49. पिता परमेश्वर कु नयो वादा

एक स्वर्गदूत ल एक जवान जनन मरियम बट्टी बोलि कि उ पिता परमेश्वर का नौंना तैं जन्म दयाली। व अभि कुवारी छै, पर पवित्र आत्मा वीं मा ऐ अर व गर्भवती हवे। वींल एक नौंना तैं जन्म दींनि जैको नौं वींल यीशु रखि। इलै, यीशु पिता परमेश्वर अर मनिख द्वीयूं कु च।

यीशु ल भौत सा चमत्कार करिनि जु दिखौदींनि कि उ पिता परमेश्वर च। उ पांणी पर चलि अर आंधि तैं शांत कैरी। वेल भौत सा बीमार लुखुं तैं भि खूब कैरी अर भौत सा लुखुं मा बट्टी भि दुष्टात्माओं तैं निकाली। वेल मुरयां लुखुं तैं ज्यूंदो कैरी दींनि, अर वेल पांच रूठी अर द्वी माछो तैं 5,000 लुखुं तैं खांणु कु पर्याप्त कैरी दींनि।

यीशु एक महान शिक्षक भि छो। जु कुछ भि वेल सिखै, उ वेल सिद्ध हवे के सिखै। जु उ लुखुं बट्टी कनु कु बुल्द उ वे तैं कन चयणु च किलैकि उ पिता परमेश्वर कु नौंना च। उदाहरण कु, वेल सिखै कि तुम तैं हैंका लुखुं तैं ठिक वे ही ढंग से प्रेम कने की जरूरत च जन तुम अफ तैं प्रेम करदा।

वेल यु भि सिखै कि तुम तैं सभि चिज्युं बट्टी ज्यादा अर सम्पति से भि ज्यादा पिता परमेश्वर तैं प्रेम कन चयणु च।

यीशु ल बोलि कि दुनिया मा के भि चीज तैं पांण से ज्यादा अच्छो च पिता परमेश्वर का राज्य मा ह्वा। वेका राज्य मा तुम कु प्रवेश कनु कु जरूरी च कि पिता परमेश्वर तुम तैं तुम्हरा पापों बट्टी बचो।

यीशु ल बोलि कि कुछ लोग वे तैं स्वीकार करला। पिता परमेश्वर ऊं लुखुं तैं बचालो। पर दूसरा लोग वे तैं स्वीकार नि करला। वेल यु भि बोलि कि कुछ लोग अच्छी धरती का जन छिनी, किलैकि उ यीशु का बारा मा शुभ संदेश तैं स्वीकार कैरी लिदींनि, अर पिता परमेश्वर ऊं तैं बचांदु च। पर कुछ लोग रस्ता की सकत धरती का जन छिनी। पिता परमेश्वर कु वचन बीज का जन रस्ता मा गिरदु, पर उख कुछ भि नि उगद। यु लोग यीशु का बारा मा संदेश तैं अस्वीकार कैरी दींदीनि। उ वेका राज्य मा प्रवेश कन से मना कैरी दींदीनि।

यीशु ल सिखै कि पिता परमेश्वर पापियों बट्टी भौत प्रेम करदु। उ ऊं लुखुं तैं माफ कन चांदु अर ऊं तैं अपड़ी सन्तान बनांण चांदु।

यीशु ल यु भि बतै कि पिता परमेश्वर पाप बट्टी नफरत करदु। किलैकि आदम अर हव्वा ल पाप कैरी, इलै ऊंका सारा वंशजों ल भि पाप कैरी। इलै दुनिया मा रौंण वलो हर आदिम पाप करदु अर पिता परमेश्वर बट्टी दूर च। हर आदिम पिता परमेश्वर कु दुश्मन च।

पर पिता परमेश्वर ल ईं दुनिया मा रांण वला हर एक आदिम बट्टी इन प्रेम कैरी: वेल अपड़ा एकलौता नौंना तैं दे दींनि कि पिता परमेश्वर ऊं तैं दंड नि दयो जु वे पर विश्वास करदींनि। यांका बदला, उ वेका दगड़ी हमेशा कु राला।

तुम मुरण का लैक छां, किलैकि तुम ल पाप कैरी। तुम बट्टी पिता परमेश्वर को गुस्सा हूंण ठिक ही च, यांका बदला, उ यीशु पर गुस्सा हवे। वेल यीशु तैं सूली की मौत दे के दंड दये।

यीशु ल कभि पाप नि कैरी, अर पिता परमेश्वर का दंड तैं स्वीकार कैरी। इन के ही, तुम्हरा पापों तैं अर ईं दुनिया का रांण वला हर एक जन का पापों तैं उठै के ली जांणु कु उ एक सिद्ध बलिदान छो। यीशु ल अफ तैं पिता परमेश्वर कु बलिदान कैरी दींनि, इलै पिता परमेश्वर कै भि पापी तैं, इख तक कि भयंकर पापों तैं भि माफ करद।

जब कि तुम भौत सा अच्छा कामों तैं करदा, तब भि पिता परमेश्वर तुम तैं यांका द्वारा नि बचालो। वेको दगड़िया बनणु कु इन कुछ भि नि च जु तुम कैरी सकदा। यांका बदला, तुम तैं विश्वास कन चयणु च कि यीशु पिता परमेश्वर कु नौंनो च, अर उ तुम्हरा बदला सूली पर मोरि गै, अर यु भि कि पिता परमेश्वर ल वे तैं फिर से ज्यूंदो कैरी दींनि। जु तुम यां पर विश्वास कैरा, त पिता परमेश्वर तुम्हरा पापों तैं माफ करलो।

पिता परमेश्वर वे हर आदिम तैं बचालो जु यीशु पर विश्वास करदु अर वे तैं अपड़ो प्रभु स्वीकार करदु। पर उ ऊं तैं नि बचालो जु वे पर विश्वास नि करदींनि। यां बट्टी कुई फर्क नि पुडदो कि तुम अमीर छां या गरीब, आदिम छा या जनन, बुढया छा या जवान, य तुम कख रौंदयां। पिता परमेश्वर तुम बट्टी प्रेम करदु अर चांदु च कि तुम यीशु पर विश्वास कैरा कि उ तुम्हरो दगड़िया बंणि जौ।

यीशु तुम तैं बुलांणु च कि वे पर विश्वास कैरा अर बपतिस्मा लया। किलैकि तुम विश्वास करदा कि पिता परमेश्वर कु इकलौतो नौंनो, यीशु ही मसीह च, क्य तुम विश्वास करदा छा कि तुम एक पापी छा अर यु कि तुम पिता परमेश्वर का द्वारा दंड दिये जांण का लैक छा? क्य तुम विश्वास करदा छा कि तुम्हरा पापों तैं मिटाणु कु यीशु सूली पर चढ़ी अर मोरि गै?

जु तुम यीशु पर अर जु वेल तुम दगड़ी कैरी वे पर विश्वास करदा छा, त तुम एक मसीह छा! शैतान अपड़ा अन्धकार का राज्य मा अब तुम पर राज्य नि करद। अब पिता परमेश्वर अपड़ा उज्यला का राज्य मा तुम पर राज्य कनु च। वेल तुम तैं पाप कन से रोकेले, जै तैं तुम करदा छा। वेल तुम तैं एक नयो, अच्छो जीवन दींनि।

जु तुम एक मसीही छा त जु यीशु ल कैरी वेका कारण पिता परमेश्वर ल तुम्हरा पापों तैं माफ कैरी दींनि। अब, पिता परमेश्वर एक दुश्मन की अपेक्षा तुम तैं एक परम मित्र मंणदु।

जु तुम पिता परमेश्वर का दगड़िया छा अर प्रभु यीशु का सेवक छा त तुम ऊं बातों कु पालन कनै की इच्छा करिला जु यीशु तुम तैं सिखांद। भले ही तुम एक मसीही छा, शैतान अभि भि पाप करांणु कु तुम्हरी अजमेश करलो। पर पिता परमेश्वर हमेशा उ करद जु उ बुल्दो च कि उ करलो। उ बुल्दो कि जु तुम अपड़ा पापों तैं मांणि लीला, त उ तुम तैं माफ कैरी दयालो। उ तुम तैं पाप का विरूद्ध मा लड़णै की सामर्थ दयालो।

पिता परमेश्वर तुम तैं प्रार्थना कन अर वेका वचन तैं पढ़णु कु बुल्द। उ तुम तैं हैंका विश्वासियों का दगड़ी मिली के वेकी आराधना कनु कु भि बुल्द। तुम तैं हैंका लुखुं तैं भी बतांण कि वेल तुम कु क्य कैरी। जु तुम यूं सभि कामों तैं कैरा, त तुम वेका एक पक्का दगड़िया बंणि जैला।