22. यूहन्ने ज़मिबा
इसींञ अगरंञ, परमेश्वरे अपें परमेश्वरे तरफे बोलनेओ सा गप्पा कियाति तेरे तेने मऊंओं सा गप्पा करि बटे। पर तेस मुकेञ दी फिरी च़ौउर शऊ बरिउ गाने च़ेक तेनी तेनोसा गप्पा न किया। च़े परमेश्वरे जकर्याह नाउवें परमेश्वरा तरफे बोलने कच़ा एक स्वर्गदूतर बिदा। जकर्याहओर तेसी घरन् एलीशिबा परमेश्वरा आदर करने थिये। तेने मस्स बूउवी गिउरे थिये, होरक तेनो खीन मठे भोरे नोथे।
तेनी स्वर्गदूते जकर्याह सा लाई, “तेपीं घरनीञ एक मठा ज़मल। तु तेसी नाऊं यूहन्ना थे। परमेश्वर तेसर पवित्र आत्मेसा मस्स भरी बिज़ल, होरक यूहन्ना मऊंओर मसीहर अपनईबोनी छक्कन करल।” जकर्याहए जुवाब दिता, “हऊंओ मेरि घरन् मठा जाईबेओनि मस्स बूए असू! हऊं केर ज़ाईं बटू कि तपीं मू सा छेच्छैईं बोलना?”
तेनी स्वर्गदूते जकर्याहर जुवाब दीता, “तु कच़ा इस रुठू खबरर अणिंबेओनि मूर परमेश्वरे बिदौरा भो। किसबोली तेइं मूं पूटी विश्वास न किया, इकरी बई की ज़मने च़ेक तु बोलिबे ज़ोगा नूअल।” तेखैंईए, जकर्याह बोलि नोटनाति। च़ा से स्वर्गदूत जकर्याह कच़ंञ उठि गिया। इस पिच़ंञ, जकर्याह घरे पलाटुई आया होरक तेसी घरन् पेटाली भूई।
ज़ेखेईं एलीशिबा छ: माओ पेटाली थी, च़ा सेए स्वर्गदूत अचानका सा एलीशिबा की नाती पूटी प्रगट भोआ, ज़ेसी नाऊं मरियम थिया। मरियम कंवारी होरक ब्याह भूईबोनि यूसुफ नाउंवा मुशुण्ले सा तेसी मंगनी भूई मुकोरा थिया। स्वर्गदूते लाई, “तू पेटाली भोली होरक एक कोएर ज़मीली। तुर तेसी नाऊं यीशु थैइबा असे। से सर्व–शक्तिमान परमेश्वरा कोआ भोल होरक से हमेशा कि ओनि शासन करल।”
मरियमे जुवाब दिता, “इ केरा भोल, किसबोलि हऊं ता कुंवारी भोऊं?” तेनी स्वर्गदूते समज़ाया, “पवित्र आत्मा तु पूटी अयल, होरक परमेश्वरा सामर्थ तू पूटी शेवारा करल। इकरी से बई पवित्र भोल, होरक से परमेश्वरा कोआ भोल।” ज़े तेनी स्वर्गदूते लाई तेस पूटी मरियमे विश्वास किया।
इ भूईबे पिच़ंञ तेखैईं, मरियम गईकर एलीशिबे सा हतुई। ज़ेरी-ई मरियमें तेसर नमस्ते किया, एलीशिबे बई पेटन छवा दिता। तेनो ओनि परमेश्वरे ज़े कियाति तेसीकी बारेन तेने ज़लऊं एक साथे तुषी गे। एलीशिबे साथे त्राई माह बेशी पिच़ंञ, मरियम घरेआरी पलाटुई गेई।
इस पिच़ंञ, एलीशिबे अपें बईर जाया। जकर्याहे होरेक एलीशिबे तेस बई की नाऊं यूहन्ना थैया, ज़ेरा कि स्वर्गदूते हुकुम दिताति। च़े परमेश्वरे जकर्याहर बोलिबे ज़ोगा किया। जकर्याहए लाई, “परमेश्वराकी स्तुति भोरा लोई, किसबोलि तेने अपें मऊंओं की मज़द करिबेर हीत थैया! हे मेरा कोआ, तपीं सर्वशक्तिमान परमेश्वरा की भविष्य हैरालना भोल। तु मऊंओर बताल कि तेने केरा अपें पापो ओनि माफी हतेरी बटेले!”
लूका पाठ एकंञ बाइबला कथा
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।