32. यीशु दुष्टात्मा बट्टी पीड़ित आदिम तैं अर एक बीमार जनन तैं खूब कन

यीशु अर वेका चेला अपड़ी नाव मा वीं जगह गैनी जख गिरसेनी लोग रौंदा छा। उ वीं जगह पौंछि के नाव बट्टी उतरी गैनी।

उख एक आदिम छो जु दुष्टात्मा बट्टी पीड़ित छो।

यु आदिम इथग तागतबर छो कि कुई भि वे तैं काबू मा नि कैरी सकदु छो। कई बार लुखुं ल वेका हथों अर खुट्टों तैं संगलों ल भि बांधि, पर उ ऊं तैं भि तोड़ी दींद छो।

उ आदिम वी जगह की कब्रों मा रांदु छो। यु आदिम पूरा दिन अर रात चिलांणु रौंदू छो। उ कपड़ा नि पैरदु छो अर हमेशा अफ तैं ढुंगों ल घायल कैरी दींद छो।

उ आदिम दौड़ी के यीशु मा ऐ अर वेका समणी घुंदा टेकी दींनि। तब यीशु ल वे आदिम का भितर दुष्टात्मा दगड़ी बात कैरी के बोलि, "ये आदिम मा बट्टी भैर निकली जा!"

उ दुष्टात्मा ऊंचि आवाज मा चिलै, "हे यीशु, परम प्रधान परमेश्वर का नौंना, तेरु मि बट्टी क्य काम? दया कैरी कै मि तैं नि सतौ!" तब यीशु ल वीं दुष्टात्मा बट्टी बोलि, "तेरु नौं क्य च?" वीं ल जवाब दये, "मेरु नौं सेना च,किलैकि हम भौत छा।" (रोमी सेना मा कई हजार सिपैयूं कु एक समूह एक "सेना" हूंद।)

ऊं दुष्टात्माओं ल यीशु बट्टी बिनती कैरी, "दया कैरी के हम तैं ये इलाका बट्टी भैर नि भेज!" उख समणी का जंगल मा सुंगरूं को एक झुण्ड चरणु छो। इलै दुष्टात्माओं ल यीशु बट्टी बिनती कैरी की, "दया कैरी के हम तैं ऊं सुंगरूं मा भेजि दे!" यीशु ल बोलि, "ठिक च, ऊं मा चलि जावा!"

तब उ दुष्टात्माऐ वे आदिम मा बट्टी निकली के ऊं सुंगरूं मा चलि गैनी। उ सुंगरूं दौड़ी के एक खड़ा पोड बट्टी झील मा कूदी के मोरि गैनी। वे झुण्ड मा लगभग 2,000 सुंगर छा।

उख ऊं सुंगरूं की देखभाल कन वला लोग भि छा। जु कुछ हवे छो जब ऊंल देखी त उ नगर मा भागी गैनी। यीशु ल जु कैरी छो उख ऊंल सभियूं तैं बतै। वे नगर का लोग निकली के ऐनी अर वे आदिम तैं देखि जै पर दुष्टात्मा छै। उ शांत हवे कै, कपड़ा पैरयां, अर एक साधारण आदिम का जन बरतौ करदी बैठयूं छो।

उ लोग भौत डरयां छा अर ऊंल यीशु बट्टी चलि जांणु कु बोलि। तब यीशु नाव पर चढ़ि गै। उ आदिम जै पर दुष्टात्मा छै वेल यीशु का दगड़ी जांणै की बिनती कैरी।

पर यीशु ल वे बट्टी बोलि, "न। मि चांदु कि तु अपड़ा घौर जै के सभियूं तैं बतौ कि पिता परमेश्वर ल त्वे कु क्य कैरी। ऊं तैं बतौ कि कन कै पिता परमेश्वर ल त्वे पर दया कैरी।"

इलै उ आदिम चलि गै अर सभियूं तैं ये बारा मा बतै जु यीशु ल ऊं कु कैरी छो। वेकी कथा तैं सुनण वलो हर एक आदिम हैरान हवे।

यीशु झील की दुसरी तरपां लौटी गै। वेल उख पौंछण का बाद, एक बड़ी भीड़ वेका अमणी-समणी कठ्ठा हवे अर वे तैं दबांण लगि गै। वीं भीड़ मा एक जनन छै जु बारह सालों बट्टी ल्वे बुगण की परेशानी बट्टी पीड़ित छै। वीं ल अपड़ो सैरो धन वैदों तैं दियेले छो कि उ वीं तैं ठिक कैरी द्या, पर वीं की बिमारी और भि ज्यादा बड़ी गै छै।

वीं ल सूंणि छो कि यीशु ल कई बीमार लुखुं तैं खूब कैरी छो अर वीं ल सोचि, "मि तैं विश्वास च कि जु मि बस यीशु का कपड़ों ही तैं छ्वे दयूं, त मि भि ठिक हवे जौलु!" इलै व यीशु का पिछनै बट्टी ऐ अर वेका कपड़ा तैं छवे। जन ही वीं ल यीशु तैं छ्वे, ल्वे बुगण बंद हवे गै।

तुरंत ही, यीशु ल अफ मा यु जांण लींनि कि वे मा बट्टी सामर्थ निकली। इलै वेल पिछनै मुड़ी के पूछि, "मि तैं कैल छवे?" चेलों ल जवाब दींनि, "इख इथग सैरा लुखुं ल तेरा चौ तरपां भीड़ लगई च, अर त्वे तैं ठीलणी च। त तिल किलै पूछि कि मि तैं कैल छ्वे?"

व जनन यीशु का समणी कपदी अर भौत गबरांदी, डरदी अपड़ा घुंडों का बल बैठी गै। तब वेल वे तैं बतै दींनि कि वेल क्य कैरी, अर यु भि कि उ ठिक हवे गै। यीशु ल वीं बट्टी बोलि, "तेरा विश्वास ल त्वे तैं खूब कैरी। शान्ति से चलि जा।"