20. गुलामी बट्टी लौटण

इस्राएल का राज्य अर यहूदा का राज्य द्वीयूं ल पिता परमेश्वर का विरुद्ध मा पाप कैरी। ऊंल वे वादा तैं तोड़ी दींनि जु पिता परमेश्वर ल ऊं दगड़ी सीनै डांडा पर बांधि छै। पिता परमेश्वर ल ऊं तैं पश्चताप कनु अर फिर से ऊंकी आराधना कनु कु चितै दींण कु अपड़ा भविष्यवक्ताओं तैं भेजि, पर ऊंल वेकी बातों तैं मनण से मना कैरी दींनि।

तब पिता परमेश्वर ल ऊंका दुश्मनों तैं ऊंको नाश कन मा सक्षम कना का द्वारा द्वी राज्यों तैं दंड दींनि। अशशूर अर हैंको देश छो जु भौत ताकतबर हवे गै छो। उ दुसरा देशों का प्रति भौत निर्दयी भि छो। ऊंल ऐ के इस्राएल का राज्य तैं नाश कैरी दींनि। अशशूरियों ल ऐ के राज्य मा भौत तैं मार दींनि, जु चाही वे तैं लूटी दींनि, अर देशों का कई हिस्सों तैं फूकी दींनि।

अशशूरियों ल सभि अगवौ, अमीर लुखुं, अर इन लुखुं तैं जु कीमती चीजों तैं बंणै सकदा छा एक दगड़ी कठ्ठा कैरी अर उ ऊं तैं अशशूरदेश ली गैनी। इस्राएल मा बस कुछ ही गरीब इस्राएली बचीनि।

फिर अशशूरी लोग वे देश मा रांणु कु विदेशियों तैं ले के ऐनी। ऊं विदेशियों ल ऊं नगरों तैं दुबरा बंणै। जु इस्राएली उख बचयां छा ऊं बट्टी ऊंल ब्वो कैरेले छो। यूं लुखुं का वंशज सामरी कहलेनि।

यहूदा का राज्य का लुखुं ल देखि कि कन के पिता परमेश्वर ल वे पर विश्वास नि कन अर वेकी बातों तैं नि मनण का कारण इस्राएल का लुखुं तैं दंड दींनि। पर तब भि ऊंल कनानियों का दिबताओं की मूर्तियों की आराधना कैरी। पिता परमेश्वर ल ऊं तैं चितै दींणु कु भविष्यवक्ताओं तैं भेजि, पर ऊंल सुनण से मना कैरी दींनि।

लगभग 100 सालों का बाद अशशूरियों ल इस्राएल का राज्य तैं खत्म कैरी दींनि। पिता परमेश्वर ल बेबीलोन का राजा, नबूकदनेस्सर तैं यहूदा का राज्य पर हमला कनु कु भेजि। बेबीलोन एक ताकतबर देश छो। यहूदा का राजा नबूकदनेस्सर कु नौकर बनणु कु अर हर साल वे तैं भौत सैरा धन कु भुगतान कनु कु राजी हवे गै।

पर कुछ सालों का बाद, यहूदा का राजा ल बेबीलोन का विरुद्ध बलवा कैरी। तब बेबीलोनियों ल वापस ऐ के यहूदा का राज्य पर हमला कैरी दींनि। ऊंल यरूशलेम नगर पर कब्जा कैरी दींनि, मन्दिर तैं नष्ट कैरी दींनि, अर नगर अर मन्दिर का खजाना तैं लूटी के ली गै।

बलवा कना का कारण यहूदा का राजा तैं दंड दींणु कु, नबूकदनेस्सर का सिपैयूं ल राजा का नौंना तैं वेका समणी मारि दींनि अर फिर वे तैं अन्धो कैरी दींनि। यांका बाद, उ राजा तैं ली गैनी कि उ बेबीलोन का जेलखना मा मोरि जौ।

नबूकदनेस्सर अर वेकी सेना यहूदा का राज्य का लगभग सभि लुखुं तैं बेबीलोन ली गै, बस सबसे ज्यादा गरीब लुखुं तैं पिछनै छोड़ी के कि उ पुंगडों मा फसल उगौनु। बगत का ये काल कु गुलामी बुलै गै ज्यांमा पिता परमेश्वर का लुखुं तैं वादा का देश बट्टी निकल जांण कु मजबूर किये गै छो।

जबकि पिता परमेश्वर ल अपड़ा लुखुं तैं ऊंका पापों कु गुलामी मा ली जांण का द्वारा दंड दींनि, तब भि उ ऊं तैंया अपड़ा वादा तैं नि भूली छो। पिता परमेश्वर अपड़ा लुखुं पर ध्यान दींणु रै अर अपड़ा भविष्यवक्ताओं का द्वारा ऊं दगड़ी बात कनु रै। ऊं दगड़ी वादा कैरी की,कि उ सत्तर सालों का बाद, फिर से वादा किया देश मा लौटी जाला।

लगभग सत्तर सालों का बाद, फारस कु राजा कुस्रू ल बेबीलोन तैं हरै दींनि, इलै बेबीलोन का साम्राज्य की जगह फारस का साम्रज्य ल भौत देशों पर राज्य कैरी। इस्राएली लोग अब यहूदी कहलांदा छा। ऊंमा बट्टी भौतों ल अपड़ा पूरा जीवन बेबीलोन मा बितै दींनि। बस कुछ ही बुढिया तैं यहूदियों कु ही यहूदा कु देश याद छो।

फारसी लोग भौत सामर्थी छा, पर ऊंल अपड़ा जीवन मा लुखुं पर दया कैरी छै। फारसी लुखुं का राजा बनण का कुछ बगत बाद, कुस्रू ल एक आज्ञा दींनि कि कुई भि यहूदी जु यहूदा कु लौटण चौ, उ फारस बट्टी निकली के वापस यहूदा कु जै सकद। इख तक कि वेल अपड़ा मन्दिरों तैं फिर से बनांण कु पैसा भि दींनि। तब गुलामी का सत्तर सालों बाद, यहूदियों कु एक छुटटो झुण्ड यहूदा मा यरूशलेम नगर मा लौटी के ऐ।

जब उ लोग यरूशलेम पौंछिनि त ऊंल मन्दिर तैं अर नगर का चौ तरपां की दीवार तैं फिर बंणै। फारसी लोग अब भि ऊं पर राज्य करदा छा पर एक बार फिर से उ वादा का देश मा रौंणा छा अर मन्दिर मा आराधना कना छा।