28. टंगेटा छ़ोकरा शासक

एक झा, एक टंगेटा छ़ोकरा शासके यीशु कच़ा अईकर पुछ़िया, “हे बदेओंञ रुठू गुरु, हमेशे जीवन हथेरिबोनि मूंर खि करिब लोई?” यीशुई तेस्‍सा लाई, “तु मूंर ‘बदेओंञ रुठू’ किस बोलना? सिर्फ एक्‍के बदेओंञ रुठू भो होरक से परमेश्‍वर भो। पर अगर तु हमेशे जीवन हथेरिबा चाहना त परमेश्‍वरा कानूनर मन।”

तेनी पुछ़िया, “मूंर कोसंञ-कोसंञ हुकमर मनिबे ज़रुरत असे?” यीशुई जुवाब दिता, “हत्‍या म करो। झकेउआं कम म करो। चोरी म करो। हफ्‍सी म बिच़ारो। मेपें बाओर याकी आदर करो, होरक मेपें पड़ोसी सा मेपें बराबर दा करो।”

पर तेनी छ़ोकरे मुशुड्ले लाई, “हऊं मठेंनज़ंञ किनदीए इने बदे हुकुमोर मनला आओरा भोऊं। मूंर हमेशेओनि ज़ीना छ़ुटिबेर एबैईं भि खि करिबा ज़रूरी असे?” यीशुई तेसारि हेरिकर तेसर दा किया।

यीशुई जुवाब दिता, “अगर तु महान भूईबा चाहना त गईकर तेपां बदेदीर बिक्रीं बिज़ होरक से ढबूआ गरीबोर बण्‍णीं बीज़, होरक तुर स्‍वर्गन ढबूआ हथेओल। च़ा अईकर मूं पिछ़ीं भूईगा।”

ज़े यीशुई लाई ज़ेखेईं तेनी छ़ोकरे मुशुड्‍ले शुंया त से मस्‍स उदास भूई गिया, किसबोलि से मस्स टंगेटा थिया होरक से अपां बदे धन-दौलतर दीबा चाहना नोथा। से फिरिकर यीशु कच़ंञ उठि गिया।

च़ा यीशुई अपें च़ेल्‍लेयो सा लाई, “परमेश्‍वरा राज्‍यन टंगेटे मऊंओ कि अईबा मस्‍स मुश्‍कुल असे! हां, एक टंगेटा मऊं कि परमेश्‍वरा राज्‍यन अईबेंञ करि केसोआ ऊंटा की सिनई खातरंञ निसी गईबा योच्‍ची असे।”

ज़े यीशुई लाई ज़ेखेईं च़ेल्‍ले शुंया त तेने हैरान थिये। तेने लाई, “अगर इ एरा असे त परमेश्‍वर केसर बच़ाल?”

“यीशुई च़ेल्‍लेयोर हैरिया होरक लाई, “मऊंआ ओनि मेपां उद्धार करिबा नामुमकिन असे। पर परमेश्‍वराओनि खीं भि करिबा नामुमकिन नाईं।”

पतरसे यीशु सा लाई, “अप्‍सीं च़ेल्‍ले मेपां बदेदीर छ़ईकर तेपां पिछ़ीं भूई गिउरे असु। च़ा अप्‍सेयों इनाम खि भोल?”

यीशुई जुवाब दिता, “हर एक मऊं ज़ेनी मेरे वजहंञ घरर, भाईर, भेईंर, बार, यार, मठेओर, या धन-दौलतर छोड़ोरा असे, से तेसींञ शऊ गुणा मस्स हथेरल होरक हमेशे ओनि जीवनर हथेरल। पर मस्स ज़ेञ ज़े अगरीं असुन तेने पिछ़ेओले, होरक मस्स ज़ेंञ ज़े पिछ़ेओरे असुन तेने अघरेओले।”