26. यीशु अपां सेवा करिबे शुरुआत करना असे

शैताना कि इम्‍तिहानोर मना करि पिच़ंञ, यीशु पलाटुई गलीला लाकेन आया। इए से ठार भो ज़ेटि यीशु बेशना थिया। पवित्र आत्‍मा यीशुर मस्‍स तागत देनाति, होरक यीशु एक ठारिंञ अईक ठारीआरी गिया होरक मऊंओर शिक्षा दिता। बदे यीशु बारेन रुठू गप्‍पे लाई।

यीशु नासरत नगरीन गिया। इ से नगर भो ज़ेटि यीशु मठेन्‍ज़ेञंन बेशना थिया। नह्च़ि करिबे दिया, यीशु आराधना करिबे ठारि गिया। यहूदी परधाने-ए यीशुर यशायाह परमेश्‍वरा तरफे बोलने कि उज़ाबा एक कताब दिता। तेने चाहने थिये कि यीशुई से कताब पढ़ोरा लोई। तेरे यीशुई तेस कताबर खोईकर तेसी एक हिस्‍सेर मऊंवोओनि पढ़िया।

यीशुई पढ़िया, “परमेश्‍वरे मूंर अपां आत्‍मा दितोरा भो ताकि हऊं गरीबोर रुठू खबर प्रचार करि बटू। तेनी मूंर तेरे बिदोरा भो ताकि कैदियोर आज़ाद करु, कां मऊंओर फिरी टीरा देऊं, होरक तेनोर छुटकारा देऊं ज़ेनोर होरेक मऊं च़िकनेन। इ से मुका भो ज़ेखेए परमेश्‍वर अस्‍प्यों पुटि मस्‍स दया करल होरक अप्‍सेयोंर मदद करल।”

च़ा यीशु बेशी गिया। बदे मऊं तेसर बड़े ध्‍याना सा हेरनेति। तेने ज़ान्‍नेति कि पवित्रशास्‍त्रा ज़े हिस्‍सा यीशुई एबैईं पढ़ियाति। से मसीह बारेन थिया। यीशुई लाई, “ज़े गप्‍पे मैंईं एबैईं तुप्‍सेयो ओनि पढ़िया, से इस मुक्‍के भुइला असे।” बदे मऊं हैरान थिये। तेने मऊंवी लाई, “खि इ यूसुफा कोआ नूंआ?”

च़ा यीशुई लाई, “इ छेछैईं भो कि मऊंए केसोआ एरा घाटे परमेश्‍वरा तरफे बोलनेर कद्‍दी अपनाया न घटि ज़े तेनो नगरीन मोड़ा भोरा भोल। एलिय्‍याह परमेश्‍वरा तरफे बोलने मुके, इस्राएलन मस्‍स ज़ेंञ रण्‍णीं ज़लऊं थिये। पर ज़ेखेऐ सढ़े त्राई वर्षा च़ेक संदा नूआ त परमेश्‍वरे एलिय्‍याहर इस्राएलन कऊंआ रण्‍णींर मदद करिबोनि न बिदा। इसी बजाए, एलिय्‍याहर कोठेआ होरक देशा रण्‍णीं कच़ा बिदा।”

यीशुई बोलिबा जारी थैया, “होरक एलीशा परमेश्‍वरा तरफे बोलने मुके, इस्राएलन मस्‍स मऊं त्रपी रोगंञ दु:खोरे थिए। पर एलीशाए तेनो बिच़ंञ केस्‍सोर भि अईन न कियाति। तेनी इस्राएला दुश्‍मणा की सेनापति नामानर ज़ेत्‍ती अईन कियाति।” पर ज़े मऊं यीशुर शुण्‍नेति तेने यहूदी थिए। ज़ेखेए तेने यीशुर इ बोलिब शुंया त तेने यीशु पुटि रोशुए।

नासरता मऊंए यीशुर प्रई बिदा होरक यीशुर आराधने ठारींञ द्रि कर भईंरों लेई गे। तेने यीशुर मारि बिज़िबे ओनि बुन फटईबेर एक टिकरी मुक्‍का लेई गे। पर यीशु भीड़ंञ निसि गिया होरक नासरत नगरीर छई उठि गिया।

च़ा यीशु बदे गलीला ठारी गिया, होरक मस्‍स भीड़ तेसी कच़ा आई। तेने मस्‍स ज़ेंञ मऊंओर लेई आए ज़े दुखोरे ओ लट्टे थिए। तेनो बिच़ंञ मिन हेरी, हणीं, शुंई होरक बोली नोटने थिये, होरक यीशुई तेनोर अईन किया।

इसी इलावा, मस्‍स ज़ेंञ एरे मऊं यीशु कच़ा आने ज़ेनोंञ मदम आत्‍माओ थिये। यीशुई मदम आत्‍माओर तेनोंञ निसि गईबे हुकुम दिता। तेने मदम आत्‍माओ हउशुए, “तपीं परमेश्‍वरा कोआ भो!” मस्‍स मऊं ठठ्ठ थिए, होरक तेने परमेश्‍वरा स्‍तुति किया।

च़ा यीशुई बारा मुशुड्लेओर चुनिया ज़ेनोर तेनी अपें चेल्‍ले लाई। तेने चेल्‍ले यीशु सा सफर किया होरक यीशुंञ शिक्षा हथेरिया।