5. वादा कु नौंनो

अब्राम अर सारै का कनान देश पौछणा का दस साल बाद, अभि तक ऊंकि क्वी सन्तान नि छै। इलै, अब्राम की जनन सारै ल वे बट्टी बोलि, "देख पिता परमेश्वर ल अभि तक मि तैं सन्तान नि दींनि, अर अब मि सन्तान पैदा कनु कु भौत बुढ्या ह्वे ग्यों अब सूंण मेरी दासी हाजिरा इख च। वीं बट्टी ब्यो कौर कि उ मि कु सन्तान पैदा कैरो।"

तब अब्राम ल हाजिरा दगड़ी ब्यो कैरी। हाजिरा कु एक नौंनो ह्वे, अर अब्राम ल वे नौंनो कु नौं इश्माएल रखि। पर सारै हाजिरा बट्टी जलन रखण लगि गै। जब इश्माएल तेरह बर्ष कु छो, पिता परमेश्वर ल तब दुबरा अब्राम दगड़ी बात कैरी।

पिता परमेश्वर ल बोलि, "मि सर्व-शक्तिमान परमेश्वर छो। मि त्वे दगड़ी एक वादा करदु।" तब अब्राम ल धरती मा पोड़ी के परमेश्वर तैं नमस्कार कैरी। पिता परमेश्वर ल अब्राम बट्टी यु भि बोलि, "तू भौत सी जातियों कु बुबा हवेलि। मि त्वे तैं अर तेरा वंशजों तैं कनान देश ऊं की अपड़ी धरती कनु कु दये दयुलु अर मि हमेशा कु ऊंको परमेश्वर हवे जौलु। त्वे तैं अपड़ा घौर का हर आदिम कु खतना कन होलो।"

"तेरी जनन सारै एक नौंना तैं जन्म दयाली –उ वादा कु नौंनो होलो। वेको नौं इसहाक रखयां। मि वेका दगड़ा अपड़ा वादा तैं पूरो करुलु अर उ एक बड़ी जाति बंणि जाली। मि इश्माएल तैं भि एक बड़ी जाति बंणौलु, पर मेरु वादा इसाहक दगड़ी रालो।" तब पिता परमेश्वर ल अब्राम कु नौं बदली के अब्राहम रखि दींनि, ज्यांको मतलब "भौतों कु बुबा "। पिता परमेश्वर ल सारै कु नौं बदली के सारा रखि दींनि, ज्यांको मतलब च "मूल ब्वे"।

वे दिन अब्राहम ल अपड़ा घौर का सभि आदिमों कु खतना करे।लगभग एक साल बाद, जब अब्राहम 100 बर्ष कु हवे अर सारा 90 बर्ष की हवे, तब सारा ल अब्राहम का नौंना तैं जन्म दींनि। जन पिता परमेश्वर ल वे बट्टी बोलि छो ऊंल वे नौंनो कु नौं इसाहक रखि।

जब इसाहक जवान हवे त पिता परमेश्वर ल अब्राहम की अजमेश कैरी की, पिता परमेश्वर ल बोलि, "अपड़ा एकलौता नौंना तैं अफ दगड़ी ले, अर वे तैं मि कु बलिदान का रूप मा मारि दये।"तब अब्राहम ल पिता परमेश्वर की आज्ञा मांणी अर अपड़ा नौंना तैं बलि कनु कु तैयार हवे गै।

जब अब्राहम अर इसाहक बलि चढाणु कु वीं जगह पर जांण लगी गै त इसाहक ल पूछि, "हे बुबा, हम मा बलि कनु कु लखडा त छिनी, पर बलिदान कनु कु चिनखो कख च?" अब्राहम ल जवाब दींनि, "मेरा नौंना, पिता परमेश्वर अफ ही बलि कनु कु चिनखो कु इन्तेजाम करलो।"

जब उ बलि कना का वीं जगह पर एनी, त अब्राहम ल इसाहक तैं बांधि के वेदी का मथि पुडे दींनि। उ अपड़ा नौंना तैं मरण ही वलो छो कि पिता परमेश्वर ल बोलि, "रुकि जा! नौंना तैं नुकसान नि पौंछो! अब मि जांणी ग्यो कि तु मेरी डौर मंणदी छै किलैकि तु अपड़ा नौंना तैं भि बलिदान कन से पिछनै नि रै।"

समणी मा ही अब्राहम ल एक खाडू देखि जु कि झिबलांण मा फंसयूं छो। इसाहक का बदला पिता परमेश्वर ल खाडू को इन्तेजाम कैरी छो। अब्राहम ल खुशी-खुशी खाडू की बलि चढै।

तब पिता परमेश्वर ल अब्राहम बट्टी बोलि, " किलैकि तू मि कु सभि कुछ दींणु कु इच्छूक छै,इख तक कि अपड़ा एकलौता नौंना तैं भि बलिदान कनु कु दे दींनि, इलै मि त्वे तैं आशीष दींणो कु वादा करदु। तेरा वंशज आसमान का गैंणो बट्टी भि ज्यादा होला। किलैकि तिल मेरी आज्ञाओं तैं मांणी इलै मि तेरा परिवार का द्वारा दुनिया का सभि कुलों तैं आशीष दयुलु।"