37. यीशु लाजर तैं मुर्दों मा बट्टी ज्यून्दो करद

लाजर नौं कु एक आदिम छो। वेकी द्वी बैंण छै जूंको नौं मरियम अर मार्था छो। उ सभि यीशु का खास दगड़िया छा। एक दिन, कैल यीशु तैं बतै कि लाजर भौत बीमार छो। जब यीशु ल यु सूंणि त वेल बोलि, "यु बीमारी लाजर का मुरणा की बीमारी नि च। यांका बदला, या लुखुं तैं पिता परमेश्वर कु आदर कनु कु प्रेरित करली।"

यीशु अपड़ा दगड़ियों बट्टी प्रेम करदु छो, पर जख उ छो उख वेल द्वी दिनों तक इन्तेजार कैरी। ऊं द्वी दिनों का बाद, वेल अपड़ा चेलों बट्टी बोलि, "आवा, वापस यहूदिया कु चला।" चेलों ल जवाब दींनि, "पर हे गुरु, अभि कुछ बगत पैली ही उखा का लोग त्वे तैं मरण चांणा छा!" यीशु ल बोलि, " हमारो दगडिया लाजर सैय गै, अर मि तैं वे तैं उठांण च।"

यीशु का चेलों ल जवाब दींनि, "हे प्रभु, जु लाजर सैय गै, त उ ठिक हवे जालो।" तब यीशु ल ऊं बट्टी साफ-साफ बोलि दींनि, "लाजर मोरि गै। मि खुश छो कि मि उख नि छो, कि तुम मि पर विश्वास कैरी साका।"

जब यीशु लाजर का गौं पौंछि त लाजर तैं मुरयूं पै अर वे तैं मुरयां चार दिन हवे गै छा। मार्था यीशु बट्टी बुलणु कु भैर ऐ अर बोलि, "हे प्रभु, जु तु इख हूंदी त मेरु भैय नि मुरदो। पर मि विश्वास करदु कि जु कुछ भि तु पिता परमेश्वर बट्टी मंगिलि उ त्वे तैं दयालो।"

यीशु ल जवाब दये, "पुनरुत्थान अर जीवन मि ही छो। जु कुई मि पर विश्वास करद जु उ मोरि भि जौ तभि भि ज्यालो। जु कुई मि पर विश्वास करद उ कभि नि मुरलो। क्य तु ईं बात पर विश्वास नि करदी?" मार्था ल जवाब दये, "हे प्रभु, मि विश्वास करदु कि तु पिता परमेश्वर कु नौंनो मसीह छै।"

तब मरियम ऐ। वीं ल यीशु का खुटों मा पोड़ी के बोलि, "हे प्रभु, जु तु इख हूंदी त मेरु भैय नि मुरदो।" यीशु ल वे बट्टी पूछि, "तिल लाजर तैं कख रखयूं च?" ऊंल वे तैं बतै, "कब्र मा। औ अर देखि ले।" तब यीशु रूंण लगि गै।

व कब्र एक गुफा मा छै जैका द्वार पर एक ढुंगो लगयूं छो। जब यीशु कब्र पर पौंछि त ऊंल वे बट्टी बोलि, " ढुंगा तैं हटे द्या।" पर मार्था ल बोलि, "वे तैं मुरयां आज चार दिन हवे गैनी। वे मा बट्टी त अब बास आंण लगि गै होली।"

यीशु ल जवाब दये, "क्य मिल त्वे बट्टी नि बोलि छो कि जु तुम मि पर विश्वास कैरा त पिता परमेश्वर की सामर्थ तैं दिखला?" इलै ऊंल ढुंगा तैं हटे दींनि।

तब यीशु ल मथि स्वर्ग का जनै देखि के बोलि, "हे पिता, मेरी सूंनणु कु मि तेरु धन्यवाद करदु। मि जंणदु छो कि तु हमेशा मेरी सुणदी छै, पर मिल इख खड़ा यूं सभि लुखुं की मदद कनु कु बोलि कि यु विश्वास कैरा कि तिल मि तैं भेजि।" तब यीशु ल आवाज लगै, "हे लाजर भैर औ!"

तब लाजर भैर निकली ऐ! उ अभि भि कफन मा लिपटयूं छो। यीशु ल वे बट्टी बोलि, "ये कफन तैं निकलण मा वेकी मदद कैर अर वे तैं आजाद कर।" ये चमत्कार का कारण भौत सा यहूदियों ल यीशु पर विश्वास कैरी।

पर यहूदियों का धार्मिक अगवा यीशु बट्टी जलण लगिनि, इलै योजना बनांण कु एक दगड़ी कठ्ठा हवीनि कि कन कै यीशु अर लाजर तैं मारि डाला।