40. यीशु तैं सूली पर चढ़ये जांद

यीशु को मजाक बनांण का बाद, सिपै वे तैं सूली पर चढ़ांणु कु ली गैनी। ऊंल यीशु की सूली तैं वे बट्टी ही उठवे ज्यां पर वे तैं मुरण छो।

उ सिपै यीशु तैं वीं जगह पर ली गैनी जु "खोपड़ी" कहलांदी छै अर वेका हथो अर खुट्टों तैं सूली पर ठोकी दींनि। पर यीशु ल बोलि, "हे पिता, यूं तैं माफ कैर, किलैकि यु नि जंणदींनि कि यु क्य कना छिनी ।" ऊंल एक तख्ती तैं वेका मुंड का मथी टांकी दींनि। वे पर लिख्युं छो, "यहूदियों कु राजा।" पिलातुस ल ऊं बट्टी यु ही लिखणु कु बोलि छो।

तब सिपैयूं ल यीशु का कपड़ों कु चिठ्ठी डाली। जब ऊंल इन कैरी त ऊंल वीं भविश्यवाणी तैं पूरो कैरी जु बुल्दी छै, "ऊंल मेरा कपड़ों तैं आपस मा बांटी दींनि, अर मेरा कपड़ों कु चिठ्ठी डलिनि।"

उख द्वी डाकू भि छा, जौं तैं सिपैयूं ल वे ही बगत सूली पर चढ़ै छो। ऊंल यीशु तैं द्वी तरपां रखि छो। ऊंमा बट्टी एक डाकू ल यीशु कु मजाक बंणै, पर दूसरा ल बोलि, "क्य तु नि डरदी कि पिता परमेश्वर त्वे तैं दंड दयालो? हम ता अपड़ा बुरा कामों का दोषी छा, पर यु आदिम त निर्दोष च।" फिर वेल यीशु बट्टी बोलि, "जब तु अपड़ा राज्य मा ऐली त किरपा कैरी के मि तैं भि याद रखि।" यीशु ल जवाब दये, "आज ही तु मि दगड़ी स्वर्गलोक मा हवीलि।"

यहूदी अगवों अर भीड़ का हैंका लुखुं ल यीशु कु मजाक बंणै। ऊंल यीशु बट्टी बोलि, "जु तु परमेश्वर कु नौंनो छै, त सूली बट्टी मूड़ी उतरी के औ अर अफ तैं बचे ले! तब हम त्वे पर विश्वास करुला।"

तब वे सैरा देश कु आसमान पूरा ढंग से कालो हवे गै, जबकि उ दिन- दोपेर कु बगत छो। अर तीन घंटा तक इन ही अंधेरु रै।

तब यीशु ल पुकारी के बोलि, "पूरो हो! हे पिता, मि अपड़ी आत्मा तेरा हथ मा सौंपणी छो।" तब वेल मुंड तैं झुके के अर अपड़ा प्राणों तैं छोड़ी दींनि। जब उ मोरि त एक भूकम्प ऐ। उ बड़ो पर्दा जु पिता परमेश्वर की हूजूरी बट्टी लुखुं तैं अलग करदु छो मथि बट्टी मूड़ी तक फटी गै अर वेका द्वी हिस्सा हवे गैनी।

अपड़ी मौत का द्वारा, यीशु ल लुखुं कु पिता परमेश्वर मा आंणु कु रस्ता खोलि दींनि। जब यीशु की चौकिदारी कन वला एक सिपै ल जु कुछ हवे छो यु सभ देखि त वेल बोलि, "सच मा, यु मनिख निर्दोष छो। यु पिता परमेश्वर कु नौंनो च।"

तब यूसुफ अर नीकुदेमुस नौं का द्वी यहूदी अगवा ऐनी। उ विश्वास करदा छा कि यीशु ही मसीह च। ऊंल पिलातुस बट्टी यीशु की देह तैं मांगी। ऊंल वेका देह तैं कपड़ों मा लपेटी। तब उ वे तैं एक पोड मा बंणी कब्र मा ली गैनी अर वे तैं उख रख दींनि। तब ऊंल वे कब्र का द्वार तैं बंद कैरी दींनि अर एक बड़ो ढुंगो वे पर रख दींनि।