39. यीशु पर मुकदमा चलद

अब यु अधा राति कु बगत छो। उ सिपै यीशु तैं महायाजक का घौर ली गैनी, किलैकि उ यीशु बट्टी सवाल कन चांदा छा। पतरस दूर बट्टी ही ऊंको पिछा कन चांदु छो। जब सिपै यीशु तैं घौर मा लैनी, त पतरस भैर रुकी के अफ तैं आज बट्टी गर्म कन लगि गै।

घौर का भितर, यहूदी अगवों ल यीशु पर मुकदमा चले। उ यीशु का विरुद्ध झूठी बातों तैं बुल्ण कु भौत सा झूठा गवाहों तैं ले के ऐनी। जबकि, ऊंकी बात एक-दूसरा बट्टी सहमत नि छै, इलै यहूदी अगवा यु साबित नि कैर सकिनि कि उ कै बात कु दोषी च। यीशु ल कुछ नि बोलि।

आखिर मा, महायाजक ल सीधा यीशु का तरपां देखि के बोलि, "हम तैं बतौ कि क्य तु ही ज्यून्दा परमेश्वर कु नौंनो मसीह छै?"

यीशु ल बोलि, "मि छों, अर तुम मि तैं पिता परमेश्वर का दगड़ी बैठयूं अर स्वर्ग बट्टी आंद दिखिला।" महायाजक ल अपड़ा कपड़ा फाड दींनि किलैकि जु यीशु ल बोलि उ वीं बात पर भौत गुस्सा हवीनि। उ हैंका अगवों पर चिलै, "हम तैं यु बतांणु कु कै हैंका गवाह की जरूरत नि च कि ये आदिम ल क्य कैरी! तुम ल अफ ही वे तैं यु बुल्द सूंणैले कि उ पिता परमेश्वर कु नौंनो च। वेका बारा मा तुम्हरो क्य विचार च?"

सब यहूदी अगवों ल महायाजक तैं जवाब दींनि, "उ मरेण का लै च!" तब ऊंल यीशु की आंखों पर पट्टी बांधि दींनि, वे पर थूकी, वे तैं मारि, अर वेको मजाक बंणै।

अर पतरस, जब वे घौर का भैर इन्तेजार कनु छो।तब एक नौकरयांण ल वे तैं देखि। वीं ल वे बट्टी बोलि, "तू भि त यीशु का दगड़ी ही छै!" पतरस ल मना कैरी दींनि। बाद मा, कै हैंकी लडकी ल ईं बात तैं बोलि, अर पतरस ल फिर से मना कैरी दींनि। आखीर मा, कुछ लुखुं ल बोलि, "हम जंणदा छा कि तु यीशु का दगड़ी छै किलैकि तुम द्वी गलील बट्टी ही छा।"

तब परसर ल बोलि, "जु मि ये मनिख तैं जंणदु छो त पिता परमेश्वर मि तैं दंड द्यो!" तुरंत ही पतरस का ईं शपथ खांण का बाद, एक मुर्गा ल बांग दये। यीशु ल पिछनै मुडी के पतरस तैं देखि।

पतरस उख बट्टी चलि गै अर भंकुरै- भंकुरै के रुण लगि गै। वे बगत, यीशु तैं पकडांण वलो यहूदा ल देखि कि यहूदी अगवों ल यीशु तैं मौत की सजा दींनि। यहूदा भौत ही दुखी हवे गै अर जै के अफ तैं मारि दींनि।

अब वे देश कु राज्याल पिलातुस छो। उ रोम कु काम करदु छो। यहूदी अगवा यीशु तैं वे मा ले के ऐ। उ चांदु छो कि पिलातुस वे तैं मौत की सजा दयो अर वे तैं मारि डालो। तब पिलातुस ल यीशु बट्टी पुछि, "क्य तु यहूदियों कु राजा छै?"

यीशु ल जवाब दींनि, "तिल सच ही बोलि। पर मेरु राज्य इख धरती कु नि च। जु हूंद त मेरा नौकर मि कु लडै करदा। मि पृथ्वी पर पिता परमेश्वर का बारा मा सच बनांण कु अयु। हर एक आदिम जु सच बट्टी प्रेम करद उ मेरी सुणदु।" पिलातुस ल बोलि, "त सच क्य च?"

यीशु का दगड़ी बात कन का बाद, पिलातुस ल भैर भीड़ मा जै के बोलि, "मि इन कुई कारण नि पांदु कि यु मनिख मरे जांण का योग्य हो।"पर यहूदी अगवों अर भीड़ ल चिलै के बोलि, " वे तैं सूली पर चढै द्या!" पिलातुस ल जवाब दये, "उ कुछ भी गलत कन कु दोषी नि च।" पर उ और भि ऊंची आवाज मा चिलांण लगि गैनी। तब पिलातुस ल तिसरी बार बोलि, "उ दोषी नि च!"

पिलातुस डैरी गै कि उ भीड़ दंगा शुरू कनि च, इलै उ अपड़ा सिपैयूं द्वारा यीशु तैं सूली पर चढ़ांण कु मांणी गै। रोमी सिपैयूं ल यीशु तैं कोड़ा लगैनि, अर वे तैं राजकीय कपड़ा पैरेनि, अर वेका मुंड मा कांडों कु मुकुट रखि। तब उ यु बोलि के वेको मजाक बनांण लगि गैनी, "देखा, यहूदियों कु राजा!"