29. दया मेतेईं परगरा कथा

एक झा, पतरसे यीशु सा पुछ़िया, “हे मालिका, मूंर अपें भाईर केतोक फेरा माफ करिब लोई ज़ेखेईं से मेरे खिलाफन पाप करना असे? खि सत फेरे च़ेका?” यीशुई लाई, “सत फेरा ना, पर सता की त्राई बीओ दश फेरे च़ेक!” इसी द्वारा, यीशु मतलब भो कि अप्‍सेयोर हमेशा माफ करिब लोई। च़े यीशुई ई कथा शुंणांया।

यीशुई लाई, “परमेश्‍वरा राज्‍य एक रज्‍ज़े बराबर भो ज़े अपें परगरा सा लेखा लेईबा चाहन्‍नाति। तेसी एक परगर दूई लाख बरिउ मजदूरी कि एक मोड़े कर्ज़ा कि कर्ज़दार थिया।”

पर तेनी परगरे अपां कर्ज़ दी नोटिया, इकरी रज्‍ज़े लाई, “इसी कर्ज़ मुकइबोनि इस मुशुड्लेर होरक इसी टबरोर परगर बणंई बिक्रीं बिज़ो।”

“तेनी परगरे रज्‍ज़े समटे अपें ज़ानूओ बले झ़ईकर लाई, ‘शबस करि मू सा धीरज थे, होरक हऊं मेपें ऋणा कि बदे रकमर दी बिज़ू।’ रज्‍ज़े परगरा पुटि दया किया, तेरे तेनी तेसी बदे ऋणर माफ करि बिदा होरक तेस गईब दिता।”

“पर ज़ेखेए से परगर रज्‍ज़े कच़ंञ भईरों गिया, त तेसर तेसीकि साति परगर हतुआ ज़े तेसीकि च़ौउर मांह कि मजदूरी कि ऋणीं थिया। तेनी परगरे अपें साति परगरर प्रई बिदा होरक लाई, ‘ज़े तु पुटि ऋण असे मूंर से पलाटेर!”

“तेनी साति परगरे ज़ानुओ बले झ़ईकर लाई, ‘ज़ी मू सा धीरज थे, होरक हऊं मेपें ऋणां बदे रकमर दी बिज़ू।’ पर इसी बजाए, तेनी परगरे अपें साति परगरर कैदन छ़ई बिदा ज़ेखेईं च़ेक कि तेसर ऋण दी न बिज़ल।”

“ज़े भि भुआति तेस होरक परगरे कया होरक तेने मस्स दुखी भोए। तेने रज्‍ज़े कच़ा गे होरक तेसर बदेदीर बतई बिदा।”

“रज्‍ज़े तेस परगरर बुलईकर लाई, ‘हे मदम परगरा! मैईं तेरे ऋणर तेरे माफ कियाति किसबोलि तेईं मू सा विनती कियाति। तुर भि तेरीए करिब लोईनाति।’ रज्‍ज़ा एतोक रोशोरा थिया कि तेनी तेस मदम परगरर कैदन छ़ई बिदा ज़ेखेए च़ेक कि से अपें बदे ऋणर पलाटेरी न बिज़ल।”

च़ा यीशुई लाई, “मेरा स्‍वर्गन बेठोरा बा तुप्‍सेयों बिच़ा हर एक मऊं सा एरी करल अगर तुप्‍सीं भाईर तुईपें सेमञ माफ करि न बिज़ोले।”