊं तैं नगर बट्टी बचै के निकलण मा मदद कैरी। वींल इन इलै कैरी किलैकि उ पिता परमेश्वर मा विश्वास करदी छै। जीं बगत इस्राएली लोग यरीहो तैं नाश करला तब ऊंल राहाब अर वींका परिवार की रक्षा कनो कु वादा कैरी।

इस्राएली लुखुं तैं वादा का देश मा जांणु कु यरदन गाड तैं पार कन छो। पिता परमेश्वर ल यहोशू बट्टी बोलि, "याजकों तैं पैली जांण द्या।" जब याजकों ल यरदन गाड मा अपड़ा खुट्टों तैं रखि त पांणी की धार बुगण थमी गै, ज्यां पर इस्राएली लोग गाड की दुसरी तरपां सुखीं धरती बट्टी पार जै साका।

ऊं लुखुं ल यरदन गाड पार कैरी दींनि त पिता परमेश्वर ल यहोशू बट्टी बोलि कि यरीहो पर हमला कनु कु तैयार रा, जबकि उ भौत मजबूत नगर छो। पिता परमेश्वर ल ऊं लुखुं बट्टी बोलि कि ऊंका याजकों अर सिपैयूं तैं छ: दिनों तक वे नगर का चौतरपां एक बार चक्कर लगांण। तब याजकों अर सिपैयूं ल इन ही कैरी।

तब सातवाँ दिन, इस्राएलियों ल वे नगर का चौतरपां सात बार और चक्कर लगैनी। ऊंका नगरों का चौतरपां अर सात बार चक्कर लगांण का बाद, याजकों ल अपड़ी तुरहीयां बजैनि अर सिपैयूं ल जोरदार शब्द कैरी।

तब यरीहो का चौतरपां की दीवार गिर गैनी! जन पिता परमेश्वर ल आज्ञा दये छै इस्राएलियों ल नगर की हर चीज तैं खत्म कैरी दींनि। ऊंल बस राहाब अर वेका परिवार तैं छोड़ी दींनि, जु इस्राएलियों का भाग बंण ग्ये छा। जब कनान मा रांण वला हैंका लुखुं ल सूंणि कि इस्राएलियों ल यरीहो तैं खत्म कैरेले, त उ डैर गैनी कि इस्राएली लोग ऊं पर भि हमला करला।

पिता परमेश्वर ल इस्राएलियों तैं आज्ञा दये छै कि कनान मा रांण वली कै भि जाति का दगड़ी शान्ति की वाचा नि कन। पर गिबोनियों नौ का एक कनानी जाति ल यहोशू बट्टी झूठ बोलि कि उ कनान देश बट्टी दूर एक जगह का रांण वला छिनी। ऊंल यहोशू बट्टी ऊंका दगड़ी शान्ति की मित्रता कनै की बिनती कैरी। यहोशू अर हैंका इस्राएली अगवों ल पिता परमेश्वर बट्टी नि पूछि कि ऊं तैं क्य कन चयणु च। जबकि, ऊंल गिबोनियों का दगड़ी शान्ति की मित्रता कैरी दींनि।

तीन दिन का बाद, इसाएलियों तैं मालूम हवे कि गिबोनी लोग कनान मा ही रौंदींनि। उ गुस्सा हवे गैनी किलैकि गिबोनियों ल ऊं तैं धोखा दये छो। पर ऊंल ऊंका दगड़ी शान्ति की मित्रता तैं बंणै के रखि किलैकि उ पिता परमेश्वर का समणी किये गै छै। तब कुछ बगत का बाद, कनान देश मा रांण वली एल हैंकी जाति, एमोरियों का राजाओं ल सूंणि कि गिबोनियों ल इस्राएलियों का दगड़ी शान्ति की मित्रता कैरेले, इलै ऊंल अपड़ी-अपड़ी सेनाओं तैं एक कैरी के एक बड़ी सेना तैं बंणै अर गिबोन पर हमला कैरी दींनि। गिबोनियों ल वेकी मदद कनु कु यहोशू मा एक रैबार भेजि।

तब यहोशू ल इस्राएलियों की सेना तैं कठ्ठा कैरी अर गिबोनियों मा पौंछणु कु उ पूरी रात चलिनि। सुबेर ऊंल एमोरियों की सेना तैं हैरान कैरी दींनि अर ऊं पर हमला कैरी दींनि।

वे दिन पिता परमेश्वर इस्राएलियों कु लैडि। वेल एमोरियों तैं घबरै दींनि अर वेल बड़ा-बड़ा ओलों तैं गिरै के भौत स एमोरियों तैं मारि दींनि।

पिता परमेश्वर ल सूरज तैं भि आसमान मा एक जगह पर थमी दींनि कि इस्राएलियों तैं पूरो बगत मिली जौ कि एमोरियों तैं पूरी ढंग से हरै द्या। वे दिन, पिता परमेश्वर ल इस्राएलियों कु एक बड़ी जीत हासिल कैरी।

जब पिता परमेश्वर ल ऊं सेनाओं तैं हरांण का बाद, भौत सी कनानी जाति का लोग इस्राएल पर हमला कनु कु कठ्ठा हवीनि। यहोशू अर इस्राएलियों ल हमला कैरी के ऊंको सत्यनाश कैरी दींनि।

यूं लड़ैयों का बाद, पिता परमेश्वर ल इस्राएल का हरेक गोत्र तैं वादा का वे देश मा ऊंको भाग दींनि। तब पिता परमेश्वर ल इस्राएल तैं वेकी सभि सीमाओं पर शान्ति दींनि।

जब यहोशू बुढ़िया हवे गै त वेल इस्राएल का सभि लुखुं तैं एक दगड़ी बुलै। तब यहोशू ल ऊं लुखुं तैं याद करै कि ऊंल वेल वादा कैरी छो जु पिता परमश्वर ल ऊं दगड़ी सीनै डांडा पर बांधि छै। ऊं लुखुं ल पिता परमेश्वर का प्रति विश्वासयोग्य रांणु कु अर वेकी व्यवस्थाओं कु पालन कनु को वादा कैरी।