38. यीशु तैं पकडवै जांण

हर साल, यहूदी लोग फसह कु त्यौहार मणांदा छा। यु एक खुशी कु त्यौहार छो कि कई सालों पैली पिता परमेश्वर ल ऊंका पूर्वजों तैं मिस्र की गुलामी बट्टी यहूदियों तैं छुडै छो। लगभग तीन साल बाद यीशु ल प्रचार कन अर सिखांण शुरू कैरी। यीशु ल अपड़ा चेलों तैं बतै कि उ ऊं दगड़ी यरूशलेम मा फसह कु त्यौहार मनांण चांद, अर यु भि कि उ उख मरे जालो।

यीशु का चेलों मा एक यहूदा नौं को आदिम छो। यहूदा प्रेरितों कु धन की थैली रखण कु प्रभारी छो, पर अक्सर उ वें थैली मा बट्टी पैसों तैं निकाली दींद छो। यीशु अर चेलों ल यरूशलेम मा पौछणा का बाद यहूदा यहूदी अगवों मा गै। वेल धन का बदला मा यीशु तैं ऊंका हथ पकडवांण कु सौदा कैरी। उ जंणदु छो कि यहूदी अगवा स्वीकार नि कैरी सकदा छा कि यीशु ही मसीह च। उ जंणदु छो कि उ वे तैं मारि डलण चांदा छिनी।

महायाजक ल बुल्ण पर यहूदी अगवों ल यीशु तैं ऊंका हथ मा पकडांण कु यहूदा तैं तीस चंदी का सिक्का दींनि। यु ठिक इन ही हवे जन कि भविष्यवक्ता ल बोलि छो कि होलो। यहूदा मांणी गै अर धन ले के चलि गै। उ यीशु तैं गिरफतार कन मा ऊं की मदद कनु कु कै मौके की तलाश कन लगि गै।

यरूशलेम मा, यीशु ल अपड़ा चेलों का दगड़ी फसह कु त्यौहार मणै। फसह का भोज का दौरान, यीशु ल रुठी ले के तोड़ी। वेल बोलि, "ये तैं ल्या अर खावा। या मेरी देह च जु मि तुम कु दींणु छो। ऐ तैं मेरी याद मा करयां।" इन के यीशु ल बोलि, कि उ ऊं लुखुं कु मोरि जालो, मतलब ऊंकु उ अपड़ी देह तैं बलि चढै दयालो।

फिर यीशु ल एक दाखरस कु प्याला लये अर बोलि, "ये तैं प्या। यु नई वाचा कु मेरु ल्वे च जु कि मि उड़ेललु कि पिता परमेश्वर तुम्हरा पापों तैं माफ करलो। हर बार ये तैं पींण बगत मेरी याद मा इन ही किया कैरा जु मि अभि कनु छो।"

तब यीशु ल अपड़ा चेलों मा बोलि, "तुम मा बट्टी एक आदिम मि तैं पकडालो।" चेला चौंकी गैनी, अर पुछण लगि गैनी कि कु इन काम करलो। यीशु ल बोलि, "मि तैं पकडौण वला आदिम उ च जै तैं मि यु रुठी कु टुकड़ा दींदु।" तब वेल उ रुठी कु टुकड़ा यहूदा तैं दींनि।

वीं रुठी तैं लींण का बाद, यहूदा मा शैतान समै गै। यहूदा निकली के यीशु तै गिरफ्तार कनु कु यहूदी अगवों की मदद कनु कु चलि गै। यु रात कु बगत छो।

खांणु खांण का बाद, यीशु अर वेका चेला जैतून डांडा का जनै चलि गैनी। यीशु ल बोलि, "तुम सभि आज रात मि तैं छोड़ी दीला। यु लिख्युं च, 'मि चरवाहा तैं मारि दयुलु अर सभि ढिबरा तितर-बितर हवे जाली।'"

पतरस ल जवाब दये, " जु सभि त्वे तैं छोड़ी भि द्या, मि त्वे तैं नि छुडलु!" तब यीशु ल पतरस बट्टी बोलि, "शैतान तुम सभियूं तैं ले लींण चांद, पर हे पतरस, मि त्वे कु प्रार्थना कैरी की तु विश्वास बट्टी भटकी नि जा। फिर भि, आज की रात, मैर का बांग दींण से पैली तू तीन बार मना करिलि की तु मि तैं जंणदी भि नि छै।"

पतरस ल तब यीशु बट्टी बोलि, "चाहे मि मोरि भि जौ, मि कभि भि तेरु इन्कार नि करुलु!" बक्की का सभि चेलों ल भि इन ही बोलि।

तब यीशु अपड़ा चेलों का दगड़ी गतसमनी नौं की जगह पर गै। यीशु ल अपड़ा चेलों बट्टी प्रार्थना कनु कु बोलि कि शैतान ऊंकी अजमेश नि कैरो। तब यीशु अफ प्रार्थना कनु कु चलि गै।

यीशु ल तीन बार प्रार्थना कैरी, "हे पिता, जु हवे साक त किरपा कैरी के यु दुःख कु प्याला पींणु कु मि तैं नि रोक। पर जु लुखुं का पाप माफ किये जांण कु कुई और रस्ता नि च, त तेरी ही इच्छा पूरी हो।" यीशु भौत व्याकुल छो अर वेको पसीना ल्वे की बूंदों का जन छो। वे तैं सामर्थ दींणु कु पिता परमेश्वर ल एक स्वर्गदूत तैं भेजि।

हर बार प्रार्थना का बाद, यीशु अपड़ा चेलों मा वापस ऐ, पर उ सैय गै छा। जब यीशु तिसरी बार लौटी त यीशु ल बोलि, "जागी जा! मेरु पकडांण वलो इख ऐ गै।"

यहूदी अगवों, सिपैयूं, अर एक बड़ी भीड़ का दगड़ी यहूदा भि ऐ। ऊंकी तलवार अर डंडा लीयां छा। यहूदा ल यीशु मा ऐ के वे बट्टी बोलि, "हे गुरु, नमस्कार," अर वे तैं चूमी। वेल गिरफ्तार किये जांण वला आदिम तैं यहूदी अगवों पर प्रगट कनु कु इन ही कैरी छो। तब यीशु ल बोलि, "हे यहूदा, क्य तु एक चुम्बन ल मि तैं पकडोणी छै?"

जब उ सिपै यीशु तैं पकडणां छा, त पतरस ल अपड़ी तलवार निकाली अर महायाजक का एक नौकर कु कनदूड काटी दींनि। यीशु ल बोलि, "तलवार तैं दूर धार! मि अपड़ा पिता बट्टी मेरा बचाव् कनु कु स्वर्गदूतों की एक सेना कु बिनती कैर सकदु छो। पर मि तैं मेरा पिता की बात मनण।" तब यीशु ल वे आदिम का कनदूड तैं खूब कैरी दींनि। तब उ सभि चेला भागी गैनी।