20. इस्राएला कि गुलाम बणंईंकर लेई गईबा होरेक पलाटुईबा
इस्राएला कि राज्य होरेक यहूदा कि राज्य दुइयो ज़ेईं-ईं परमेश्वरा विरोधन पाप किया। तेने तेस वायदेर त्रोई बिदा ज़े परमेश्वरे तेनो सा सीनै घउआ कियाति। परमेश्वरे तेनोर पश्चाताप करिबेरो होरेक फिरि अपां अराधना करिबे चेतावनी दीबेर परमेश्वरा तरफे बोलनेओर बिदा, पर तेने तेनो गप्पेयोर मनिबेंञ इंकार करि बिदा।
च़े परमेश्वरे तेनो बइरिउर तेनोर नाश करिबे द्वारे दुइयो राज्योर दंडित किया। अश्शूर एक अयक देश थिया ज़े मस्ह शक्तिशाली थिया। से अयक देशो ओनि दा न लेओरा ठो थिया। तेने अइकर इस्राएला कि राज्यर नाश करि बिदा। अश्शूरी अइकर इस्राएल राज्य कि मस्ह ज़िंऊर मारि बिदा, ज़े चाहिया से लूटि बिदा, होरेक तेस देशाकि कई लाके त्राई बिदे।
अश्शूरि-ए बदे परधाने-ए, टंगेटे मऊं, होरेक एरा घाटे मऊंओर ज़ेने कीमती सामानों बणंई बटने थिये साथे ठोक्कन करि तेनोर अश्शूर देशारि लेई गे। इस्राएला सिर्फ मिन गरीब ज़ेंञ इस्राएली छ़ुटे।
च़े अश्शूरी मऊं तेस देशन बेशिबे ओनि विदेशिओर लेई आये। तेने विदेशी तेस नगरिर फिरि बणांया। ज़ेने इस्राएली तेटि बच़ोरे थिये तेनो सा तेने ब्या किया। इनो वंशज सामरी गणुंए।
यहूदा कि राज्य कि मऊंईं कइया कि केरा परमेश्वरे तेस पूटी विश्वास न करिबे होरेक तेसी गप्प्योर न मनिबे बजे इस्राएल राज्य कि मऊंओर सज़ा दिताति। पर तेखेंईं भि तेने कनानियो कि देउओ कि मूर्तिओ कि अराधना किया। परमेश्वरे तेनोर चेतावनी दीबे ओनि परमेश्वरा तरफे बोलनेओर बिदा, पर तेने शुंईबेंञ इंकार करि बिदा।
लगभग शऊ बरियो पिच़ंञ अश्शूरी इस्राएल कि राज्यर नाश करि बिदा। परमेश्वरे बेबीलोना कि रज्ज़ा, नबूकदनेस्सरर यहूदा कि राज्य पूटी हमला करिबे ओनि बिदा। बेबीलोन एक तागती देश थिया। यहूदा कि रज्ज़ा नबूकदनेस्सरा कि परगर बणिंबेर-ओ होरेक डरोंआ ढबोआ भुगतान करिबे ओनि राजी भुई गिया।
पर केतेक्बा बर्षा पिच़ंञ, यहूदा कि रज्ज़े बेबीलोना विरोधन लड़ाई किया। बेबीलोनी पलाटुई यहूदा कि राज्य पूटी हमला करि बिदा। तेने यरुशलेम नगरा पूटी कब्ज़ा करि बिदा, मंदरर नाश करि बिदा, होरेक नगरी ओ मंदराकि खज़ानेर लूटि लेई गे।
लड़ाई करिबे कारणें यहूदा कि रज्ज़ेर सज़ा दिबे ओनि, नबूकदनेस्सराकि सैनिके रज्ज़े कोऐर तेसी सामटे मारि बिदा होरेक तेसर कां करि बिदा। इस पिच़ंञ, तेने रज्ज़ेर लेइ गे ताकि से बेबीलोनाकि कैदखानेन मरि गिउरा लोई।
नबूकदनेस्सर-ओ तेसी सेना यहूदेंञ बेबीलोन लेई गेई, सिर्फ बदेओंञ गरीब मऊंओर पिछ़लि छ़ई कर ताकि तेने बगि फसल बाओरा लोई। इ मोक्का गुलामी गणुंआ ज़ेतन परमेश्वरे मऊंओर वाइदे कि देशंञ निसि गइबे ओनि मजबूर किउरा थिया।
बड़गे परमेश्वरे अपें मऊंओर तेनो पापा ओनि गुलामी लेई गइबे द्वारे सज़ा दिता, तांबि से तेनोर या अपें वाइदेओर न बिस्रुआति। परमेश्वरे अपें मऊंआ निगरानी करिबा जारी थैइया होरेक अपें परमेश्वरा तरफे बोलनेओ द्वारे तेनो सा गप्पा करला बेठा। परमेश्वरे वाइदा किया कि त्राई बीओ दश बरियो पिच़ंञ, तेने फिरि वाईदे कि देशन पलाटेओले।
लगभग त्राई बीओ दश बरियो पिच़ंञ, फारसाकि रज्ज़ा कुस्रूई बेबीलोनर यहर्बि करि बिदा, तेरे बेबीलोन साम्राज्य बजाय फारसा कि साम्राज्ये केतेक्बा देशो पूटी शासन किया। इस्राएली मऊं हेबे यहूदी गणेंओनेति। तेनो बिच़ंञ मस्ह ज़ेईं अपां पूरा ज़िन्दगी बेबीलोनन बितई बिदोरा थिया। सिर्फ थोड़े ज़ेंञ बूए यहूदिउर-ए यहूदा कि देश हीत थिया।
फारसी मऊं डरोंआ सामर्थी थिये, पर तेने अपें जीतोरे मऊंओं पूटी दया कियाति। फारसी मऊंओं कि रज्ज़ा बणिंबे कि मिन ध्याड़े पिच़ंञ, कुस्रूई हुकुम दिता कि कऊं भि यहूदी ज़े यहूदारि पलाटुइबा चाहना थिया, से फारसंञ निसि वापिस यहूदारि गई बटल। इटि च़ेक कि तेनी तेनोर फिरि मंदर बणंइबे ओनि ढबोआ भि दिता। च़े गुलामी कि त्राई बीओ दश बरियो पिच़ंञ, यहूदियो कि एक मठा छुंड यहूदान यरूशलेम नगरिआरि पलाटुए।
ज़ेखेंई तेने मऊं यरुशलेम अपरे त तेने मंदरर होरेक नगरी च़ोउरो फेरे भितिर फिरि बणांया। फारसी मऊं एबेंई भि तेनो पूटी राज करने थिये पर एक फेरा फिरि तेने वाईदे कि देशन बेशने थिये होरेक मंदरन अराधना करने थिये।
2 राजा पाठ 17; 24-25; 2 इतिहास 36; एज़्रा 1-10; नहेम्याह 1-13 च़ेक एक बाइबला कथा
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।