41. पिता परमेश्वर यीशु तैं मुर्दों मा बट्टी ज्यून्दो करदु

सिपैयूं द्वारा यीशु तै सूली पर चढ़ये जांणा का बाद, यहूदी अगवों ल पिलातुस बट्टी बोलि, "वे झूठा, यीशु ल बोलि छो कि उ तीन दिनों का बाद मुर्दों मा बट्टी ज्यून्दो हवे जालो। कै तैं यु देखणु कु कब्र की देख-भाल कन होली कि वेक चेला वेकी देह तैं चोरी के नि ली जौनु। जु उ इन कैरा त उ बुलला कि उ मुर्दों मा बट्टी ज्यून्दो हवे गै।"

पिलातुस ल बोलि, "कुछ सिपैयूं तैं ली जावा, अर जन तुम कैर साका उन कब्र की देख रेख कैरा।" इलै ऊंल वीं कब्र मा द्वार पर एक ढुंगै की मोहर लगै दींनि। ऊंल उख देख रेख कनु कु उख कुछ सिपैयूं तैं भि बैठे दींनि कि कुई देह तैं चोरी के नि ली जौ।

यीशु का मुरणा का बाद का दिन विश्राम कु दिन छो। कुई भि विश्राम का दिन काम नि करदु छो, इलै यीशु को कुई भि दगड़िया करब पर नि ऐ छो। पर विश्राम का दिन का बाद, सुबेर ले के, कुछ जनना यीशु की कब्र पर जांणु कु तैयार हवीनि। उ वेकी देह पर और भि खुशबूदार पदार्थ लगांण चांदा छा।

ऊं जननों का पौंछण से पैली, कब्र पर एक बड़ो भूकम्प हवे। स्वर्ग बट्टी एक स्वर्गदूत ल ऐ के वे ढुंगा तैं लुढकै दींनि जु कब्र का द्वार तैं ढकै के छो अर वे पर बैठी गै। यु स्वर्गदूत उज्यला का जन चमकणु छो। कब्र पर जु सिपै छा ऊंल देखि। उ इथग डैरी गै छा कि मुर्दों का जन धरती पर गिरी गै छा।

जब उ जनना कब्र पर पौंछिनि त वे स्वर्गदूत ल ऊं बट्टी बोलि, "नि डैरा। यीशु इख नि च। उ मुर्दों मा बट्टी ज्यून्दो हवे गै, जन कि वेल बोलि छो कि उ ज्यून्दो हवे जालो! कब्र मा खोजा अर देखा।" ऊं जननों ल कब्र का भितर अर जख यीशु की देह रखि छै खोजी अर देखि कि वेकी देह उख नि च!

तब वे स्वर्गदूत ल ऊं जननों बट्टी बोलि, "जै के ऊं चेलों तैं बतावा, 'यीशु मुर्दों मा बट्टी ज्यून्दो हवे गै अर उ तुम से अगनै-अगनै गलील कु जालो।'"

उ जनना चौंकी गैनी अर भौत खुश हवीनि। उ चेलों तैं यु शुभ संदेश सुनांनु कु भगिनि।

जब उ जनना चेलों तैं यु शुभ संदेश बतांणु कु अपड़ा रस्ता पर छै, त यीशु ऊंका समणी प्रगट हवे। उ वेका खुटों पर गिरिगे। तब यीशु ल बोलि, "नि डैरा। जै के मेरा चेलों बट्टी गलील जांणु कु बोला। उ उख मि तैं दिखला।"