24. यूहन्‍ना यीशुर बपतिस्‍मा देना असे

एलीशिबा ओ जकर्याह कि कोआ यूहन्‍ना, मोड़ा भूईकर एक परमेश्‍वरा तरफे बोलना बणिं गिया। से बणंन बेशना थिया, होरक बणां मखीरो टिड्डोर खईला करनाति, होरक ऊंटंञ बणोंरा डबूं लवीला बेशना थिया।

मस्‍स ज़ेञ मऊं यूहन्‍ने गप्‍पे शुंईबोनि बणां निसि आये। तेनी इ बोलिकर तेनोर प्रचार किया, “पश्‍चाताप करो, किसबोलि स्‍वर्गा राज्‍य नियां असे!”

ज़ेखेए मऊंए यूहन्‍ने उज़ाबर शुंया, त तेनो बीच़ंञ मस्‍स ज़ेईं-ई अपें पापा सा पश्‍चाताप किया, होरक यूहन्‍ने तेनोर बपतिस्‍मा दिता। यूहन्‍नेर हैरिबोनि मस्‍स ज़ेञ यहूदी धार्मिक परधानो भि आए, पर तेने अपें पापंञ पश्‍चाताप न किया।

यूहन्‍ने धार्मिक परधानों सा लाई, “हे ज़हरीले लोड्ल्‍लुओ! पश्‍चाताप करोओर अपें व्‍यवहारर लेख्‍फि करो। परमेश्‍वर हर तेस बुटर कटि बिज़ल ज़े रुठ फल न अण्‍णां, होरक से तेनोर अगिन छ़ई बिज़ल।” ज़े परमेश्‍वरा तरफे बोलने-ए लाइति यूहन्‍ने तेस पूरेरिया, “हेर, यूरनाए हऊं तेर अगरों मेपां उज़ाब देनेर बिज़ु ज़े तेपांओनि बत तियार करल।”

मिन ज़ेञ धार्मिक परधाने यूहन्‍ने सा पुछ़िया कि खि से मसीह भोआ। यूहन्‍ने जुवाब दिता, “हऊं मसीह नूं, पर से मुं पिच़ंञ अईना। से एतोक महान असे कि हऊं तेसीकी बूटो तस्‍मा खोईबे ज़ोगा भि नूं।”

होर्दी, यीशु बपतिस्‍मा लेईबोनि यूहन्‍ने कच़ा गिया। ज़ेखेए यूहन्‍ने यीशुर कईया, त तेनी लाई, “हेरो! परमेश्‍वरा छ़ेड्ल्‍लू ज़े संसारा की पापोर उछ़ुई कर लेई गाल।”

यूहन्‍ने यीशु सा लाई, “हऊं तपींर बपतिस्‍मा दिबे ज़ोगा नूं। बजाए इसीकी ज़रुरी असे कि तपीं मूंर बपतिस्‍मा दे।” पर यीशुई लाई, “तु मूंर बपतिस्‍मा दे, किसबोलि रुठू कम इए भो।” तेरे यूहन्ने यीशुर बपतिस्‍मा दिता, जबकि यीशुई कदी पाप किउरा नोथा।

बपतिस्‍मा दी पिच़ंञ ज़ेखेए यीशु पाईंञ निसीकर भईंरों आया त, परमेश्‍वरा आत्‍मा क्रिम्‍लो रुपन प्रगट भुआ होरक बुन अईकर तेस पुटि बेठा। तेस्‍से मुके, परमेश्‍वरे स्‍वर्गंञ गप्‍पा किया। तेनी लाई, “ई मेरा कोआ भो। हऊं तपींसा दा करना असू, होरक हऊं तपींसा मस्‍स तुठोरा भोऊं।”

परमेश्‍वरे यूहन्‍ने सा लाईति, “पवित्र आत्‍मा बुन अईकर केसोआ पुटि बेशि गाल ज़ेसर तपीं बपतिस्‍मा देल।” सेए परमेश्‍वरा कोआ भो परमेश्‍वर एक्‍के भो। पर ज़ेखेए यूहन्‍ने यीशुर बपतिस्‍मा दिता, च़े तेनी परमेश्‍वर बार गप्‍पे करिब शुंयां, कोए परमेश्‍वरर कईया, ज़े यीशु भो, होरक यीशुई पवित्र आत्‍मेर कईया।