42. यीशु स्वर्ग मा लौटी जांद

जै दिन पिता परमेश्वर ल यीशु तैं मुर्दों मा बट्टी ज्यूंदो कैरी छो, वेका द्वी चेला समणी का गौं मा जांणा छा। चलदी-चलदी जु यीशु का दगड़ी हवे छो। अर वेका बारा मा बात कना छा, ऊं तैं आशा छै कि उ मसीह च, पर तब भि उ मरे गै छो। अब उ जनना भि बुलदींनि कि उ फिर से ज्यूंदो हवे गै उ नि जंणदा छा कि कीं बात पर विश्वास कन।

यीशु ल ऊं दगड़ी ऐ के चलण शुरू कैरी, पर उ वे तैं पैछांण नि सकिनि। वेल पूछि कि उ कै बारा मा बात कना छिनी। ऊंल वे तैं पिछ्ला दिनों मा यीशु का दगड़ी हुयी घटना का बारा मा बतै। ऊंल सोचि कि उ कै परदेशी का दगड़ी बात कना छिनी जु नि जंणदा छा कि यरूशलेम मा क्य हवे छो।

तब यीशु ल ऊं तैं समझै कि पिता परमेश्वर का वचन मसीह का बार मा क्य बुल्द। भौत पैली, भविष्यवक्ताओं ल बोलि छो कि बुरा लोग मसीह तैं सताला अर मारि डलला। पर भविष्यवक्ताओं ल यु भि बोलि छो कि उ तिसरा दिन ज्यूंदो हवे जालो।

जब उ वे नगर मा पौंछिनि जख उ द्वी आदिम ठैरण चांदा छा, तब तक लगभग रुमुक हवे गै छै। ऊंल यीशु तैं अफ दगड़ी रुकणु` कु बोलि, तब उ वे दगड़ी एक घर मा गै। अपड़ा शाम बगत का खांणु कु उ बैठी गैनी। यीशु ल एक रूठी तैं ले के ऊंकु पिता परमेश्वर कु धन्यवाद दये, अर फिर वे तैं तोड़ी। तब तुरंत, ऊंल जांण लींनि कि उ यीशु छो।पर वे ही बगत, उ ऊंका समणी बट्टी लापता हवे गै।

ऊं द्वी आदिमों ल एक दुसरा बट्टी बोलि, "उ यीशु छो! इलै जब वेल हम तैं पिता परमेश्वर का वचन तैं समझै त जम भौत खुश छा!" तब तुरंत, उ निकली के वापस यरूशलेम कु गैनी। जब उ पौंछिनी त ऊंल चेलों तैं बतै, "यीशु ज्यूंदो च! हम ल वे तैं देखि!"

जब चेला बात कना छा, यीशु अचानक से वे कमरा मा ऊंका समणी प्रगट हवे। वेल बोलि तुम तैं शान्ति मिलो!" चेलों ल सोचि कि उ कुई भूत च, पर यीशु ल बोलि, "तुम किलै डरणा छा? तुम यु किलै नि सुचदां कि यु सचमुच मा मि यीशु ही छों? मेरा हथ अर खुटों तैं देखा। भूतों मा शरीर नि हूंद जन मि म च।" यु दिखणु कु कि उ कुई भूत नि च, वेल खांणु कु कुछ मांगी। ऊंल वे तैं एक माछो कु टुकड़ा दींनि, अर वेल वे तैं खै दींनि।

यीशु ल बोलि, "मेरा बारा मा पिता परमेश्वर का वचन मा जु कुछ भि बुलयूं च उ पूरो होलो। मिल तुम तैं बतै येले छो कि यांको हूंण जरूरी च।" तब यीशु ल ऊं तैं पिता परमेश्वर का वचन तैं अच्छे से समझै। वेल बोलि, "भौत पैली भविष्यवक्ताओं ल लिखी छो कि मि, मसीह तैं दुःख उठांण पुड़लो, मुरण होलो अर फिर तिसरा दिन मुर्दों मा बट्टी ज्यूंदो हूंण पुडलो।"

"ऊं भविष्यवक्ताओं ल यु भि लिखी छो कि मेरा चेला पिता परमेश्वर का वचन कु प्रचार करला। उ हर एक तैं पश्चताप कनु कु बुलला। जु उ इन करदा त पिता परमेश्वर ऊंका पापों तैं माफ करलो। मेरा चेला ये समाचार कु प्रचार यरूशलेम शहर बट्टी शुरू करला। तब उ सभि जगह म अर सभि जातियों मा जाला। तुम लोग मेरी हर बात अर हर कामों का गवाह छा जु मिल कैरी, अर वेका भि जु मि दगड़ी हवे।"

अगला चलीस दिनों का भितर, यीशु अपड़ा चेलों पर कई बार प्रगट हवे। एक बार त उ एक ही बगत मा 500 से भि ज्यादा लुखुं पर प्रगट हवे! वेल अपड़ा चेलों पर कई बार साबित कैरी कि उ ज्यूंदो च, अर वेल ऊं तैं पिता परमेश्वर का राज्य का बारा मा सिखै।

यीशु ल अपड़ा चेलों बट्टी बोलि, "पिता परमेश्वर ल मि तैं स्वर्ग अर धरती का हर एक आदिम पर राज्य कनु को अधिकार दियूं च। इलै अब मि तुम बट्टी बुल्दु: जै के सभि जातियों का लुखुं तैं चेला बंणा। इन कनु कु, तुम तैं ऊं तैं पिता, नौंना, अर पवित्र आत्मा का नौं बट्टी बपतिस्मा दींण होलो। जु कुछ भि मिल तुम तैं आज्ञा दींनि ऊं सभि बातों तैं मनण भि तुम तैं ऊं तैं सिखांण होलो। याद रखा, मि हमेशा तुम दगड़ी छो।"

यीशु का मुर्दों मा बट्टी ज्यूंदा हूंणा का चालीस दिनों का बाद, वेल अपड़ा चेलों मा बोलि, "जब तक कि मेरु पिता तुम तैं सामर्थ नि दयो तब तक यरूशलेम मा ठैरयां रावा। उ तुम पर पवित्र आत्मा भिजण का द्वारा इन करलो।" जब यीशु स्वर्ग मा चलि गै, अर एक बादल ल वे तैं ऊंकी नजरों मा बट्टी छिपै दींनि। स्वर्ग मा यीशु सभि चीजों पर राज्य कनु कु पिता परमेश्वर का दैंणी तरपां बैठी गै।