43. मंडलियों की शुरुवात हूंण

यीशु का स्वर्ग म वापस जांणा का बाद, चेला यरूशलेम मा ही रुकी गैनी जन कि यीशु ल ऊं तैं कनै की आज्ञा दये छै। उखा का विश्वासी लोग लगातार एक साथ प्रार्थना कनु कु कठ्ठा हूंया छा।

हर साल, फसल का त्यौहार का 50 दिनों का बाद, यहूदी लोग पिन्तेकुस्त नौं का एक विशेष दिन तैं मंणांदा छा। पिन्तेकुस्त उ दिन छो जब यहूदी लोग ग्यूं की लवै मणांदा छा। सैरी दुनिया बट्टी यहूदी लोग पिन्तेकुस्त का दिन तैं मनांणु कु यरूशलेम मा ऐ छा। ये साल, पिन्तेकुस्त मनांण कु बगत यीशु का स्वर्ग चलि जांण का लगभग एक हफ्ता का बाद ऐ छो। " जै बगत सैरा विश्वासी लोग एक साथ कठ्ठा हवे छा, त जै घौर मा उ छा त अचानक उ घौर तेज बथौं की आवाज से भुरे गै। तब आगी की सी लपटों की जीभ ऊं मा बट्टी हर एक पर ऐ के ठैरी गै। उ सभि पवित्र आत्मा बट्टी भुरै गैनी अर ऊंल अन्य भाषाओं मा पिता परमेश्वर की स्तुति कैरी। यु भाषाओँ मा जूं तैं बुल्ण कु पवित्र आत्मा ल सक्षम कैरी। "

जब यरूशलेम मा रांण वला लुखुं ल वे हल्ला तैं सूंणि, त उ भीड़ का रूप मा यु दिखणु कु एक साथ ऐनी कि क्य हूंणु च। ऊंल विश्वासियों तैं पिता परमेश्वर का द्वारा कियां बड़ा-बड़ा कामों कु प्रचार करदी सूंणि। उ हैरान छा किलैकि उ यूं कामों तैं अपड़ी ही भाषा मा सुनणा छा।

यूं मा बट्टी कुछ लुखुं ल बोलि कि उ चेला नशा म छा। पर पतरस खड़ो हवे अर ऊं बट्टी बोलि, "मेरी बातों तैं सूंणा! यु लोग नशा मा नि छिनी! यांका बदला, जु तुम दिखणा छा उ ही च जु योएल भविष्यवक्ता ल बोलि: पिता परमेश्वर ल बोलि, 'आखिर का दिनों मा, मि अपड़ो आत्मा उडेलूलु।'"

"हे इस्राएली आदिमों, यीशु एक इन आदिम छो जैल यु दिखांणु कु कि उ कू च भौत सी अनोखा काम करिनि। वेल पिता परमेश्वर की सामर्थ बट्टी भौत सी अदभुत काम करिनि। तुम यु जंणदा छा, किलैकि तुमल यूं कामों तैं देखि। पर तुम ल वे तैं सूली पर चढै दींनि!"

"यीशु मोरि गै पर पिता परमेश्वर ल वे तैं मुर्दों मा बट्टी ज्यूंदो कैरी दींनि। ईं ल वीं बात तैं पूरो कैरी दींनि जै तैं एक भविष्यवक्ता ल लिखी छो: 'तु अपड़ा पवित्र जन तैं कब्र मा सड़ण नि दीलि।' हम गवाह छा कि पिता परमेश्वर ल यीशु तैं फिर से ज्यूंदो कैरी दींनि।"

"पिता परमेश्वर ल अब यीशु तैं अपड़ी दैंणी तरपां बैठी के वे तैं आदर दींनि। अर यीशु ल हम कु पवित्र आत्मा भेजि जन कि वेल वादा कैरी छो कि उ भिजलो। पवित्र आत्मा ही ऊं कामों तैं हूंण दींद जौं तैं तुम दिखणां अर सुनणां छा।"

"तुम ल वे मनिख, यीशु तैं सूली पर चढ़ै दींनि। पर विश्वास कैरा कि पिता परमेश्वर ल यीशु तैं सभि चीजों पर प्रभु अर मसीह द्वी ठहरै!"

पतरस की सुनण वला लोग वेकी बातों का कारण भितर तक हिली गैनी। इलै ऊंल पतरस अर चेलों बट्टी पूछि, "हे भयों, हम तैं क्य कन चयणु च?"

पतरस ल ऊं तैं जवाब दींनि, "तुम मा बट्टी हर एक अपड़ा पापों कु पश्चताप कैरू कि पिता परमेश्वर तुम्हरा पापों तैं माफ कैरो, अर यीशु मसीह का नौ बट्टी बपतिस्मा ले। तब उ तुम तैं वरदान का रूप मा पवित्र आत्मा भि दयुलु।"

पतरस ल जु बोलि वे पर लगभग 3,000 लुखुं ल विश्वास कैरी अर यीशु का चेला बंणि गैनी। ऊंल बपतिस्मा लये अर यरूशलेम की मण्डलि कु हिस्सा बंणि गैनी।

जब प्ररितों ल ऊं तैं शिक्षा दींनि त विश्वासियों ल लगातार सूंणि। उ अक्सर मिलदा छा अर एक साथ खांणु खांद छा, अर ऊंल अक्सर एक-दूसरा कु प्रार्थना कैरी। ऊंल मिली के पिता परमेश्वर की स्तुति कैरी अर जु कुछ भि ऊं मा छा ऊंल एक दुसरा बट्टी बांटी। नगर कु हर एक आदिम ऊं कु अच्छा विचार रखदा छा। हर रोज, ज्यादा से ज्यादा लोग विश्वासी बंणदी गैनी।