22. यूहन्ना कू जन्म

पिछला बगत मा, पिता परमेश्वर ल अपड़ा भविष्यवक्ताओं बट्टी बात कैरी इलै ऊं लुखुं बट्टी बात कैरी सकदा छा। पर वीं बगत बट्टी ले के फिर 400 सालों का बीतण तक वेल ऊं बट्टी बात नि कैरी। तब पिता परमेश्वर ल जकर्याह नौं का भविष्यवक्ता मा एक स्वर्गदूत तैं भेजि। जकर्याह अर वेकी जनन एलीशिबा पिता परमेश्वर कु आदर करदा छा। उ भौत बुढिया हवे गै छा, अर ऊंकी कुई सन्तान नि हवे छै।

वे स्वर्गदूत ल जकर्याह बट्टी बोलि, "तेरे जनन कु एक नौंनो होलो। तू वेको नौ यूहन्ना रखि। पिता परमेश्वर वे तैं पवित्र आत्मा बट्टी भरपूर करलो, अर यूहन्ना लुखुं तैं मसीह तैं ग्रहण कनु कु तैयार करलो।" जकर्याह ल जवाब दये, "मि अर मेरी जनन सन्तान पैदा कनु कु भौत बुढिया छा! मि कन कै जांणु कि तु मि बट्टी सच बुल्णी छै?"

वे स्वर्गदूत ल जकर्याह तैं जवाब दींनि, "त्वे मा ये शुभ संदेश तैं लांणु कु पिता परमेश्वर का द्वारा भिजे गै। किलैकि तिल मि पर विश्वास नि कैरी, इलै बच्चा पैदा हूंण तक तु बोलि नि सकीलि।" तब उबरी ही, जकर्याह गूंगो हवे गै। तब उ स्वर्गदूत जकर्याह का समणी बट्टी चलि गै। यांका बाद, जकर्याह अपड़ा घौर वापस लौटी ऐ अर वेकी जनन गर्भवती हवे।

जब एलीशिबा छ: मैना की गर्भवती छै, त उ ही स्वर्गदूत अचानक से एलीशिबा का रिश्तेदारों पर प्रगट हवे, जींको नौं मरियम छो। मरियम अणबिवाक छै अर ब्वो हूंणु कु यूसुफ नौं का आदिम वीं कि मांगण हुवीं छै। स्वर्गदूत ल बोलि, "तु गर्भवती हवीलि अर एक नौंना तैं जन्म दींलि। तु वेको नौं यीशु रखी। उ सर्व-शक्तिमान पिता परमेश्वर कु नौंनो होलो अर हमेशा कु राज्य करलो।"

मरियम ल जवाब दींनि, "यु कन कै हवे सकद, किलैकि मि त अणबिवाक छो?" वे स्वर्गदूत ल वीं तैं समझै, "पवित्र आत्मा त्वे पर आलो, अर पिता परमेश्वर की सामर्थ त्वे पर छाया करेली। इलै उ नौंनो पवित्र होलो, अर उ पिता परमेश्वर कु नौंनो होलो।" जु वे स्वर्गदूत ल बोलि वे पर मरियम ल विश्वास कैरी।

यु हूंणा का बाद, मरियम ल जै के एलीशिबा बट्टी मुलकात कैरी। जन ही मरियम ल वे तैं नमस्कार कैरी, एलीशिबा का नौंनो वींका भितर उछली। ऊं कु पिता परमेश्वर ल जु कैरी छो वेका बारा मा उ जनन एक दगड़ी खुशी हवीनि। एलीशिबा का दगड़ी तीन मैना रांण का बाद, मरियम अपड़ा घौर लौटी गै।

यांका बाद, एलीशिबा ल अपड़ा नौंन तैं जन्म दींनि। जकर्याह अर एलीशिबा ल वे नौंनो कु नौं यूहन्ना रखि, जन कि वे स्वर्गदूत ल आज्ञा दये छै। तब पिता परमेश्वर ल जकर्याह तैं बुल्ण मा मदद कैरी। जकर्याह ल बोलि, "पिता परमेश्वर की स्तुति हो, किलैकि वेल अपड़ा लुखुं की मदद कन तैं याद रखि! हे मेरा नौंना, तु सर्व-शक्तिमान पिता परमेश्वर कु भविष्यवक्ता होलो। तु लुखुं तैं बतैली कि उ कन के अपड़ा पापों तैं माफ कैरी सकद! "