4. अब्राहम का दगड़ी पिता परमेश्वर की वाचा

बाढ़ आंण का भौत साल बाद, दुनिया मा भौत सा लोग रौंदा छा, अर ऊंल फिर दुबरा अर एक हैंका का विरुध मा पाप कैरी। किलैकि उ भौत भाषाओं तैं बुल्दा छा, इलै उ कठ्ठा ह्वीनि अर अपड़ो ही नगर बनांण लगि गैनी जन पिता परमेश्वर ल आज्ञा दये छै, वीं आज्ञा का अनुसार उ दुनिया मा नि फैलेनि।

उ भौत घमंडी छा, अर ऊं तैं कन जीवन जींण च्याणु च ये बारा मा उ पिता परमेश्वर की आज्ञा कु पालन नि कन चांद छा। इख तक कि ऊंल एक इन मीनार बनांण शुरु कैरी जु स्वर्ग तक पौछलु। पिता परमेश्वर ल देखि कि जु उ दगड़ी मिली के बुरा काम कना राला, त उ भौत पाप अर बुरा कामों तैं कना राला।

इलै पिता परमेश्वर ल ऊंकि भाषा तैं भौत सी अलग भाषाओं मा बदली दींनि अर ऊं लुखुं तैं दुनिया मा फैले दींनि। जै नगर तैं ऊंल बनांण शुरू कैरी वे कु बाबेल बुल्दींनि, ज्यांकु मतलब च "गड़बडी"।

कई सालों का बाद, पिता परमेश्वर ल अब्राहम नौ का एक आदिम बट्टी बात कैरी। पिता परमेश्वर ल वे बट्टी बोलि, "अपड़ा परिवार अर देश तैं छोड़ि के वे देश जना चलि जा, जै तैं मि त्वे तैं दिखौलु। मि त्वे तैं आशीष द्युलु अर त्वे तैं एक बड़ी जाति बणौलु। मि तेरा नौं तैं महिमा दयुलु। जु त्वे तैं आशीष द्यालो मि वे तैं आशीष द्युलु, अर जु त्वे तैं श्राप द्यालो वे तैं मि श्राप द्युलु। तेरा कारण दुनिया का हर कुल आशीष पाला।"

तब अब्राहम ल पिता परमेश्वर की आज्ञा मांणी। वेल अपड़ी जनन सारै तैं ले, अपड़ा सभि नौकरों अर अपड़ी सैरी सम्पति समेत अर उ कनान देश कु चलि गैनी जु पिता परमेश्वर ल ऊं तैं दिखै छो।

जब अब्राहम कनान पौंछि त पिता परमेश्वर ल ऊं बट्टी बोलि, "अपड़ा चौतरफ देख। मि त्वे तैं यु सैरो देश द्युलु अर तेरा वंशज हमेशा यां पर अधिकार रखला।" तब अब्राहम वे देश म चलि गै।

मलिकिसिदक नौ कु एक आदिम छो जु पिता परमेश्वर कु याजक छो। एक दिन जब अब्राहम लड़ै कना का बाद आंणु छो त मलिकिसिदक वे बट्टी मिली। मलिकिसिदक ल अब्राहम तैं आशीष दींनि अर बोलि, "सबसे बड़ो पिता परमेश्वर जु स्वर्ग अर धरती कु मालिक च उ त्वे तैं आशीष द्यो।" तब अब्राहम ल लड़ै मा जींतीं चीजों कु दशमांश मलिकिसिदक तैं दींनि।

भौत साल बीती गैनी, पर अभि भि अब्राहम अर सारै की कुई सन्तान नि ह्वे छै। पिता परमेश्वर ल अब्राहम बट्टी बात कैरी अर तब वे बट्टी वादा कैरी कि तेरु एक नौंनो होलो अर जन आसमान मा गैंणा छिनी उन ही वेका भि भौत वंशज होला। अब्राहम ल पिता परमेश्वर का वादा पर विश्वास कैरी। पिता परमेश्वर ल बतै कि अब्राहम एक धर्मी आदिम छो किलैकि वेल परमेश्वर का वादा पर विश्वास कैरी।

तब पिता परमेश्वर ल अब्राहम बट्टी वाचा बांधि। पिता परमेश्वर ल अब्राहम बट्टी यु वादा तब कैरी छै जब अब्राहम नींद मा सियूँ छो, पर उ तब भि पिता परमेश्वर तैं सूंणि सकदु छो। पिता परमेश्वर ल बोलि, "मि त्वे तैं एक तेरु अपड़ो नौंनो द्युलु। मि तेरा वंशजों तैं यु कनान देश द्युलु।" पर अभि भि अब्राहम कि कुई सन्तान नि छै।