27. रुठू सामरी कथा

एक झा, यहूदी कानूना एक ज़ाणकार यीशु कच़ा आया। से बदेओर हैरालिबा चाहन्‍नाति कि यीशु गलत ढंगा सा शिक्षा देना। तेरे तेनी लाई, “हे गुरु, हमेशे जीवन हथेरिबोनि हऊं खि करु?” यीशुई जुवाब दिता, “परमेश्‍वरा कानूनन खि लिखोरा असे?”

तेनी मऊवी लाई, “से बोलना असे कि मेपें परमेश्‍वरा सा तेपें पूरे सेम, जान, सामर्थ-ओ, बुद्धि सा दा थे। होरक तेपें पड़ोसी सा तेपां बराबर दा थैओ।” यीशुई जुवाब दिता, “तु एकदम सई भो! अगर तु एरा करल, त तुर हमेशे जीवन हथेओल।”

पर से कानूनर ज़ाण्‍ना मऊंओर हैरालिबा चाहन्‍नाति कि तेसीकि जीवन ज़ीबे तरीका सई थिया। तेरे तेनी यीशुर पुछ़िया, “ठीक भो, च़ा मेरा पड़ोसी कऊं भो?”

“यीशुई तेस कानूना ज़ाण्‍कारर एक कथाई द्वारे जुवाब दिता। “एक यहूदी मऊं थिया ज़े एक सड़केंञ भूईकर यरुशलेमंञ यरीहो कि सफर करनाति।”

“पर केन्‍या डाकुए तेस कया होरक तेस पुटि हमला करि बिदा। तेने तेसीकी बदेदीर लेई बिदा होरक तेसर लगभग मारिब ज़ोगा द्रड़ी बिदा। च़ा तेने उठि गे।”

“तेस पिच़ंञ तेखैईं ज़ेञ, एक यहूदी पुजारी तेस्‍से बते भूईकर गिया। तेनी यहूदी पुजारी तेस मऊंर बतन झ़ाओरा कया। ज़ेखैईं तेनी तेस कईया त से बतंञ अईक्‍यारिंञ गईकर अगलिरि उठि गिया। तेनी तेस मऊंर पूरा न कईबे ठो करि बिदा।”

“इस पिच़ंञ मिन झाए पिच़ंञ, एक लेवी तेस्‍से बता आया। (लेवी यहूदियो की एक गोत्र थिया ज़ेने मन्‍दरन् यहूदी पुजारियो मदद कियाति) से लेवी भि बतंञ अईक्‍यारिंञ निसी उठि गिया। से भि तेस मऊंर गांण न छ़ई उठि गिया।”

“अयक मऊं ज़े तेस बते आया से सामरिये कि एक मऊं थिया। (सामरीओ यहूदी एम्‍फेयों बिच़ा नफरत करने थिए।) तेनी सामरिए बतन तेस मऊंर कया। तेनी कईया कि से यहूदी थिया, पर फिरी भि तेनी तेस पुटि मस्‍स दया किया। तेरे से तेस कच़ा गिया तेसीकि ज़खमा पट्टी बनिया।”

“च़ा तेनी सामरिए तेस मऊंर अपें कारे पुटि थेईया होरक तेसर सराएंन लेई गिया। ज़ेटि तेनी तेसी ख्‍याल थैया।”

अगरीं दिया, तेस सामरीर अपां सफर करिबा ज़रुरी थिया। तेनी तेस सराएं ग्राखिर खीं ढबुआ दिता। तेनी तेस्‍सा लाई, “एस मऊंआ ख्‍याल थेओ। अगर इस ढबूए इलावा तेपां होरक ढबा खर्च भूई गाल त पलाटुईब साथे हऊं तेपां खर्चा दी बिज़ू।”

च़ा यीशुई तेस कानूना ज़ाण्‍कारंञ पुछ़िया, “तु खि सोचना? इने त्राई मऊंओं बिच़ंञ कऊं तेस मऊंआं पड़ोसी भो ज़ेसर लूटिकर द्रड़ि बिदोरा थिया?” तेनी जुवाब दिता, “सेए ज़े तेस पुटि दयालु थिया।” यीशुई तेस्‍सा लाई, “तपीं गा होरक एरीए करो।”