36. रूप बदलण

एक दिन, यीशु ल अपड़ा तिनी चेलों, पतरस, याकूब, यूहन्ना तैं अफ दगड़ी ले। ( यु यूहन्ना नौं कु चेला उ ही आदिम नि च जैल यीशु तैं बपतिस्मा दये छो।) उ प्रार्थना कनु कु एक ऊंचा पोड पर गैनी।

जब यीशु प्रार्थना कनु छो त वेको मुख सूरज का जन चमकी के उज्ज्वल हवे गै। वेका कपड़ा उज्यला का जन सफेद हवे गैनी, जन धरती पर कुई धोबी भि नि कैर सकद।

तब मूसा अर एलिय्याह भविष्यवक्ता प्रगट हवीनि। यु आदिम धरती पर ये बगत से कई सौ साल पैली रांदा छा। ऊंल यीशु बट्टी वेकी मौत का बारा मा बात कैरी, कि उ जल्द ही यरूशलेम मा मोरि जालो।

जब मूसा अर एलिय्याह यीशु बट्टी बात कना छा तब पतरस ल यीशु बट्टी बोलि, "हमारो इख हूंण अच्छो च। हम तीन तम्बू तैं बंणौला, एक त्वे कु, एक मूसा कु, अर एक एलिय्याह कु।" पर पतरस नि जंणदु छो कि उ क्य बुल्णु च।

जब पतरस बात कनु छो, त एक चमकदार बादल मूड़ी ऐ के ऊं तैं छिपै दींनि। फिर ऊंल बादल मा बट्टी एक आवाज तैं आंद सूंणि। वेल बोलि, "यु मेरु नौंनो च जै बट्टी मि भौत प्रेम करदु। मि त्वे बट्टी खुश छो। ये की सूंणा।" उ तिनी चेला डैरी गैनी अर धरती पर पोड़ी गैनी।

तब यीशु ल ऊं तैं छवै अर बोलि, "डैरा न। उठी जावा।" जब ऊंल चौतरपां देखि, त उख बस यीशु ही छो।

यीशु अर उ तिनी चेला वे डांडा बट्टी वापस मूड़ी ऐनि। तब यीशु ल ऊं बट्टी बोलि, "अभि जु इख हवे वेकी चर्चा कै बट्टी नि कैरा। मि जल्द ही मोरि जौलु अर फिर ज्यूंदो हवे जौलु। यांका का बाद, तुम लुखुं तैं बतै सकदा छा।"