25. शैतान यीशु की इम्‍तिहान लेना असे

यीशु कि बपतिस्‍मा भूई तेखैईं ज़ेञे, पवित्र आत्‍मा यीशुर बणंन लेई गिया। यीशु तेटि दुई बी दी-ओ दुई बी रात च़ेक थिया। तेस मुके यीशुई व्रत किया, होरक शैताने यीशु कच़ा अईकर पाप करईबोनि तेसीकी इम्‍तिहान लैया।

ज़ेखैईं प्रभु यीशुर भुकुर लगि त, शैताने यीशु सा लाई, “अगर तपीं परमेश्‍वरा कोआ भो त इने रुणोंर रोटि बणंई बिज़ ताकि तेपें खई बटोरा लोई!”

पर यीशुई शैताना सा लाई, “परमेश्‍वरा वचनन इ लिखोरा असे, ‘ज़ीना बेशिबे ओनि मऊंर सिर्फ रोटि ज़रुरी नूईंबा, पर तेनोर हर तेस गप्‍पे ज़रुरत असे ज़े परमेश्‍वर तेनोसा बोलना असे!’”

च़े शैतान यीशुर मंदरा की बदेओंञ उथे ठारि लेई गिया। शैताने यीशुसा लाई, “अगर तपीं परमेश्‍वरा कोआ भोई त इटिंञ बुन छ्वा दी बिज़, किसबोलि लिखोरा असे, ‘परमेश्‍वर तपींर उछ़ुईबोनि अपें स्‍वर्गदूतोर हुकुम देल ताकि तेपें खुरोर रुणांसा लगोरा न लोई।’”

पर यीशुई से न किया ज़े शैताने यीशुसा करिबोनि लाईति। इसी बजाए, यीशुई लाई, “परमेश्‍वर हर एक मऊं सा बोलना असे, ‘तपीं प्रभु तेपें परमेश्‍वरा की इम्‍तिहान म करो।‘”

च़ा शैताने यीशुर संसारा की बदे राज्‍य हेरालिए। शैताने यीशुर हैरालिया कि तेने केतोक तागतवर थिये, होरक तेने केतोक खुशहाल थिये। शैताने यीशु सा लाई, “हऊं तपींर इने बदेदीर दी बिज़ू अगर तपीं ज़ानू भारे अई मूर फ्‍यक्‍स करल त।”

यीशुई जुवाब दिता, “हे शैताना, मू कच़ंञ उठि गा! परमेश्‍वरा वचनन यीशु मऊंओर हुकुम देना असे, ‘सिर्फ मेपें प्रभु परमेश्‍वरा आराधना करो। परमेश्‍वरा रुपन सिर्फ यीशु आदर करो।’”

यीशुई शैताना इम्‍तिहाना सा हार न मनिया, तेरे-ए शैतान यीशु कच़ंञ उठि गिया। च़ा स्‍वर्गदूतो अईकर यीशु सेवा टहल करिब ठारुए।