23. यीशु ज़मिबा
यूसुफ नाउवां एक धर्मी मऊं सा मरियमा मंगनी भुई मुकोरा थिया। ज़ेखैंईं तेनी शुंईयां कि मरियम पेटाली असे त से ज़ान्नाति कि से तेसी बई नूं। पर, से मरियमर बदनाम करिबा न चाहनाति, तेनी तेस पुटि कृपा करिबे कि होरेक तेसर च़ुप्पी छोड़ि बिज़िबे सोचिया। पर तेसीकि एरा करिबे अगरंञ, एक स्वर्गदूते तेसी सुयें अईकर तेस्सा गप्पा किया।
तेनी स्वर्गदूते लाई, “हे यूसुफा, मरियमर तेपीं घर्नि रुपन लेईकर अड़िबेंञ म डर। तेसी अंदर ज़े बई असे से पवित्र आत्मे तरफे भो। से एक मठेर जनम देली। तेसी नाऊं यीशु थे (ज़ेसी मतलब भो, ‘यहोवा बच़ाना असे’), किसबोलि से मऊंओर तेनोंकी पापा सा बच़ाल।”
तेरे यूसुफे मरियमा सा ब्याह किया होरक तेसर अपीं घर्नि रुपन घरे लेई आया, पर तेसी बई ज़मने च़ेक से तेस्सा न बेठा।
ज़ेखेईं मरियमा जन्म दिबे ध्याड़ा नींया थिया, त तेनी होरक यूसुफे बैतलहम गईबे एक लमा सफर किया। तेनोर तेटि गईबाए थिया किसबोलि रोमी अधिकारी इस्राएला बेशने तेनो बदे मऊंओर गंणिबा चाहनेति। तेने चाहनेति कि बदे मऊं तेटि गिउरे लोई ज़ेटि तेनो पूरशोई बेशने थिये। रज़्जा दाऊदा जनम बैतलहमन भुआति, होरक से मरियमोर यूसुफ दूईयो ज़िऊ कि पूरशोई थिया।
मरियमो यूसुफ बैतलहम गे, पर तेटि जानवरोर थैण्ने तेस ठारि इलावा तेनोर बैशिबे ओनि खीं ठार नोथा। सेए ठार थिया ज़ेटि मरियमें अपें बईर जन्म दिता। तेनी तेसर कुरुलज़ेन लिटाया किसबोलि तेटी तेसी ओनि खीं बिछ़ा नोथा। तेने तेसी नाऊं यीशु थैया।
तेस राती, तेटि कच़ाए बगिन पउवालो एम्फें पेरुओ की छुंडा की निगरानी करनेति। अचानके, एक च़ल्कोरा स्वर्गदूत तेनो पुटि प्रगट भोआ, होरक तेने डरि गे। तेनी स्वर्गदूते लाई, “म डरो, किसबोलि मूकींञ तुईफाओनि रुठू उज़ाब असे। अज़ दाऊदा नगरी बैतलहमन तुसो ओनि मुक्तिदाते कि जनम भुरा असे। होरेक सेऐ मसीह ओ प्रभु भो!”
गईकर तेस बईर लोओ, होरक तुप्सीं तेसर डबुंन जिल्ज़ी किउरा होरक कुरुल्ज़ेन लेटोरा हथेरोले।” अचानके, सर्ग स्वर्गदूतो सा भरुई गिया। तेने परमेश्वरा स्तुति करनेति। तेने लाई, “बदे महिमा स्वर्गन मौजूद परमेश्वरर हतेउरा लोई। पृथ्वी पुटि तेनो मऊंओंञ शान्ति भुरा लोई ज़ेनोकि से च़िन करना असे!”
च़ा स्वर्गदूतो उठि गे। तेने पउआलो भि एम्फे पेरुओर च़ारिबा छईकर बईर हैरिब गे। यूरनाए तेने तेस ठारी अपरे ज़ेटि यीशु थिया होरक तेने तेसर कुरुल्ज़ेन लेटाओरा कया, ज़ेरा कि तेनी स्वर्गदूते लाईति। तेने मस्स तुठोरे थिए। च़ा तेने पऊआलो फिरी तेटी पलाटुई गे ज़ेटि तेनोकि पेरु थिए। तेने ज़े भि शुयां होरक कइया तेनो बदेओ ओनि तेने परमेश्वराकि स्तुति करनेति।
पूर्वन दूरे एक देशन मिन मुशुण्ड्ले थिये। तेनोर तारेओ ज्ञान थिया होरेक तेने मस्स शंञफो थिए। तेने एक बदेओंञ बिक्रे तारेर सर्गन कइया। तेने लाई कि इसी मतलब भो कि यहूदियो कि एक खरके रज़्जे जनम भुरा असे। तेरे करि तेने तेस बईर हैरिब ओनि अपें देशंञ सफर करिबे फैंसला किया। एक लम्मे सफरा पिच़ंञ, तेने बैतलहम आये होरक तेस घरेर हथेरिया ज़ेटि यीशु-ओ तेसीकि या-बा बेठोरे थिये।
ज़ेखेए इने मुशुण्ड्ले यीशुर अपीं या सा कइया त तेने ज़ानू बले बेशिकर तेसीकि आराधना किया। तेने यीशुर मांञे तोहफे दिते। च़े तेने घरेआरी फिरि पलाटुई गे।
मती पाठ एक; लूका दोआकि एक बाइबला कथा
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।