50. यीशु वापिस आंद

लगभग 2,000 सालों बट्टी, दुनिया मा सभि जगहों मा ज्यादा से ज्यादा लोग मसीह यीशु का बारा मा शुभ संदेश तैं सुनणा छिनी। मंडलियों की उन्नति हूंणी च यीशु ल वादा कैरी कि उ दुनिया का अंत मा वापिस आलो। जबकि अभि त उ नि ऐ, तभि भि उ अपड़ा वादा तैं पूरो करलो।

जब कि हम यीशु का वापिस लौटण कु इन्तेजार करदां, पिता परमेश्वर हम बट्टी ये ही रीति से जीवन जींण की इच्छा करद जु पवित्र च अर जु वेको आदर करदु। जब यीशु धरती पर रौंदु छो तब वेल बोलि, "मेरा चेला दुनिया भर मा सभि जगहों का लुखुं तैं पिता परमेश्वर का राज्य का बारा मा शुभ संदेश प्रचार करलो, अर तब अंत ऐ जालो।"

भौत सी जातियों ल अभि तक यीशु का बारा मा नि सूंणि। स्वर्ग मा लौटण से पैली, यीशु मसीह बट्टी ऊं लुखुं तैं शुभ संदेश सुनांणु कु बुल्द जौल वे तैं कभि नि सूंणि। वेल बोलि, "आवा अर सभि जातियों का लुखुं तैं चेला बंणा!" अर " लवै कु फसल पकी गै!"

यीशु ल यु भि बोलि, "कै आदिम कु सेवक वे आदिम बट्टी बड़ो नि हूंद। ईं दुनिया का खास लुखुं ल मि बट्टी नफरत कैरी, अर मेरा कारण उ तुम तैं भि सताला अर मारि डलला। ईं दुनिया मा तुम दुखि हवीला, पर मजबूत बंणा, किलैकि मिल शैतान तैं हरै येले जु ईं दुनिया पर राज्य करदु छो। जु तुम आखिर तक मेरा विश्वासयोग्य बंणया रैला, त पिता परमेश्वर तुम तैं बचालो!"

यीशु ल अपड़ा चेलों तैं यु समझणु कु एक कथा सुणै कि जब दुनिया का अंत होलो त लुखुं का दगड़ी क्य होलो। वेल बोलि, "कै आदिम ल अपड़ा पुगडा मा अच्छो बीज बूती। जब उ सियूं छो त वेको दुश्मन ऐ अर ग्यूं का बीजों का बीच मा जंगली पौधों तैं बूती दींनि, अर फिर उ चलि गै।"

"जब पौधा अंकुरित हवीनि त सेवकों ल वे आदिम बट्टी बोलि, 'हे स्वामी, तिल त अपड़ा पुगडा मा अच्छो बीज बूती छो। त फिर ये मा जंगली पौधा किलै छिनी?' वे आदिम ल जवाब दये, 'बस मेरु दुश्मन ही वे तैं बुतण चालो। यु मेरु कुई दुश्मन च जैल कन कैरी।'"

"ऊं सेवकों ल अपड़ा स्वामी तैं जवाब दींनि, 'क्य हम तैं जंगली डालों तैं उखाडी दींण चयणु च?' वे स्वामी ल बोलि, 'न। जु तुम इन करिला त तुम कुछ ग्यूं तैं भी उखाडी दीला। लवै का बगत तक इन्तेजार कैरा। तब जंगली डालों तैं गठों मा इकठा कैरी द्या कि तुम ऊं तैं फूकी द्या। पर ग्यूं तैं मेरा डोरा मा ले के आवा।'"

चेलों ल ईं कथा कु मतलब नि समझी, इलै ऊंल यीशु बट्टी ऊं तैं समझाणी की विनती कैरी। यीशु ल बोलि, "अच्छो बीज बुतण वलो आदिम मसीह तैं जाहिर करद। पुंगडा दुनिया तैं जाहिर करद। अच्छो बीज पिता परमेश्वर का राज्य का लुखुं तैं जाहिर करद।"

"जंगली पौधा वे दुष्ट आदिम, शैतान का लुखुं तैं जाहिर करद। वे आदिम कु दुश्मन शैतान तैं जाहिर करद, जैल जंगली पौधों तैं बुतेले छो। लवै ईं दुनिया का अंत तैं जाहिर करदी, अर लवै कन वला पिता परमेश्वर का स्वर्गदूतों तैं जाहिर करद।"

"जब दुनिया कु अंत होलो तब स्वर्गदूत ऊं सभि लुखुं तैं एक दगड़ी इकठा करलो जु शैतान का छिनी। उ स्वर्गदूत ऊं तैं एक भौत ही गर्म आग मा फेकी दयाला। उख उ लोग भयंकर स्ताव मा रवाला अर अपड़ा दांतों तैं पिसला। पर जु लोग धर्मी छिनी, जौल यीशु कु अनुसरण कैरी, उ पिता परमेश्वर का राज्य मा सूरज का जन चमकला।"

यीशु ल यू भि बोलि कि दुनिया का अंत हूंण से पैली धरती पर लौटलो। उ उन ही वापिस आलो जन उ स्वर्ग मा गै छो। मतलब, वे मा हकीकत मा एक देह होली, अर उ आसमान मा बादलों पर सवार हवे के आलो। जब यीशु वापस आलो, त हर एक मसीही मा जु मोरि गै ज्यूंदा हवे जाला अर वे बट्टी आसमान मा मिलला।

तब जु मसीही अभि भि ज्यूंदा छिनी उ आसमान मा उठये जाला अर ऊं दुसरा मसीहीयों का दगड़ी मिली जाला जु मोरि के ज्यूंदा हवे जाला। उ सभि उख यीशु का दगड़ी हवाला। वेका बाद, यीशु अपड़ा लुखुं का दगड़ी रालो। जब उ एक दगड़ी रौंदींनि त ऊं मा हमेशा कु पूरी शान्ति होली।

यीशु ल वे पर विश्वास कन वला हर एक आदिम तैं एक मुकुट दयुणो को वादा कैरी। उ हमेशा कु पिता परमेश्वर का दगड़ी हर एक चीज पर राज्य करला। ऊं मा सिद्ध शान्ति होली।

पर पिता परमेश्वर ऊं सभियूं कु न्याय करलो जु यीशु पर विश्वाश नि करदींनि। उ ऊं लुखुं तैं नरक मा डाली दयालो। उख उ रवाला अर अपड़ा दांतों तैं पिसला, अर उ हमेशा दुखी हूंदी राला। कभि नि बुझण वली आग ऊं तैं लगातार जलांदी राली, अर कीड़ा ऊं तैं खांण से कभि नि रुकला।

जब यीशु वापस आलो, त उ पूरा ढंग से शैतान तैं अर वेक राज्य तैं नष्ट कैरी दयालो। उ शैतान तैं नरक मा डाली दयालो। उख शैतान हमेशा कु जल्दी रालो, ऊं सभियूं का दगड़ी जौल पिता परमेश्वर की बातों तैं मनण का बदला शैतान का पिछनै चलणों को चुनाव कैरी।

किलैकि आदम अर हव्वा ल पिता परमेश्वर की आज्ञा तैं नि मांणी छो अर पाप तैं ईं दुनिया मा ले के ऐ छा, पिता परमेश्वर ल ऊं तैं श्राप दये अर वे तैं खत्म कनो को फैसला लींनि। पर कै दिन पिता परमेश्वर एक नया स्वर्ग अर एक नई धरती की रचना कैरी जु सिद्ध होलो।

यीशु अर वेका लोग वीं नई धरती पर राला, अर उ हमेशा कु सभि चीजों पर राज्य करलो। उ लुखुं की आँखों बट्टी हर एक आंसूओं तैं पुछि द्यालु। अब कुई भि दुखी नि होलो। उ रवाला न। उ बीमार नि होला अर मुरला भि न। अर उख कुछ भि बुरै नि होली। यीशु अपड़ा राज्य पर न्याय का दगड़ी, अर शान्ति का दगड़ी राज्य करलो। उ हमेशा कु अपड़ा लुखुं का दगड़ी रालो।