19. परमेश्वरा तरफे बोलना मऊं
परमेश्वर हमेशा इस्राएलिउ कच़ा परमेश्वरा तरफे बोलना मऊं बिज़ला करना थिया। परमेश्वरा तरफे बोलने तेने परमेश्वरंञ उज़ाबोर शुण्णे थिये, च़े तेस उज़ाबोर मऊंओर बताने थिये।
ज़ेखेईं अहाब इस्राएल राज्य पूटी रज़्जा थिया त तेस मुके एलिय्याह परमेश्वरा तरफे बोलना थिया। अहाब एक मदम मऊं थिया। तेनि हफ्सी कि देउओ कि अराधना किवइबे ओनि मऊंओर मजबूर कियाति। तेरे एलिय्याहे अहाबर बोलिया कि परमेश्वर तेनो मऊंओर सज़ा दीब गाना थिया। तेनी तेसर लाई, “ज़ेखेईं च़ेक हऊं फिरि संदा भुइबे ओनि नोलू तेखेंईं च़ेक इस्राएला न संदा भोल होरेक न शरु झ़ाल।” इने गप्पे लेई अहाब डरोंआ रोषुई गिया तेनी एलिय्येर मारिबे फैंसला लेईया।
तेरे परमेश्वरे एलिय्याहारि लाई कि तु बणंन गई अहाबंञ युंकुई बेश। एलिय्याह बणां तेस ठारि गिया ज़ेटि परमेश्वरे तेसर गइबेर लाईति। रोज दोतेंईं-पस्तेला, च़ई-एलिय्याह कि ओनि रोटि ओ मांसा लेइकर अइने थिये। इस मुके, अहाबा कि सेना एलिय्याहर लोइला छ़ुटे, पर तेने तेसर लोई नोटिया।
संदा नुइबे मिन दियो पिच़ंञ से ठार शुकि गिया। तेरे एलिय्याह कच़ा देशारि उठि गिया। तेस देशा एक गरीब रण्णीं थी ज़ेसी एक कोआ थिया। तेनो एटी खर्च़ छ़ोउई गिउरा थिया किसबोलि तेटी फसल भूरा नोथा। पर फिरि भि, तेनी ज़लउंए एलिय्येर एक हफ्ते च़ेक थेइया, तेरे परमेश्वरे तेसी ओ तेसी कोए कि ज़रूरतर पूरा किया इ बजेहे तेसी कणका भाण-ओ तेला कुपी कदी शुण्णे नू-ए। तेस अकाला मुके तेनो एटि खर्च़ थिया। एलिय्याह मिन बरिउ च़ेक तेट्ठीं बेठा।
त्राई ओ आद बरिउ पिच़ंञ, परमेश्वरे एलिय्याहर बोलिया कि हऊं फिरि संदा करु। परमेश्वरे तेसर फिरि इस्राएलर पलाटुई अहाबा सा गप्पा करिबे ओनि बोलिया। तेरे एलिय्याह अहाबा कच़ा गिया। ज़ेखेए अहाबे तेसर कईया त तेनी बोलिया, “अच्छा तु भोया, मुसीबत जई थेण्णा!” एलिय्याए जुवाब दिता, “ मुसीबत जाना त तु भोई! तेईं यहोवा परमेश्वरर छोड़ि बिदोरा असे, पर तु बाल देउआकि अराधना करना। हेबे तूर इस्राएल राज्य कि बदे मऊंओर कर्मेल घऊआ पूटी लेइकर अईबा असे।”
च़े बदे मऊं कर्मेल घउआ पूटी गे। तेने मुषुल्ले भि आये ज़ेने बोलने थिये कि असे बाल देउआ कि उज़ाबर बोलने असु। इने बाल देउआ तरफे बोलने थिये। तेने बदे ज़ेंञ सड़े च़ोउर शऊ थिये। एलिय्याहए मऊंओर लाई, “केखैईं च़ेक तुसे तुईंफें सेमर पलाटी थेओले? अगर यहोवा परमेश्वर भो त तेसी आराधना करो! अगर बाल देउ परमेश्वर भो त तेसी आराधना करो!”
च़े एलिय्याहे बाल देउआ कि तरफे बोलने तेनोर बोलिया, “एक बदेलर बलि करि तेसी मांसाइर बलिदान करिबे ओनि एक वेदी पूटी थेओ, पर अग म लवाओ। तेस पिच़ंञ हऊं भि तेरी करु, होरेक हऊं एक बिक्रे वेदी पूटी तेस मांसइर थेऊं। च़े अगर परमेश्वर वेदी पूटी अग झ़वाल त तुसे ज़ाईं बिज़ो कि सेहे सच्च़ा परमेश्वर भो।” च़े बाल देउआ कि तरफे बोलने तेने एक बलिर तियार किया पर अग न लवाया।
च़े बाल देउआ कि तरफे बोलने-ए बालंञ प्रार्थना किया, “हे बाल देउआ, हईया शुंण!” दिया झा तेने प्रार्थना किया होरेक हउशुए होरेक एम्फ्योर चकुई लेई कटिया, पर बाल देउए ए जुवाब नेता, होरेक तेनी कोई अग न झ़वाया।
बाल देउआकि तरफे बोलने-ए बालंञ प्रार्थना करिबे ओनि लगभग पूरा दीन लवाया। पिछ़ों मुखा तेने प्रार्थना करिबा बंद करि बिदा। च़े एलिय्याहे अयक बदेला मांसेर परमेश्वरा वेदी पूटी थेई थैइया। तेस पिच़ंञ, तेनी मऊंओर पांईं कि मोड़े-मोड़े भाणंर तेस बलिदाना पूटी तेखेंई च़ेक थोर्पि करिबेर बोलिबेर बोलिया ज़ेखैईं च़ेक मांसा, कठो, होरेक वेदी कच़ा लाके कि धर्त पूरा अल्लुई न गिया।
च़े एलिय्याहे प्रार्थना किया, “हे यहोवा, अब्राहम, इसहाक, होरेक याकूबा परमेश्वर, असोर हेरालो कि तपीं इस्राएला परमेश्वर भोई होरेक इ कि हऊं तेपां परगर भोऊं। मूर जुवाब दे ज़ेनी लेई इने इ प्रियांई बिज़ले कि तपीं ए सच्च़ा परमेश्वर भोई।”
तेरि, सर्गंञ अग झ़ईया होरेक तेनी मांसा, कठो, टिक्कीरो, ज़नो होरेक कच़ा लाके पाईंर च़ेक त्राई बिदा। ज़ेखैईं मऊंवी इ कईया, तेने धत्रि पूटी झ़ई गे होरेक बोलिब ठारुए, “यहोवा ए परमेश्वर भो! यहोवा ए परमेश्वर भो!”
च़े एलिय्याहे बोलिया, “बाल देउआकि तरफे बोलना एक भि बच़ि कर गई बटोरा न लोई!” तेरे मऊंई बाल देउआकि तरफे बोलनेओर प्रई बिदा होरेक तेनोर तेटिंञ बिक्रे लेइ गे होरेक तेनोर मारि बिदा।
च़े एल्लियाहे अहाब रज्ज़ेर बोलिया, “युहर्ना तेपें घरेआर नशि ग, किसबोलि संदा बज़िब तियार असे।” युहर्ना-ए क्रिट्ठा बदड़ अइ गिया, होरेक मस्ह संदा बज़िबा च़ुख्फि किया। यहोवा शुकोरा धरत अल्ला करनाति। इनी लेई पता च़लिया कि यहोवा-ए सच्च़ा परमेश्वर भो।
ज़ेखेंई एलिय्याहए अपां कम मुकाया त, परमेश्वरे एलीशा नाऊंआ कि एक मुषुल्लेर अपां तरफे बोलनेर चुनिया। परमेश्वरे एलिशे द्वारे डरोंआ चमत्कार किया। एक चमत्कार नामाना सा भुआ। से एक बईरिऊ कि सैनिको कि सरदार थिया, पर तेसर त्रपी कि एक रोग भुई गिउरा थिया। नामाने एलीशे बारे शूंरा थिया, तेरे से एलीशे कच़ा आया होरेक तेसर ठीक करि बिज़ बोलि शबस किया। एलीशे नामानर बोलिया कि यरदन नाऊंआ कि नेईंन सत फेरा डुबकी लवा।
नामान रोषुआ। तेनी एरा करिबेंञ इंकार करि बिदा, किसबोलि इ तेसर जल्लेओ कम च़ेओनाति। पर पिच़ंञ तेनी अपां सेम लेख्फि करि बिदा होरेक गइकर यरदन नेंइन पांईं बिच़ा सत फेरा डुबकी लवाया। ज़ेखेंईं पिछ़ों मुखा से पाईंञ भइलि निथा त परमेश्वरे तेसर ठीक करि बिदा।
परमेश्वरे इस्राएला मऊंओं कच़ा होरेक केतेक्बा ज़ेंञ परमेश्वरा तरफे बोलनेओर बिदा। तेने बदे मऊंओर मूर्तिऊ कि अऱाधना बंद करिबे ओनि बोलिया। इसी बजहे, तेनोर एम्फ्यों बिच़ा न्याया सा व्यवहार करिब लोइना भो होरेक एक दूसरे पूटी दया करिब लोइना भो। तेने परमेश्वरा तरफे बोलने तेने मऊंओर चेतावनी दिता कि तेनोर मदम कम करिबा बंद करि बिज़िब लोइना भो इसी ठारि परमेश्वरा कि गप्प्योर मनिबा असे। अगर तेने मऊंई एरा न किया त परमेश्वर तेनोर दोषी मनि कर तेनो सा न्याय करल, होरेक तेनोर सज़ा देल।
केतेक्बा च़ेक, तेने मऊंई परमेश्वरा कि आज्ञा न मनिया। तेने खास परमेश्वरा तरफे बोलनेओ सा मदम व्यवहार किया इटि च़ेक कि कांयां त तेनोर मारि भि बिदा। एक फेरा, तेने यिर्मयाह परमेश्वरा तरफे बोलनेर शुकोरा कुंएन फटई बिदा होरेक तेसर तेटि मारिबे ओनि छ़ई छ़इया। से कुंएन जकन शच़ि गिया। पर तेखेंई रज्ज़ेर तेस पूटी दया आया होरेक तेनी अपें सैनिकोर हुकुम दिता कि यिर्मयाह कि मरिबेंञ अगरंञ कुंएञ भइलिर तांईं बिज़ो।
परमेश्वरा तरफे बोलने तेने, परमेश्वरा तरफे बोलिबा जारी थैइया बेशक मऊंए तेनोर नफरत किया। तेने मऊंओर चेतावनी दिता कि अगर तेने पश्चाताप न किया त परमेश्वर तेनोर नाश करि बिज़ल। तेने मऊंओर इ भि हीत किवाया कि परमेश्वरे तेनो कच़ा मसीहर बिज़िबे वाइदा किउरा असे।
1 राजा पाठ 16-18; 2 राजा 5; यिर्मयाह 38 अंञ एक बाइबला कथा
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।