21. पिता परमेश्वर मसीह कु वादा करद

जब पिता परमेश्वर ल दुनिया की रचना कैरी छै, उ जंणदु छो कि वे तैं बाद मा कै न कै दिन मसीह तैं भिजण होलो। वेल आदम अर हव्वा बट्टी वादा कैरी कि उ इन करलो। वेल बोलि कि हव्वा बट्टी एक वंशज पैदा हवालो जु गुरो कु मुंड कुचललो। जै गुरो ल हव्वा तैं धोखा दये उ जरुर शैतान छो। पिता परमेश्वर कु मतलब छो कि मसीह पूरा ढंग से शैतान हरै दयालो।

पिता परमेश्वर ल अब्राहम बट्टी वादा कैरी छै कि वेका द्वारा दुनिया की सैरी जातियों तैं आशीष मिलली। पिता परमेश्वर बाद मा कै बगत पर मसीह तैं भिजण का द्वारा ये वादा तैं पूरो करलो। उ मसीह दुनिया का हर एक जाति मा बट्टी लुखुं तैं ऊंका पापों म बट्टी छुडालो।

पिता परमेश्वर ल मूसा बट्टी वादा कैरी की कि भविष्य मा उ मूसा का जन हैंका भविष्यवक्ताओं तैं भेजि। यु भविष्यवक्ता मसीह होलो। इन के, पिता परमेश्वर ल फिर से वादा कैरी कि उ मसीह तैं भिजलो।

पिता परमेश्वर ल राजा दाऊद बट्टी वादा कैरी कि ऊंको एक वंशज मसीह होलो। उ राजा होलो अर पिता परमेश्वर का लुखुं पर हमेशा कु राज्य करलो।

पिता परमेश्वर ल यिर्मयाह भविष्यवक्ता बट्टी बात कैरी अर बोलि कि एक दिन उ एक नया वादा तैं करलो। उ नयो वादा इस्राएल का दगड़ी सीनै डांडा पर कैरी पुरणा वादा का जन नि होली। जब लुखुं का दगड़ी उ अपड़ी नया वादा तैं करलो, त उ ऊं पर अफ तैं प्रगट करलो। हर आदिम वे बट्टी प्रेम रखलो अर वेकी व्यवस्था कु पालन कने की इच्छा रखलो। पिता परमेश्वर ल बोलि कि यु वेकी व्यवस्था तैं ऊंका ह्रदय पर लिखण का जन च। उ वेका लोग होला, अर पिता परमेश्वर ऊंका पापों तैं माफ करलो। उ मसीह होलो जु ऊंका दगड़ी वे वादा तैं करलो।

पिता परमेश्वर का भविष्यवक्ताओं ल यु भि बोलि कि मसीह एक भविष्यवक्ता होलो। एक भविष्यवक्ता उ आदिम च जु पिता परमेश्वर का वचनों तैं सूंणों अर फिर लुखुं पर पिता परमेश्वर का रैबार कु प्रचार करद। जै तैं भिजण कु पिता परमेश्वर कु वादा करूं छो कि उ मसीह एक सिद्ध भविष्यवक्ता होलो। मतलब उ मसीह पिता परमेश्वर का रैबार तैं अनुके सुणलो, अर उ लुखुं तैं ऊं रैबारों तैं अनुके सिखालो।

इस्राएली याजकों ल लुखुं कु पिता परमेश्वर का अगनै बलिदान चढांणा रैनी। यु बलिदान लुखुं का पापों कु ऊं तैं पिता परमेश्वर द्वारा दंड दींण की जगह पर चढये गै छो। याजकों ल लुखुं कु प्रार्थना भि कैरी। पर, उ मसीह सिद्ध म्हाय्ज्क होलो जु पिता परमेश्वर तैं दींणु कु एक सिद्ध बलि का रूप मा अफ तैं चढै दयालो। मतबल, उ कभि पाप नि करलो, अर जब उ अफ तैं बलि हूंणु कु दये दयालो, त दुनिया का कुई भि हैंकि बलि कि जरूरत नि होली।

लुखुं का झुण्ड पर राजा अर प्रधान राज्य करदींनि, अर कभि-कभि उ गलती भि करदींनि। राजा दाऊद ल बस इस्राएलियों पर राज्य कैरी, पर राजा दाऊद का वंशज मसीह पूरी दुनिया पर राज्य करलो, अर उ हमेशा कु राज्य करलो। यु ही न बल्कि, उ हमेशा कु न्यायपूर्ण रीति ल राज्य करलो, अर सही फैसलों तैं लयालो।

पिता परमेश्वर का भविष्यवक्ताओं ल मसीह का बारा मा भौत सी बातों तैं बोलि। उदाहरण कु, मलाकी ल बोलि कि मसीह का आंण से पैली एक हैंको भविष्यवक्ता आलो। उ भविष्यवक्ता भौत महत्वपूर्ण होलो। यु ही न बल्कि, यशायाह भविष्यवक्ता ल लिखी कि मसीह एक अणबिवाक बट्टी पैदा हवालो। अर मीका भविष्यवक्ता ल बोलि कि मसीह बैतलहम मा पैदा हवालो।

यशायाह भविष्यवक्ता ल बोलि गलील मा रालो। जु लोग भौत दुखी छिनी मसीह ऊं तैं शान्ति दयालो। उ बंधियों तैं आजाद करलो। मसीह बीमारों तैं अर जु सूंणी नि सकदींनि, देखी नि सकदींनि, बोलि नि सकदींनि, या चलि नि सकदींनि खूब करलो।

यशायाह भविष्यवक्ता ल यु भि बोलि कि लोग मसीह बट्टी नफरत करला अर वे तैं स्वीकार कन से मना कैरी दयाला। हैंका भविष्यवक्ताओं ल बोलि कि मसीह कु एक दगड़िया ही वे कु विरोध होलो। जकर्याह भविष्यवक्ता ल बोलि कि वेको यु दगड़िया इन कनु कु दुसरा लुखुं बट्टी चंदी का तीस सिक्कों तैं लयालो। यु ही न बल्कि, कुछ भविष्यवक्ताओं ल बोलि कि लोग मसीह तैं मारि दयाला, अर यु कि उ मसीह का कपड़ों कु जुआ खेलला।

भविष्यवक्ताओं ल यु भि बतै कि मसीह कन कै मुरलो। यशायाह ल भविष्यवाणी कैरी कि लोग मसीह पर थूकला, वेको मजाक बंणांला, अर वे तैं पिटला। उ वे तैं छिदी दयाला अर उ बड़ी पिडा अर तडपे के मोरुलू, जबकि वेल कुछ भि गलत नि कैरी होलो।

भविष्यवक्ताओं ल यु भि बतै कि मसीह पाप नि करलो। उ सिद्ध होलो। पर उ इलै मुरलो पिता परमेश्वर वे तैं हैंका लुखुं का पापों का कारण दंड दयालो। वेका मुरण का कारण लोग पिता परमेश्वर का दगड़ी मिलण मा सक्षम हवे सकला। इलै पिता परमेश्वर चांदु च कि मसीह मोरो।

भविष्यवक्ताओं ल यु भि बतै कि पिता परमेश्वर मसीह तैं मुर्दों मा बट्टी ज्यूंदो करलो। यु बतांद कि यु सब नया वादा तैं पूरो कनै की पिता परमेश्वर की योजना छै, कि उ, ऊं लुखुं तैं बचै साक जौल वेका विरुद्ध मा पाप कैरी।

पिता परमेश्वर ल भविष्यवक्ताओं पर मसीह का बारा मा भौत सी बातिन तैं प्रगट कैरी, पर मसीह ऊं भविष्यवक्ताओं मा बट्टी कैका भि जीवनकाल मा नि ऐ छो। इन भविष्यवक्ताओं का दियां जांण का 400 से ज्यादा सालों का बाद, सै बगत पर, पिता परमेश्वर मसीह तैं दुनिया मा भिजलो।